صوابی: وفاقی وزیر مراد سعید نے کہا ہے کہ عمران خان دنیا کی آنکھ میں آنکھ ڈال کر بات کرتے ہیں۔وفاقی وزیر مراد سعید نے صوابی میں جلسہ عام سے خطاب کرتے ہوئے کہا کہ وزیر اعظم عمران خان نے ناموس رسالتﷺ پر تمام عالمی فورمز پر بات کی ہے اور وزیر اعظم نے غریب اور تنخواہ دار طبقے کا سوچا۔

انہوں نے کہا کہ عمران خان دنیا کی آنکھ میں آنکھ ڈال کر بات کرتے ہیں اور وزیر اعظم نے غریب طبقے کی فلاح کے لیے متعدد اقدامات کیے جبکہ خیبر پختونخوا کی تمام آبادی کو ہیلتھ کارڈ فراہم کیے۔

مراد سعید نے کہا کہ پنجاب کے بھی تمام شہریوں کو ہیلتھ کارڈ دیئے جائیں گے اور دسمبر تک پنجاب کے شہریوں کو ہیلتھ کارڈ مل جائیں گے۔

انہوں نے کہا کہ سال 2013 میں پاکستان تحریک انصاف (پی ٹی آئی) کو دہشت گردی سے تباہ صوبہ ملا تھا۔ ماضی کی حکومتوں نے بجلی کے مہنگے معاہدے کیے اور ماضی کی حکومتوں کے معاہدوں کی وجہ سے آج بجلی استعمال ہو یا نہ ہو پیسے دینے پڑتے ہیں۔ ان کے دور میں کورونا وائرس آتا تو یہ اس کی ویکسین پر بھی کمیشن لیتے۔

اپوزیشن پر تنقید کرتے ہوئے وفاقی وزیر نے کہا کہ شوگر ملز عمران خان کی نہیں شریفوں اور زرداری کی ہیں اور اگر انہیں عوام کا احساس ہے تواحتجاج نہ کریں بلکہ اپنی ملز سے چینی سستی کر دیں۔