آزاد کشمیر: چیئرمین تحریک انصاف عمران خان کا کہنا ہے کہ وزیراعظم نوازشریف نے پانامالیکس پر 3 بار قوم سے خطاب کیا لیکن انہوں نے صرف طوطامینا کہانی کے علاوہ کچھ نہیں بتایا۔ بھمبر میں جلسے سے خطاب کرتے ہوئے عمران خان کا کہنا تھا کہ گزشتہ 3 سال میں نواز حکومت نے 5 ہزارارب روپے قرضہ لیا، حکومت نے آئی ایم ایف سے قرضے لے کر قوم کو غلام بنا رکھا ہے اورحکمرانوں نے یہ قرضے عوام کے لئے نہیں بلکہ اپنے لیے لئے ہیں۔ ان کا کہنا تھا کہ پاناما لیکس ہم لے کر نہیں آئے بلکہ یہ اللہ تعالی کی طرف سے پکڑ ہے، وزیراعظم نوازشریف کے حالات بہت خراب ہیں جنہیں اپنی کرپشن چھپانے کے لئے مولانا فضل الرحمان کی ضرورت پڑ گئی، حکمران پیسہ چوری کرکے باہر بھیجتے ہیں اور پھر اسمبلی میں آکرجھوٹ بولتے ہیں۔ چیئرمین تحریک انصاف کا کہنا تھا کہ وزیرخزانہ اسحاق ڈار نے کہا تھا کہ پاکستانیوں کے 200 ارب ڈالر سوئٹرز لینڈ کی بینکوں میں پڑا ہے اگر وہ پاکستان میں آجائے تو ہمیں قرضوں کی کوئی ضرورت نہیں لیکن جب نواز شریف کا پیسہ بیرون ملک بینکوں میں ہوگا تو سوئٹرزرلینڈ کا پیسہ کس طرح پاکستان آئے گا۔ انہوں نے کہا کہ وزیراعظم نوازشریف نے پانامالیکس پر 3 بار قوم سے خطاب کیا لیکن انہوں نے صرف طوطامینا کہانی کے علاوہ کچھ نہیں بتایا۔