(5) آساپ ۔۔ سعید عزیز اللہ
اے کتاب سید ہاشمی کتاب جاہ ملیر ئَ سال 2012ئَ چھاپ کتگ۔ اے کتاب ئَ ہم چو بُرزے شون داتگیں کتاباں بلوچی زبان، لبزانک ئُُ راجدپتر ئِ باروا سرپدی نبشتانک ہوار انت۔ ’’ آساپ ‘‘ کتاب ئِ مستریں شری ایش انت کہ ایشی ئَ اہمیں بلوچی کتابانی باروا چمشانک ہوار ئُُ دومی ایشی ئِ زبان ہم سادگ انت۔اے کتاب بی اے، ایم اے، پی سی ایس ئُُ ایندگہ مقابلہ ئِ چکّاسانی نودربراں سوب مندی ئَ کمک کنت۔
(6) شہدیں بلوچی ۔۔ غفور شاد
شہدیں بلوچی غفور شاد ئِ نبشتہ کتگیں کتاب انت کہ پہ کالج ئِ نودربرانی وانینگ ئَ نبشتہ کنگ بوتگ۔ چوشکہ اے کتاب ئَ بلوچی زبانئُُ لبزانئِ باروا شریں سرپدی رس ایت پمیشا اے کتاب پہ ایم اے ، پی سی ایس ئُُ سی ایس ایس ئِ چکّاس ئَ ہم کمک کنت۔ ’’ شہدیں بلوچی ‘‘ زیمل شنگکار کیچ ئَ سال 2010ئَ چھاپ کتگ کہ ایشی ئِ تہا نبشتہ کار ئَ گیشی ہم آئورتگ۔ شہدیں بلوچی ئَ شاعری ئِ تہراناں گوں مثالاں جوانیں وڑے ئَ نبشتہ کنگ بوتگ۔
(7) راہشون (بلوچی) ۔۔ پروفیسر محمد حسن گچکی
راہشون کتاب اے درچ ئَ نوک تریں کتاب انت کہ 2019ئِ گڈی ماہ ئَ چھاپ ئُُ شنگ بوتگ۔ اے کتاب ئَ را بلوچستان بُکس سینٹر آرچر روڑ، کوئٹہ ئَ شنگ کتگ۔ اے کتاب ئَ بی اے ، ایم اے ، پی سی ایس ئُُ سی ایس ایس ئِ دراہیں تکانی باروا سرپدی است بلے ایشی ئِ زبان ئُُ بیانئِ ردی(پروف) گرگ نہ بوتگ انت پمیشا واناک نہ انت۔ اے کتاب ئِ یک شرّی یے ایش انت کہ بلوچی ئِ چھاپ بوتگیں کتابانی لڑ دیگ بوتگ کہ اودا چھاپ ئِ سال، شنگکارئُُ ایدگہ سرپدی ہوار انت۔ دومی شرّی ایش انت کہ کتاب ئِ گڈ سر ئَ جُست نامگ ئِ بہر مان گیجگ بوتگ کہ لبزانکی ئُُ راجدپتری سرپدی ہوار کنگ بوتگ انت۔ جُست نامگی بہر ئَ مزنیں نزوری یے گندگئَ کئیت کہ باید انت دومی چھاپ ئَ اے ردی در کنگ بہ بنت۔
(8) بُنزہ ۔۔ مجاہد بلوچ
بُنزہ کتاب ئَ بلوچی زبان، لبزانک ئُُ راجدپتر ئِ باروا جُست ئُُ آہانی پسو دیگ بوتگ انت ۔ جُست نامگ (Objective Questions) ہما جُست ئَ گوش انت کہ آہانی پسو کسان ئُُ یک ئُُ ٹِک (To the point) بہ بیت۔ کساس دراہیں چکّاساں لہتیں ہمے وڑیں جُست نامگ ہوار انت۔ مجاہد بلوچ ئَ چہ ایم اے بلوچی ئِ گوستگیں سالانی پیپراں اے جُست نامگ جوڑ کتگ انت ئُُ کتابی دروشم ئَ رد ئُُ بند داتگ ۔ اے کتاب اولی بر ئَ 2013ئُُ دومی بر ئَ 2015ئَ یونیورسٹی بُک پوائنٹ کوئٹہ ئَ چھاپ کتگ۔ بُنزہ کتاب پہ بی اے، پی سی ایس ، سی ایس ایس ئُُ خاص این ٹی ایس (NTS) ئِ چکّاس ئَ مزنیں کمکے کنت۔ اے کتاب ئَ بلوچ راجدپتر، دود ئُُ ربیدگ، زبان
شناسی ، ردانک، شاعری ئُُ شرگداری ئِ باروا سرپدی رس ایت۔
(9) جُست ئُُ پسو ۔۔۔ موسی امیت
اے کتاب ہم ایم اے بلوچی ئُُ این ٹی ایس چکّاس ئِ سوب مندی ئَ جُست ئُُ پرسی (Objective)رنگ ئَ رد ئُُ بند دیگ بوتگ۔ گوستگیں سالانی بلوچی مضمون ئِ چکّاس ئِ پیپرانی جُست یکجاہ کنگ ئُُ کتابی دروشم ئَ چھاپ کنگ بوتگ۔ اے کتاب ازم کار لبزانکی گل پسنی ئَ سال 2015ئَ چھاپ ئُُ شنگ کتگ۔ کتاب ئَ زبان، لبزانک ئُُ دود ئُُ ربیدگ ئِ سرحالانی باروا جُست ئُُ آہانی پسو ہوار انت۔
(10) پسّو جُستانی بروَرد۔۔ برکھا بلوچ
چوناہا اے کتاب ہم چو ’’ بُنزہ ‘‘ ئُُ ’’ جُست ئُُ پسو ‘‘ ئِ وڑیں کتابے بلئے اے کتاب ئَ راجدپتر، لبزانک، وہد ئُُ موسم، مچکدگ، تیاب، موسیک ئُُ تامُر ئِ باروا جُستانی پسّو ہوار انت۔ برکھا بلوچ ئِ کتاب سچکان پبلی کیشنز ئَ سال 2016ئَ چھاپ کتگ۔ اے کتاب ہم پہ این ٹی ایس ئُُ ایندگہ Objectiveوڑیں چکّاس آں سوب مندی ئَ کمک کنت۔
اے دہیں (۱۰) کتاب پہ خاص بلوچی مضمون ئِ چکّاس ئَ سوب مندی ئِ کمک کنگ ئَ نبشتہ ئُُ چھاپ کنگ بوتگ انت۔ بلئے ایشاں ابید دگہ ہم بازیں کتاب چھاپ بوتگ کہ آ بلوچی لبزانکی تہر ئُُ لبزانتانی باروا سرپدی دینت۔ چرے کتاباں بلوچی زبان ئَ ردانک ئِ تہراں ڈاکٹر عبدالصبور بلوچ ئِ ’’ بلوچی قصہی لبزانک ‘‘، شرف شاد ئِ ’’ لبزانک، در کسہی لبزانک ئُُ شعر ‘‘، اے آر ۔ داد ئِ ’’ در کسہی لبزانک ‘‘ ئُُ ’’ لبزانکی گالبند‘‘ سنگینیں ئُُ شریں کتاب انت۔
ہمے وڑا شاعری ئِ تہرانی باروا سرپدی ئیں کتاب صبا دشتیاری ئِ ’’ گُلکار ئُُ چَکنکار ‘‘، ڈاکٹر رحیم بخش مہر ئِ ’’ بلوچی دستونک ‘‘ ، اکبر غمشاد ئِ ’’ بلوچی نوکیں نظم ‘‘ ئُُ اثیر عبدالقادر شاہوانی ئِ ’’ بلوچی شاعری ئِ دراہیں دروشم ‘‘ سرپدی دینت۔ بلوچی لبزانک ئِ تہر، لبزانت ئُُ دود ئُُ ربیدگ ئِ باروا اردو زبان ئَ ’’ ثفافت وادی بولان میں ‘‘، سید ظہور شاہ ہاشمی ئِ ’’ بلوچی زبان و ادب کی تاریخ ‘‘، شیر محمد مری ئِ ’’ بلوچی زبان و ادب کی تاریخ ‘‘، ڈاکٹر زینت ثناہ ئِ ’’ بلوچی ادب میں تنقید نگاری ‘‘ ئُُ پناہ بلوچ ئِ کتاب ’’ بلوچی ادب (ایک تاریخ۔ ایک تسلسل) چھاپ ئُُ شنگ بوتگ انت۔
بلوچی لبزانک ئِ باروا انگریزی زبان ئَ چوشیں خاصیں کتاب وَ چھاپ نہ نیست بلئے سردار خان بلوچ ء، Literary History of Balochiesئُُ جان محمد دشتی ئِ The Cultural Heritageانچیں کتاب انت کہ شریں سرپدی دینت۔ ایشاں ابید دگہ ہم بازیں کتاب است انت کہ آہانی نام گرگ نہ بوتگ بلئے اگاں کسے وتی چکاس ئِ سوب مندی ئَ ابید گوں لبزانک ئَ مہر ئُُ حُبے دار ایت گڈا پرائی ئَ اے کتاب ہم گنج انت۔