چین ءَ بندات بوتگیں نادراہی کہ سرجمیں دنیا ءَ یک شل ءَ پتاہانءُُ روان اِنت ءُُ ایشی ءِ گر ءُُ دار ءِ ہچ پیمیں درمانے ءِ انگت ءَ سائنس جوڑ کنگ ءَ بے سوب بوتگ۔ ہمے وائرس ءِ نادراہی ءَ بیران بوتگیں مردمانی کچ سداں گوستگ ءُُ ہزاراں سر اِنت۔ کم کم ءَ اے نادراہی سرجمیں دنیا ءَ شنگ بوہان اِنت۔یکے وَ مردم ء َ را ہمے نادراہی ءَ پریشان کتگءُُ کس گردگی نہ اِنت۔ دومی چاگردی رسانک درءَ چد ءُُ گیشتر مردم وہمی کتگ۔
انوں کہ چاگردیب رسانک در ءَ کہ پچ کنے گڑا بید ئے ہمے کورونا ءَ دگہ ہچی نیست اِنت۔ ڈاکٹرانی گشگ اِنت کہ ایشی ءِ یک مردمے ءَ را گرگ ءِ چاردہ پانزدہ روچاں پد اثر کیت اِنت بلئے سوشل میڈیا ءَ انچیں ویڈیو پیشدارگ بیت کہ ہمے یکیں سہتے کہ اے وائرس مردم ءَ گپت ہما دمان ءَ کشیت۔ ڈاکٹر گشنت کہ اے نادراہی سد ءِ تہا دہ مردم ءَ را بوت کنت بلئے سوشل میڈیا سد ءِ تہا ایوک ءَ دہ مردم رک اِت کنت۔
ڈاکٹر انی گوشگ اِنت کہ اے نادراہی ءَ را بنی آدم ءِ جند تہ وت مڑ اِت کنت ءُُ ایشی ءِ نود ءُُ ہشت درسد گمان است اَنت کہ اے نادراہی مردم ءَ را مہ بیت ایوک ءَ دو درسد گمان کنگ بوت کنت بلئے سوشل میڈیا ءَ دو درسد رکگ ءِ گمان ءُُ نود ءُُ ہشت درسد نادراہی ءِ گمان کنگ بوتگ۔ اے پیمیں گمان ءُُ ردبیانی ءَ چہ مردمانی دل ءَ اے نادراہی ءِ انچیں ترس ءُُ بیمے نشتگ کہ آ ہچ پیم ءَ گر ءُُ دار بوت نہ کنت۔
بلوچستان ءِ وزیر تعلیم سردار یار محمد رند ءَ سرجمیں ماہ ءَ درائیں وانگیاں موکل ءِ جار جتگ۔ اے جار جنی یک حساب ءَ جوان اِنت چہ زہگانی اے نادراہی ءِ رکینگ ءَ بلئے دومی نیمگ ءَ مردم ءِ دل ءَ گمان بیت اے بلائیں نادراہی یے پمشکا اے موکل دئیگ بوتگ اَنت۔ بلئے ایوک ءَ وانگی ادارگانی بند ش ءَ اے نادراہی رک اِت نہ کنت پرچکہ ہما زہگ کہ اسکول ءُُ کالج یاکہ یونیورسٹیاں وَ نہ رونت بلئے ڈن ءُُ دراں وَ گرداں،بازاراں رونت، لئیب ءُُ گوازی وَ بیت۔
یاکہ ہما ورنا کہ پہ نوکر ی ءِ شوہاز ءَ ٹیسٹ ءُُ انٹریوہاں دزگٹاں آوانی چے سوڈگ اِنت۔ بلوچستان پبلک سروس کمیشن ءِ دفتر ءَ دان روچ مرچی ءَ انٹریو کنگ بوہگءَ اِنت اے زانہ لاوارث اِنت۔ کمیشن ءِ گیٹ ءِ دپ ءَ سدانی حساب ءَ مردم پہ وتی انٹریو ءَ مچ اَنت پریشاں ہچ وڑیں گر ءُُ دارے نیست اِنت۔ بل ایشی ءَ بگر آئی ءَ کہ ہما زاہرین کہ چہ ایران ءَ اتکگ اَنت۔
آ درستانی ماں کوئٹہ ءَ دارگ ءِ سبب چے اِنت؟؟؟ یک ترسے کہ سوشل میڈیا ءَ مردمانی دل ءَ نادینتگ ایشی ءِ گیشتر ترس ہمے زاہرین انت بائد اِنت بلوچستان حکومت ءَ اے پنجاب ءُُ لاہوراں یاکہ کراچی ءَ روان داتین اَنت پرچکہ آ ملک ءِ جوانیں ڈاکٹر ءُُ درمانے است انت بلوچستان ءَ چے است کہ ایشانان بلوچستان ءَ داشتگ؟؟؟؟ چریشی ءَ اے پدر انت کہ بلوچستان ءَ لاوارثیں دمگے کہ ایشی ءِ جست کنوک نیست اِنت۔
ہما نادراہ جاہ کہ پہ کرونا ءِ نادراہاں گچین کنگ بوتگ بزان شیخ زاہد نادراہ جاہ ءِ درائیں ڈاکٹر درکپتگ اَنت کہ ادان ہچی پہ علاج ءَ نیست اِنت گڑاں بلوچستان حکومت ءَ چے دیست ءُُ اے نادراہ کوئٹہ ءَ داشتگ اَنت۔ حکومت بائد اے بابت ءَ سنگین بہ بیت اے مردماں زوتاں چہ زوت پنجاب ءُُ سندھ ءَ روان بہ دنت پرچہ اے وت ہمود ءِ مردم اَنت۔ ایشانی اداں دارگ بلوچستان ءِ مردماں گوں ناجاہی یے۔ہما نادراہی ءِ کہ گمان انت آئی محکمی ءَ وت ہمے مردم کن اَنت۔