• شہید وت شر انت۔ شہمیر ءِ معنا شہید نه اِنت. شہمیر ءِ معنا میرانی شاه، میرانی بادشاه بزاں مزنیں میر. انچو گندئے شہپریگ(شه پری) ءِ معنا مزنیں پری یا پریگانی شاہ۔ شاہ ءِ معنا بادشاہ۔ شہمیر ءِ معنا میرانی مستر یا مزنیں میر۔

دگه لہتے مردم په شہید ءَ “نمیران” ءِ لفظ ءَ کارمرز کنت. منی دل ءَ اے ہم شرّ نه اِنت. نمیران ہما اِنت که دائم زندگ اِنت. انگریزی ءَ” Immortal ” اِنت، ہندی ءَ “اَمَر” اِنت. چُوشیں بازیں مردمے است که شہید نه بیتگ انت بلئے نمیران اَنت. بلوچی ءِ شاعری ءَ عطا شاد نمیران اِنت بلئے شہیدے نه اِنت.
شہید رجانک نه لوٹیت. شہید وت شرّ اِنت. اداره، ریاست، سیاست، سائنس، ثواب، ایمان، پیزا، برگر، جگ، گلاس، وَت شرّ اَنت. رجانک نه لوٹنت.

دگہ گپے اِش اِنت کہ اِینچو رجانکاری دنیا ءِ ہچ زبان نہ کنت،بیدکہ مئے ہمے چیزے مردم ءَ. مئے کش ءُ گْور ءِ زباناں بچار، سِندھی اِنت، پشتو انت، پنجاپی انت، اُردو انت، پارسی انت، کس لفظاں اِینچو رجانک نه کنت . انگریزی ءِ جند انت، انگریزی دنیا ءِ دیما تریں زبان انت، انگریزی ءِ تہا کسّ ءَ نئیشکتگ کہ لفظے رجانک کتگ۔ انگریزی بِہ رجانک نہ کنت، ہمائی ءِ جند ءَ زیریت، توار ءَ ئِے بدلینیت وتی حساب ءَ، بلئے رجانک مجانک نہ کنت. بچار پرسنٹ (Percent)ءِ لفظ انت، پرسنٹ لاطینی للفظے، پر (Per) ءِ معنا انت “تہا”، سنٹ (Cent) ءِ معنا انت”سد”، نی انگریزی اگاں بگشیت Three In Hundred,بیت کنت، آ کت ئِے کن انت، بلئے نہ کن انت ئِے۔ Three Percentاِش زرتگ، پرسنٹ لاطینی لفظے، بلئے رجانک اش نہ کتگ۔۔
اِشی ءَ ابید، اے سائنسی زبان ہرچی کہ است انت انگریزی ءَ، انگریز اِش کارمرز کن انت، سائنسی گالبند دْرست لاطینی ءُ یونانی انت. انگریزانی کرّا زبانزانت است، زرّ ءُ زور ئے است بلئے اے گالبندان رجانک نه کن انت.
من حیران آں. دگہ زبان دگہ راہے ءَ روان انت، مئے مردم نشتگ ءُ بے سریں لفظ تراشنت و بلوچی ءَ جِنّی زبانے کنگا اَنت!