وفاقی وزیرداخلہ محسن نقوی نے سائبرکرائمز کی روک تھام اور انسانی سمگلنگ میں ملوث مافیا کے خلاف ملک بھر میں موثر کریک ڈاؤن کا حکم دے دیا۔

ذرائع کے مطابق وزیر داخلہ محسن نقوی سے ڈی جی ایف آئی اے رفعت مختار راجہ اور ڈائریکٹر جنرل نیشنل سائبر کرائم انویسٹیگیشن ایجنسی وقارالدین سید کی اسلام آباد میں ملاقات ہوئی، ملاقات میں وفاقی وزیرداخلہ نے ڈی جی ایف آئی اے کو غیر قانونی امیگریشن کے خلاف موثر حکمت عملی تیارکرنے کا ٹاسک سونپ دیا۔

ذرائع نے بتایا کہ ملاقات کے دوران وفاقی وزیرداخلہ محسن نقوی نے سائبرکرائمز کی روک تھام کے لیے ڈی جی این سی سی آئی اے کو ہدایات دیں اور انسانی سمگلنگ میں ملوث مافیا کے خلاف ملک بھر میں موثر کریک ڈاؤن کا بھی حکم دیا۔

وزیر داخلہ محسن نقوی نے کہا کہ انسانی سمگلنگ روکنے کے لئے چاروں صوبوں میں بلا امتیاز کارروائی عمل میں لائی جائے۔ اس مافیا سے آہنی ہاتھوں سے نمٹا جائے۔

ان کا کہنا تھا کہ مکروہ دھندے میں ملوث لوگ معصوم لوگوں کی جانوں سے کھیل رہے ہیں۔ وزیر داخلہ نے واضح کیا کہ انسانی اسمگلرز کسی رعایت کے مستحق نہیں ہیں۔

وزیر داخلہ نے مزید کہا کہ ایف آئی اے سمیت تمام قانون نافذ کرنے والے اداروں کو ملک سے غیر قانونی سپیکٹرم اور منظم جرائم کے خاتمے کیلئے ملکر کام کرنا ہو گا، سائبر سیکیورٹی ایک نیا چیلنج ہے۔

محسن نقوی کا کہنا تھا کہ این سی سی آئی اے کی استعدادکار بڑھائی جائے گی اور افسروں کو تربیت کے لئے بیرون ملک بجھوایا جائے گا۔