باز روچ ءَ دل گشگ ءَ ات کہ وتی چاگرد ءِ چیزے حرابیاں دیم ءَ بیاراں ۔ باز حرابیاں سرا جیڑات بلئے سر پر بوہگ ءَ نہ ات کہ کجا انچیں شری یے دیم ءَ بیاراں کہ مارا آئی ءِ سرا فخر بہ بیت ۔
بلئے شریاں بگر حرابیاں یک انچین حرابی یے سرا گپ کناں کہ اے حرابی مئے وانندگیں جنین آدمانی سرا انت ۔ اے دور ءَ مئے گہار چہ چہ لوگ ءَ پہ وانگ ءَ درکپ انت جنین آدمانی وانگ دیم ءَ روگ ءَ انت ۔
زالبول یک بزگیں قومے ہرنیمگ ءَ آئی ءَ سرا زلم بوہگ ءَ انت۔آ بزگ ءَ چہ لوگ ءَ درکپگ ءِ موکل ہم نہ رسیت مئے چاگرد ءِ چم انچو حراب اِنت کہ زالبولے پہ وانگ ہم ڈن ءُُ دراں شت نہ کنت۔
لہتیں روچ ساری انچیں واکیا منی دیم ءَ بوتگ اَت ۔ چہ لینگویج سنٹر ءَ بچک ءُُ جنک یکجا در کپگ ءَ اِتاں ہمے نودربرانی ہمراہی ءَ من ہم روان اِتاں کمو دور ءَ پد مئے راہ جتا بوتاں ۔من چاراں پشت ءَ سے جنک انگت ءَ چہ نودربراں پشت کپتگ اَت ۔من ہمیشانی رند ءَ اتاں کہ باریں اے بزگانی حال چے بیت من چاراں چہ دو بچک اے جنکاں تنگ کنگ ءَ انت ۔
جنک بزگ برے اے نیمگ ءُُ برے آنیمگ ءَ وتارا رکینگ ءِ جہد کنگ ءَ اتاں ۔ہمے نیام ءَ دگہ گاڑی والا یے اتک ءُُ آئی ءَ ہمے جنکانی وتی نمبر کاگدانی سرا نبشتہ کت ءُُ آوانی سرا دور دات انت کہ بزور انت ئے ۔
من دور ہمے ندارگ ءَ چارگ اِتاں من حیران اتاں کہ مئے چاگرد اے حد تک حراب کاری ءَ گون انت ۔لہتیں رو چ ءَ پد منی ہمے نودربراں گوں پدا دوچاری بوت ۔پدا ہمے بچک جنکاں تنگ کنگءَ اِتاں ءُُ بزگیں جنکانی سر جہل اِتاں ۔ وہدے من اے چیز دیستاں داں دل ءَ گشت کہ وتی لوگ ءِ جنکاں چہ لوگ ءَ ڈن ءَ روگ نیلاں ۔
بلئے شاباش اِنت ہمے جنکاں کہ انچو جنجالی ءَ پد ہم اے احوالاں وتی لوگ ءِ مردماں نہ گش انت ۔آوانی دل ءَ ہمے ترس اِنت کہ اگاں آ اے گپاں گوں لوگ ءِ مردماں بہ کناں داں لوگ ءِ مردم آیاں چہ لوگءَ درکپگ نیل اَنت ۔ باز براں چوش ہم بوت کہ ہمے گاڑی ءُُ سائیکل سواریں بچکاں جنک گوں وت برت اَنت ءُُ داں بیگاہاں چہ لوگاں دور گار اِتاں ۔من ہمے جیڑگ ءَ اِتاں کہ مرچی اے بچک کہ اے جنکاں گوں چوش کن اَنت ۔
باندہ ہمیشانی گہاراں دگہ یک بچکے انچو گوں وت بارت ۔مرچی اگاں آ اے جنکاں بے وارءُُ تنگ کنگ ءَ اِنت باندہ دگہ یکے آئی ءِ گہارءَ انچو تنگ کنت۔ اے مئے چارگ ءَ یک انچیں حرابی یے کہ نوک ردوم زورگ ءَ اَنت ءُُ اگاں اے وئیل انوں دارگ نہ بوت دیمترا اے دارگ نہ بیت۔
اگاں مرچی اے جنکاں وانگ ءَ اے وڑ تنگ کنگ بیت داں راج ءَ یک بلائیں حرابی یے زانگ بیت پرچکہ یک زانندگیں جنین آدمے یک وانندگیں ماتے جوڑ بیت ءُُ یک وانندگیں ماتے یک زانندگیں راجے جوڑ کت کنت ۔