26 ویں آئینی ترمیم کی منظوری اور موجودہ سیاسی صورتحال وزیراعظم شہباز شریف کے لیے بڑا چیلنج بن گئی، وزیراعظم نے دولت مشترکہ کے سربراہ اجلاس میں شرکت کا فیصلہ ترک کردیا۔

وزیراعظم شہباز شریف نے دولت مشترکہ کے سربراہ اجلاس میں شرکت کے لیے منگل کو سموعہ کے لئے روانہ ہونا تھا

سموعہ میں دولت مشترکہ کے سربراہان حکومت کا اجلاس 24اور25 اکتوبر کو ہونا ہے، ڈان نیوز کے مطابق اب وزیراعظم کے بجائے وزیرخارجہ کی جانب سے پاکستانی وفد کی نمائندگی کرنے کا امکان ہے، 26ویں آئینی ترمیم کا مرحلہ مکمل ہونے کی صورت میں وزیرخارجہ اسحاق ڈار آج رات سموعہ کے لئے روانہ ہوں گے۔

واضح رہے کہ 26ویں آئینی ترامیم کے لیے قومی اسمبلی اور سینیٹ کے اجلاس آج طلب کیے گئے ہیں جب کہ وزیراعظم شہباز شریف کی زیر صدارت وفاقی کابینہ کا اجلاس ہوگا جس میں آئینی ترامیم کی منظوری دی جائے گی۔

یاد رہے کہ مسلم لیگ (ن) کی حکومت گزشتہ ماہ سے ایک اہم آئینی ترمیم کی منظوری کو یقینی بنانے کے لیے کوششیں کر رہی ہے تاہم آئینی ترمیم کے لیے درکار دو تہائی اکثریت کے لیے ارکان کی تعداد پوری نہ ہونے کے باعث گزشتہ ماہ سے آئینی ترمیم کو منظور کرانے کی کئی حکومتی کوششیں ناکام ہوچکی ہیں۔