اسلام آباد: عالمی مارکیٹ میں خام تیل کی قیمت میں ریکارڈ کمی کے بعد اوگرا نے بھی آئندہ ماہ کے لئے پیٹرولیم مصنوعات کی قیمتوں میں 15 روپے تک کمی کی تیاریاں شروع کردی ہیں۔ اوگرا نے عالمی مارکیٹ میں خام تیل کی قیمتوں میں کمی کے تناظر میں آئندہ ماہ کے لئے پیٹرولیم مصنوعات کی قیمتوں میں ردو بدل کی سمری تیار کرلی ہے ۔ حکام کے مطابق پیٹرول کی قیمت میں 10 روپے 37 پیسے فی لیٹر، ہائی اسپیڈ ڈیزل 15 روپے فی لیٹر ، ہائی آکٹین کی قیمت 9 روپے ، مٹی کا تیل اور لائٹ ڈیزل 8 روپے 11 پیسے فی لیٹر سسستا کرنے کی تجویز دی گئی ہے۔ پیٹرولیم مصنوعات کی قیمتوں میں کمی کی سمری 27 جنوری کو وزارت پیٹرولیم کو بھیجی جائے گی جہاں سے اسے وزارت خزانہ کو بھیجا جائے گا۔ 31 جنوری کو نئی قیمتوں کا نوٹی فکیشن جاری کیا جائے گا۔ واضح رہے کہ عرب مارکیٹ میں خام تیل کی قیمت 13 برس کی کم ترین سطح  22 ڈالر فی بیرل کی سطح پر آچکی ہے۔