بی۔ایس۔او ءُُ بی۔ایس او (پجار)ءِ نیمگ ءَ مرچی بلوچستان یونیورسٹی ءِ شہ دروازگ بند کنگ بوتگ انت۔ہمے زہرشانی ءَ امتحان ہم مہتل دارگ بوتگ انت۔
گیشیں حالانی ردءَ مرچی بی۔ایس۔او ءُُ بی۔ ایس۔او (پجار) ءِ ورناہاں بلوچستان یونیورسٹی ءِ مزنیں دروازگ بند کتگ انت ءُُ زہرشانی کتگ۔دروازگانی بند بوہگ ءَ ناں تہے مردماں ڈنءَ دراتک کتگ ءُُ ننکہ ڈنءِ مردماں تہا شت کتگ۔حالانی ردءَ یونیورسٹیءِ وائس چانسلر ہم چہ مزنیں دروازگ ءَ روگءَ دارگ بوتگ۔ادا اے گپ زانگی انت کہ اے وہدءَ یونیورسٹی ءَ مڈٹرم ءِ امتحان بوہگ ءَ انت۔دروازگانی بند کنگ ءَ مرچیگیں پیپر بوت نہ بوتگ انت۔
بی۔ایس۔او ءِ ورنا انگت یونیورسٹی ءِ گیٹ ءِ دپ ءَ نشتگ انت۔آہاں مرچی بیگاہءَ پریس کانفرنس کتگ ءُُ گوشتگ کہ تانکہ آوار جتگیں ورنا آرگ نہ بنت،آہچ وڑا گیٹاں بوجگ ءَ نیل انتءُُ تما وہدءَ یونیورسٹیءَ امتحاناں ہم نیل انت۔مکتبیانی گوشگ انت انتظامیہ بگوش ایت کہ اے ورنا چہ ہاسٹل ءِ تہا کیا ءُُ پرچہ برتگ انت؟ورناہانی گوشگ انت کہ انتظامیہ گوش ایت کہ اے ورناہانی آوار جنگ ءِ وہد ءَ ہاسٹل ءِ سی۔سی۔ٹی کیمرہ حراب بوتگ انت پمیشگہ زانگ نہ بیت کہ ورنا کیا برتگ انت؟بی۔ ایس۔اوءِ ورناہانی پریس کانفرنس ءَ گوشگ ات کہ دانکہ آوار جتگیں ورنا آرگ نہ بنت،یونیورسٹیءِ دروازگ بوجگ نہ بنت ءُُ ننکہ امتحان ءِ اجازت دیگ بیت۔پریس کانفرنس ءَ پد یونیورسٹی ءِ رجسڑارءَ نوٹیفیکیشنے شنگ کتگ کہ بانداتیگیں امتحان مہتل دارگ بوتگ انتءُُ داں نوکیں جارے ءَ یونیورسٹی بند مان ایت۔