اسلام آباد: ایرانی وزیر خارجہ جواد ظریف موجودہ حکومت کے مختصر عرصے میں دوسری بار سرکاری دورے پر اسلام آباد پہنچ گئے۔
ترجمان دفتر خارجہ ڈاکٹر فیصل کی جانب سماجی رابطے کی ویب سائٹ پر ایک ٹوئٹ کی گئی جس میں ایرانی وزیرخارجہ کی وفد کے ہمراہ پاکستان آمد کی اطلاع دی گئی، دورہ پاکستان میں ایرانی وزیرخارجہ سیاسی و عسکری قیادت سے ملاقاتیں کریں گے۔
ترجمان دفتر خارجہ ڈاکٹر نے ایرانی وزیرخارجہ کی پاکستانی ہم مںصب شاہ محمود قریشی سے ہونے والی ملاقات کی تصویر بھی ٹوئٹ کی جس میں کہا گیا کہ شاہ محمود قریشی نے دفتر خارجہ میں جواد ظریف کا استقبال کیا جب کہ ملاقات میں دونوں ممالک کے درمیان تعاون بڑھانے سمیت باہمی دلچسپی کے امور پر تبادلہ خیال کیا گیا۔
ایرانی وزیر خارجہ وزیراعظم عمران خان سے بھی ملاقات کریں گے جس میں دو طرفہ سیاسی وعسکری امور، علاقائی سیکیورٹی سمیت مختلف امور پر بات چیت کریں گے جب کہ ان کی آرمی چیف جنرل قمر جاوید باجوہ سے بھی ملاقات متوقع ہے۔