وجود existence بْن اصل ءَ ہم وجودco۔existence ءِ بیت یا ۔وجودہم وجود ئیگ اِنت۔ بلے انسان وتی نفری زند ءَ ہم راجمان ءِ تہا گوازینگ ءَ اِنت گڑا بائد اِنت انسان ءِ وجود ءِ رِدیں دروشم (generalized pattern) ءِ گپ بہ بیت۔
اگاں کسے ہمے رِدیں وجود ءَ اصل یا گواچن سرپد بہ بیت گڑا اے عمل نا محکمیں (inauthentic) وجود ءِ گچین کنگ اِنت۔پرچہ کہ ربیتی قید ءِ تہا بوہگ گواچنیں زند نہ اِنت۔ پرچہ کہ انسان بے رضا ءْ لوٹ ءَ اے دنیا ءِ تہا چگل دئیگ بوتگ۔ پہ گواچنیں زند ءَ انسان ءَ وتی امکانی جْست ءْ پْرس بزاں پٹ ءْ پول ءْ یکشلی برجاہ دارگی اِنت۔ پرچہ کہ اے امکان ءِ برجاہ دارگ انسان ءَ ’’چگل دئیگ‘‘ ءِ ایراد ءْ جبر ءَ چہ ازات کنت۔ اے چگل ءَ چہ ازات بوہگ نفر ءِ راستیں وجود اِنت۔
چگل دئیگ راجمان ءِ تہا یک جوہرے ءِ بسات ءَ داریت۔بلے اے جوہر راجمان ءِ تہا ربیت ءِ شکل ءَ اِنت کہ نفر ءِ زندیا وجود ءَ بندگ ءْ ایشی ءَ تعین کنگ ءَ اِنت۔ مارا اے زانگ لوٹیت کہ جوہر ہما وہد ءَ بیت ، وہدے وجود بیت۔چو کہ وجود پیشبند (precedence)اِنت۔ اے درگت ءَ نفر وتی راستیں زند ءِ نیمگا ہما وہد ءَ سفر کنت ، اگاں اے سفر ءِ امکاناں ہلاس مہ کنت ءْ ربیت ءِ ازلی بوہگ ءَ ہمے بنیاد ءَ چیلنج بکنت۔
انسان ءِ راستیں زند ءِ نیمگا سفر کنگ ءِ یک راہ یے ہمیش اِنت کہ ازلی بوہگ (certainty) ءَ ہلاس بہ کنت ءْ امکان ءَ برجاہ بداریت۔دومی اِیش اِنت کہ ائی ءَ اے وڑ پمیشکا کنگی اِنت کہ آئی ءِ جند (وجود) ربیت (جوہر) ءَ چہ پیش اِنت۔بلے اے سفر نفر ءَ ایوک ءَ گوازینگی اِنت۔
وہدے ائیءَ چہ وتی وجود ءِ شبند کنگ ءَ دگہ یکے ءِ راہ گِپت، گڑا اے عمل ءِ پدا جوہر پیش ءْ مقدم بیت۔پرچہ کہ نفر ءِ اے گام ءَ چہ وجود پہ ذات (being in itself) وجود پہ دِگر (being for other) ءِ تہا بدل بیت۔وہدے کسے وتی وجود ءَ دِگر ءِ وجود ءِ وڑا کنت ، گڑا اے ائی ءِ جند ءِ وجود ءِ بیگانگی بیت۔راجمانی زانت ءِ رِد ءَ ما ہائیڈیگر ءِ گپ ءَ اے وڑ پہم اِت کنیں کہ ربیت بوت کنت راجمان ءِ جوہر اِنت ، بلئے اے جوہر پمیشکا اَست اَنت کہ وجود اَست۔
وجود ءَ اَست بوہگ ءَ جوہر ءِ وجود ممکن کْتگ۔بزاں نفر اَست ربیت اَست۔اے بنیاد ءَ نفر (وجود) چہ ربیت (جوہر) ءَ پیش ءْ مقدم اِنت۔ نفر ربیتاں وہدے بہ بندیت ءْ ایشاں تعین بکنت، اے وجود ءِ زوال بیت کہ تعین کنگ ءَ چہ امکان ہلاس بیت۔گڑا اے وڑا رِدیں وجود ءِ یکشلی یا سلسلہ بندان بیت کہ رِدیں وجود محکم نہ اِنت۔ بلئے چو ہم نہ اِنت کہ انسان بیرگ ءَ ایوک اِنت۔
اگاں ا بیرگ ءَ ایوک بہ بیت گڑا امکان ہلاس بنت۔اگاں امکان ہلاس بہ بنت گڑا نفر ءِ گورا گچین ہلاس بنت۔چو کہ پہ راستیں وجود ءَ المی اِنت ، ائی ءِ گورا گچین ءِ طلب نمیران بہ بیت۔
اگاں چو مہ بیت گڑا جوہر پیش ءْ مقدم بیت۔ پہ امکان ءِ بوہگ ءَ ہائیڈیگر گْشیت وجود ہم وجود ئیگ اِنت۔دانکہ تئی گورا دگہ انسان مہ بیت بزاں تئی گورا امکان ہم نہ بیت۔ اے مْچی ءِ تہا نفر ءَ وتی وجود ءِ سفر ایوکی ءَ بْرَگی اِنت۔ہائیڈیگر ہم امکان ءِ گپ ء گوں جہانیبوہگ(universality) ءِ گپ ءَ ڈالچار کنتءْ پسند ءْ گچین ءِ گپ ءَ ارزشت بَکشیت۔ ہمے وڑا کرکیگارڈ ہم۔اے دنیا ءَ وجودشناسی ہر وڑیں ڈنی ایراد ءْ زرو ءِ رَد اِنت۔
وجود شناسی ازلی بوہگ ءِ بیرگی ءَ پْروشَگَ ءَ اِنت بلے گچین ءِ گنجیں بیان (meta narrative) ءَ بندگ ءَ اِنت۔ساختخ ءِ گورا نفر پمیشکا کامل ءَ نیستی (nothing) اِنت، پرچہ کہ آئی ءِ گورا بیرگ ءَ شبند ءْ تعین بوہگ نیست، اے دائما گچین ءِ تہا اِنت۔ اے گچینی ایشی ءِ بدلی ءَ زاہر کنگ ءَ اِنت۔ اَستی (thing) ہما اِنت کہ آئی ءِ یک کاملیں پجارے (identity) اَست۔انسان ءِ پجار نیست۔ بیدئے ایشی ءَ کہ آیک نفرے۔
پرچہ کہ نفردائما سْد ءْ سمائی بوہگ ءَ چہ گچین کنگ ءِ تہا اِنت۔ ہر چیزے کہ آئی ءِ وجودی ساعت بدل بوہان اِنت ، گڑا آئی ءِ بیرگیں پجار چون بوت کنت؟اگاں پجار ءِ بوہگ اَستی اِنت گڑا پجار ءِ نہ بوہگ نیستی اِنت۔ پجار ءِ بوہگ وجود پہ ذات اِنت ءْ پجار ءِ نہ بوہگ وجود گوں ذات (being with itself) اِنت۔