اے گشگ رد نہ انت کہ دود ءُُ ربیدگ ہرقومے ءِ بنی پجار اِنت۔ہمک راج ءِ وتی چیزے رسم ءُُ رواج بنت کہ ہمیشاں بلوچی ءَ دود ءُُ ربیدگ گش اَنت ۔ ربیدگانی پہازگی وَ حکومت ءِ کار اِنت کہ آوتی ربیدگی چیز ءُُ جاہ ءُُ ہندانی چارگ ءَ بہ کنت ءُُ آواں چہ پُرشت ءُُ پروش ءَ بہ رکین ایت ۔ وتی ہمادرائیں ربیدگی چیزانی پہازی ءَ بہ کنت کہ آئی ءِ دپتر ی پجار انت ۔ اے کار گوں لس مہلو ک ءَ بوت نہ کنت کہ آوتی درائیں ربیدگی شئے ءُُ ازباباں یکجا بہ کنت ۔بلئے حکومت ءُُ راجی ہما کماش ءُُ مسترکہ آوانی گوما اے کار پہ جوانی ءَ بوت کنت آاے کار ءَ پہ ڈولے کت کناں ۔
ربیدگانی ایوک ءَ ہمے روچ ءَ پیش دارگ جوان انت بلئے بلوچ ربیدگ ءَ را پرے چیزءَ نپ ءُُ سیتے نہ رسیت ۔نپ بکشی ہما وہداں بیت کہ حکومت ہمے ربیدگاں پہ مارکیٹاں بیارایت ۔ءُُ مہلوک ءَ را سوگہ بہ کنت کہ اول سراں وتی جند ءِ پجار پدادومی ،سیمی ملک۔بلئے اے کار بوہگ ءَ نہ اِنت۔ دومی مئے دود اَنت ۔
بلوچ ءَ مدام وتی دودانی پہر بندی کتگ ءُُ اے گشتگ کہ ما میار جل ، بیر گیر ، باہوٹ دار ، غیرتی ،داد بخش،ءُُ پلان پلان۔۔۔بلئے جست ہمیش اِنت کہ بلوچانی کجام ٹک ءُُ کٹم اِنت کہ ہمے دودانی پہازی ءَ کنگ اَنت ؟ منی دل ءَ اے درائیں دوداں بل کہ ایشانی بار گران اِنت چمیشاں یکے ءِ اوں بار بد بحتیں بلوچ ءِ کوپگاں گران انت۔
ربیدگانی پہازی وَ من پیسر ءَ گشت کہ حکومتی کارے ءُُ اے وہد ءِ ہمراہی ءَ بدل بوت کن اَنت بلئے دودءُُ دودمان انچیں چیزاں کہ کرنانی کرن ءَ پد اوں ہماوڑ است بنت ۔ یک بلوچے پہ وتی ربیدگاں بلوچے بوت نہ کنت بلکیں منی دل ءَ یک بلوچے پہ وتی دوداں بلوچے ۔نوں ہمے گپ ءَ وتی چپ ءُُ چاگرد ءَ بچار ءُُ بہ چکاس کہ چنچو مردم پہ حق بلوچ گشگ ءِ حق ءَ دارایت۔
دومارچ ءِ اے روچ ءَ را بلوچ راجدپتر ءَ ہچ وڑیں راستی یے نیست اِنت۔ ایشی ءِ بندات ءَ اگاں من چہ احمد اقبال ءِ وش نیوز ءِ بہ گشاں بائد کس ءَ اے گپ ءَ گوں ناتپاکی مہ بیت ۔ہما روچ ءَ کہ وش نیوز ءَ اے روچ پہ بلوچ کلچرءِ حاترا جم داشتگ اَت۔داں ہر ہما ملکءَ کہ بلوچے نشتگ آئی ءَ ہمے زانت کہ اے منی ربیدگانی روچ اِنت۔اے بدیں گپے نہ انت۔
بلکیں یک جوانیں گامگیجے کہ من ایشی ءِ ستا ءَ کناں بلئے اے بلوچ دود ءُُ ربیدگانی روچ ءِ جاہ ءَ بلوچ ربیدگانی روچ اِنت۔پرچکہ دود ہما اَنت کہ ہزاراں سال گوں بلوچ ءَ گون اَنت ءُُ ہما مردم کہ میار دار،بیرگیر،قول دار،داد بخش اِنت ہما اصل بلوچ اِنت ۔
پہ بلوچی سواس ءُُ بلوچی پاگ بندگ ءُُ مزن شلواری ءَ کس بلوچ نہ بیت۔اے درائیں چیزاں وَ یک درقومی مردمے ہم زرت کنت بلئے آ بلوچے ءِ دودءُُ دودمان ءَ ہچبر زرت نہ کنت ۔
بائد اِنت ہمے روچ ءِ وشی ءَ درائیں بلوچ ہمے جہد ءَ بہ کن اَنت کہ ربیدگانی پہازی وَ ہر حساب ءَ کنگی اِنت بلئے وتی اندر ءِ مردم کُشّگی نہ اِنت ءُُ یک بلوچے ءِ اندر ءِ مردم گوں آئی ءِ دودمان ءَ زندگ بوت کنت۔اگاں اندر ءِ مردم پہازگی اِنت داں وتی دودانی پہازی کنگی اِنت۔
عہدی بلوچاں گشتگ کہ ہر مرگ کدئے بال وت۔کس درائیں دوداں زرت بلکیں مہ کنت بلکیں پہ گنجیں دوداں یکے وَ زورگ بیت ۔انچوکہ شے مرید ءَ داد بخشی زرتگ،انچوکہ میر کمبر ءَ باہوٹی ،بالاچ ءَ بیرگیری،چاکر ءَ میار داری،جاڈو ءَ قول داری،ءُُ حمل ءَ بہادری ءِ دود داشتگ اِتاں ۔
بائد انت ہمے دوداں چہ یکے ءِ وَ بار ءَ مئے کوپگ زرت کن اَنت ۔چوہم بوت کنت کہ اے دروگ بندیں دہر ءَ انچوکہ مئے اندری مردم کشتگ ءُُ ما چہ راستی گُشی ءَ زبہر اں ہمے رنگ ءَ اے زوراکیں زمانگ ءَ مئے کوپگ اوں نزورکتگ اَنت اگاں اہو گڈاما چتور بلوچیں ؟