سندھ ہائیکورٹ نے سابق صدر عارف علوی کی 20 دن کے لئے حفاظتی ضمانت منظور کر لی۔

سابق صدر عارف علوی نے گرفتاری کے خوف پیش نظر حفاظتی ضمانت کے لیے سندھ ہائیکورٹ سے رجوع کیا جس پر عدالت نے ان کی 20 دن کے لئے حفاظتی ضمانت منظور کر لی۔

درخواست گزار نے عدالت کو بتایا کہ پرامن احتجاج کے باوجود مختلف شہروں میں دہشت گردی ایکٹ سمیت سنگین دفعات کے تحت مقدمات درج کئے گئے ہیں، سندھ پولیس کو گرفتاری اور نام نامعلوم ایف آئی آرز میں شامل کرنے سے روکا جائے۔

عدالت نے 3 مقدمات میں عارف علوی کی ضمانت منظور کرتے ہوئے 50 ہزار روپے کے مچلکے جمع کرانے کا حکم بھی دیا۔

عارف علوی کے خلاف میانوالی ،ٹیکسلا اور راولپنڈی میں مقدمات درج ہیں ۔

عدالت نے ریمارکس دیئے کہ کیس کی مزید سماعت کیلئے معاملہ آئینی بینچ کو بھیجا جارہا ہے ، مقدمات کی تفصیلات طلب کرنے سمیت دیگر معاملات آئینی بینچ دیکھے گا۔