وفاقی وزیر صحت سید مصطفیٰ کمال نے کہا ہے کہ پاکستان میں صحت کے شعبے میں معیاری اور موثر تحقیق ہو رہی ہے، لیکن اصل چیلنج اس تحقیق کو عملی پالیسیوں اور زمینی سطح پر بہتری میں تبدیل کرنے کا ہے۔

ڈان نیوز کے مطابق ہفتے کے روز کراچی میں گیٹس فارما کے آڈیٹوریم میں ہیلتھ ریسرچ ایڈوائزری بورڈ (ہیلتھ ریب) کے زیر اہتمام چھٹی انٹرنیشنل میڈیکل ریسرچ کانفرنس (آئی ایم آر سی) سے خطاب کرتے ہوئے وفاقی وزیر صحت نے کہا کہ ہمیں باتوں سے نکل کر عمل کی طرف جانا ہوگا، صحت کے مسائل کا حل ٹیکنالوجی اور موبائل ہیلتھ سلوشنز میں ہے۔

مصطفیٰ کمال نے کہا کہ حکومت ہر شہری کے قومی شناختی کارڈ نمبر کو اس کا میڈیکل ریکارڈ نمبر بنانے کے منصوبے پر کام کر رہی ہے تاکہ صحت کے ڈیٹا کو ڈیجیٹلائز کیا جا سکے۔

وفاقی وزیر صحت مصطفیٰ کمال نے اعتراف کیا کہ اگرچہ پاکستان ایک ایٹمی طاقت ہے، مگر بدقسمتی سے ہم بنیادی صحت کے اشاریوں، خاص طور پر پولیو جیسے مسئلے پر پیچھے ہیں، انہوں نے کہا کہ مجھے ڈر ہے کہ کہیں افغانستان ہم سے پہلے پولیو کا خاتمہ نہ کر لے، ہم چاہتے ہیں کہ پاکستان اور افغانستان مل کر اس بیماری کا خاتمہ کریں۔

وفاقی وزیر صحت نے کہا کہ وہ اسلام آباد واپس جا کر ہیلتھ ریسرچ ایڈوائزری بورڈ اور دیگر اداروں سے تمام تحقیقی رپورٹس طلب کریں گے اور ان پر عمل درآمد یقینی بنائیں گے۔