ایران کے وزیر خارجہ عباس عراقچی نے کہا ہے کہ وہ ’برادر پڑوسی ممالک کے وزرائے خارجہ سے رابطہ کر رہے ہیں تاکہ واضح کیا جا سکے کہ ایران صرف اقوامِ متحدہ کے چارٹر کے تحت اپنے دفاع کے حق کا استعمال کر رہا ہے۔‘

امریکی ادارے این بی سی نیوز کے ساتھ ایک انٹرویو میں ایرانی وزیر خارجہ نے کہا کہ ’امریکہ ہمارے عوام پر حملہ کر رہا ہے اور ایسے ایران خاموش نہیں بیٹھے گا۔‘ انھوں نے کہا کہ یہ ’افسوسناک ہے کہ اہداف دوستانہ ریاستوں میں واقع ہیں۔‘

انھوں نے کہا کہ ’مجھے سمجھ نہیں آتی کہ امریکی انتظامیہ کیوں ایران کے ساتھ مذاکرات شروع کرنے پر اصرار کرتی ہے اور پھر بات چیت کے دوران ہی ایران پر حملہ کر دیتی ہے۔‘ عباس عراقچی نے کہا کہ ’یہی بات گذشتہ جون میں بھی ہوئی تھی، جس کی عمان کے وزیرِ خارجہ نے بھی اس کی تصدیق کی تھی۔‘

عباس عراقچی نے کہا کہ ’ہمیں نہیں معلوم کہ امریکہ نے ایران پر حملہ کیوں کیا۔ شاید امریکی انتظامیہ کو اس میں گھسیٹا گیا ہو۔ لیکن ایک بات مجھے معلوم ہے: ایران اُن لوگوں کو سزا دے گا جو ہمارے بچوں کو قتل کرتے ہیں۔ ہماری دشمنی امریکی عوام سے نہیں ہے، جنھیں ایک بار پھر جھوٹ بتایا جا رہا ہے۔‘