چیئرمین پاكستان علما كونسل علامہ طاہر محمود اشرفی کا کہنا ہےکہ سعودیہ عرب کے ساتھ معاہدہ پوری دنیا میں امن کا ضامن بنےگا، ہماری فوج سعودی عرب کے ساتھ مل کر حرمین شریفین کا دفاع کرےگی۔
لاہور میں تقریب سے خطاب کرتے ہوئے علامہ طاہر محمود اشرفی کا کہنا تھا کہ یہ اعزاز اللہ نے صرف پاکستان کو دیا ہے، یہ معاہدہ بہت واضح ہے اگر پاکستان پر حملہ ہوگا تو سمجھا جائے گا کہ حملہ سعودی عرب پر ہوا ہے۔
علامہ طاہر محمود اشرفی کا کہنا تھا کہ جن لوگوں کو اس معاہدے سے تکلیف ہور ہی ہے ان کو کیا مسئلہ ہے، وہ اس قوم کو ایک ہوتا ہوئے دیکھ نہیں سکتے۔
ان کا کہنا تھا کہ کسی نے سوچا بھی نہیں تھا کہ قطر کے اوپر بھی بمباری ہوجائےگی، جب بھارت نے ہم پر حملہ کیا تو دنیا خاموش تھی، پاکستان پر بھارت اور اسرائیل نے مل کر حملہ کیا تھا۔
علامہ طاہر محمود اشرفی نےکہا کہ وزیر اعظم فلسطین کانفرنس میں امت کا موقف پیش کریں گے، فلسطین کا وفد امریکا نہیں جا سکتا تو شہباز شریف فلسطین کا وفد ہے۔
انہوں نے مزید کہا کہ افغانستان ہمارا بھائی ہے لیکن ان سے شکوہ تو کرنا بنتا ہے، افغانستان کی سرزمین سے آکر کوئی خون بہائے تو گلہ تو بنتا ہے۔