گوستگیں روچاں بزاں ۲۰۱۷۔۱۔۳۱ ءَ بلوچی اکیڈمی کوئٹہ ءَ واجہ ناصر جالب ءِ کتاب ’’ رودادِ وفا‘‘ ءِ دیمدارئی مراگش جم دارگ بوتگ اَت ۔ واجہ ناصر جالب کہ وت یک شاعر ءُُ ادیبے زانگ بیت ءُُ دیوان ءَ بلوچی زبان ءِ پُرمڑائیں کارگشاد ءُُ بلوچی زبان ءُُ لبزانک ءِ براہ اوں ساڑی بوتگ اَنت ہمیشانی تہا چندے نام اے ڈول اَنت بلوچی زبان ءِ مزن گدار نویس واجہ منیر احمد بادینی ،ڈاکٹر سلیم کرد،ناصر جالب،بلوچی اکیڈمی ءِ کارمسترممتاز یوسف، بلوچی اکیڈمی ءِ جنرل سیکرئٹری شکور زاہد،بلوچی ڈیپارٹمنٹ ءِ کارمستر واجہ حامد علی بلوچ ، بلوچستان ءِ گوستگیں سر وزیر ڈاکٹر عبدالمالک بلوچ ،پناہ بلوچ،آغا گل ،سیال کاکڑ،سرور جاوید،قادر بلوچ ،ڈاکٹر یحٰی بلوچ ءُُ اے دگہ مردم ہوار بوتگ انت۔
اے مراگش ءَ ناصر جالب ءِ کتاب ءُُ حبیب جالب ءِ زند ءُُ شاعری ءِ بابت ءَ تران بوتگ اَت چنائی ءَ دیوان کتاب ءِ دیمدارئی اَت بلئے گیشتر مردماں بلکیں درائیں مردماں آشوبی شاعر حبیب جالب ءِ زند ءُُ آئی ءِ کرد ءِ بابت ءَ تران کت۔دیوان ءِ درائیں گشتانک دئیوکاں حبیب جالب ءِ شاعری ءُُ آئیءِ مظلومانی حق ءُُ مزانی سرا بستگیں شیئر ءُُ شاعری ءِ بابت ءَ تران کت۔ اجبیں گپ ہمیش اَت کہ حبیب جالب ءَ اگاں چہ پہ مظلومیں قومانی بابت ءَ شاعری کتگ آ دراہ وتی جاگہ بلئے آئیءِ بچ ءِ کتاب درائی ءُُ آئیءِ بابت ءَ مجلس بائد پنجاب ءَ بوتیں کہ ہمود ءِ نندوک اِت اَنت بلوچستان ءَ آ اوں بلوچی اکیڈمی ءَ وتی بامرد ءُُ زانتکار باز اَنت کہ آہانی بابت ءَ چم پہ دیوانے ءَ رہچاری ءَ اَنت۔ بلوچی اکیڈمی ءِ باسک ءُُ ممبر بائد اِنت وتی جند ءِ کماندار ءُُ لبزانتکارانی روچ ءُُ سالروچاں جم بہ کنت اِنت کہ سک باز اَنت ءُُ باز براں ہمے گپ دیم ءَ کیت اگاں یکے ءِ سرا دیوان بہ بیت گڈاں اے دگہ بامرداں چون کن اِت؟ منی گشگ ہمیش اِنت کہ بلوچ بامرد وت سک باز اَنت ہمیشانی سراجنگ اِنت ۔مئے سروکاں یک ڈنی مردمے ءِ یات ءُُ کتاب دیمدرائی ءِ دیوان وتی کڈگ ءَ داشتگ ۔۔۔۔اے اجب انت ۔اے گپ وتی رد نہ اِنت کہ واجہ حبیب جالب ءَ پہ بلوچستان ءِ آجوئی ءُُ حق ءُُ مزانی بابت ءَ مدام توار چست کتگ ءُُ گوں بوتگ ۔آئیءِ شاعری پہ وپتگیں قومانی شور دئیگ ءُُ ٹوئینگ ءَ بلائیں کردے پیلو کتگ بلئے اے اوں چارگ لوٹیت کہ مئے وتی بامردانی کرد اوں تک ءَ کم نہ بوتگ من کئی کئی ناماں نبشتہ بکن اَنت گل خان ،آزات جمالدینی ،حسین عنقا ، سید ہاشمی ، عطا شاد،جی آر ملا، جوانسال ،رحم علی مری، چگھا بزدار،ءُُ سک باز اَنت کہ نام اِش گرگ نہ بنت۔ بائد ما ہمے بامردنانی روچ ءُُ سالروچاں بدار اَنت کہ مئے وتی جند ءِ بامرد ءُُ کماندار ءُُ رہشون بوتگ اَنت چہ جائے کہ اے دری مردمانی ۔۔۔۔۔؟ انوں سیزدہ فروری ءَ واجہ عطا شاد ءِ روچ پیداک اِنت بائد انت بلوچی اکیڈمی کوئٹہ ءِ کارگشاد ہمے واجہ کارءِ یات ءُُ ترانگءَ دیوان بدار اَنت کہ مئے اسل واجہ کار ہمیش اَنت۔اگاں نا بزاں ما وتی بنڈالاں وت ولگوج کنگ ءَ اَنت ۔
حیر اے پُر مڑائیں دیوان ءَ درائیں مردماں ابید واجہ حبیب جالب ءِ نماسگ ءَ وتی وشیں توارءَ حبیب جالب ءِ چیزے شئیر وشی گٹی ءَ گشنت اَنت کہ دیوانے براہ دار کت ہمے شئیرانی تہا آئیءِ نام دارتریں شئیر کہ
’’جاگ میرے پنجاب کہ پاکستان چلا‘‘
بزاں پاکستان ءِ ہما دور ءِ جاوراں بیان کنگ ءَ اِنت کہ بنگال وہدے جتا بوہگ ءَ اَنت ءُُ اے دگہ دمگ اوں پرآشوب ات انت ،مروچیگیں جاور اوں ہمے ڈول اَنت پمشکا ما گشت کن اَنت کہ واجہ حبیب جالب یک استمانی شاعرے بوتگ ءُُ آئیءِ زند ءُُ شاعری ءِ بابت ءَ آئیءِ زہگ ءِ اے کتاب ’’ رودادِ وفا‘‘ ستا کرزیت۔
