۔سید ھاشمی ریفرنس کتابجاہ ءِ ھپتمی کابینہ ءْ سلاہ کار ی کمیٹی ءِ گچین کاری

|

وقتِ اشاعت :   January 15 – 2017

ملیر کراچی سید ھاشمی ریفرنس کتابجاہ ءِ ھپتمی لس مجلسی دیوان ماں کتابجاہ ءِ ماڑی ءَ ۸ جنوری ۲۰۱۷ ءَ دارگ بوتگ۔ لس مجلسی دیوان ءِ بندات ءَ ھسابدار ءَ وتی نگدال سال ۲۰۱۶ ءِ ھساب یک پہ یک ءَ ونت ءْ باسک سئیگ کْت انت کہ کتابجاہ ء ۳ مالی جیڑہ چون انت ءْ چوں کتابجاہ ھرچ چہ رستگیں درچ ءَ گیشتر انت ءْ اگاں باسکی بِجّاری جمّ کنگ بہ بیت گڑا الم کتابجاہ ءِ مالی جیڑگ گیشوار بوت کن اَنت ۔ لس مجلسی دیوان ءَ ھسابدار ءِ اہوال ءِ سرا وتی جست کْت انت ءْ سوج ءْ سلاہ دات انت۔ ھسابدار ءِ اہوال ءَ پد لس مجلس ءِ تہ ءَ گوستگیں ۲۰۱۵/۲۰۱۶ کابینہ ءِ ۲ سال ءِ کارگشاد ءِ نگدال واجہ غلام رسول بلوچ ءَ پیش کت ءْ واجہ ءَ کتابجاہ ءِ آیوکیں وہد ءِ پیش بندی ءْ آیوکیں جیڑہانی سرا گپ جَت ءْ کتابجاہ ءِ باسک سئیگ کْت انت ۔رندا باسکانی جْستانی پَسّو دات انت۔ لس مجلس دیوان ءَ گچینکاری کمیٹی ءَ سرا تپاک کْت کہ گچینکاری کمیٹی ءِ سروک پروفیسر رحیم مہر ءْ باسک واجہ اسحاق خاموش ءْ بشیر واحد بلوچ بہ بنت۔ کتابجاہ ءِ کابینہ ءِ گوستگیں سروک ڈاکٹر پروفیسر رمضان بامری ءَ وتی گْڈی تران کْت ءْ باسکانی منت گپت ۔ استاد صبا دشتیاری ءِ مہرانی بنجل ءِ اِے سفر دیما برگءِ واستا اگدہ دارانی نوک گچین کنگ ءِ واستا ہر دو سال ءِ سرا سید ہاشمی ریفرنس کتاب جاہ ءَ گچین کاری بہ بنت۔ اے سال بزانکہ 2017 ءَ ہم 8 جنوری ءِ بیگاہ ءِ ساہت ءَ کتاب جاہ ءَ گچین کاری بوتگ ۔ گچین کاری ءَ دائمی وڑا کتاب جاہ ءِ بازیں باسکاں بہر زرتگ ات۔ گچین کاری ءِ ڈبہ پروفیسر رحیم مہر، اسحاق خاموش ءْ بشیر بلوچ ءَ وتی کوپگاں زرتگ ات۔ اِے سال ءَ گچین کاری ءَ واجہ غلام رسول بلوچ کارمستر، ڈاکٹر رمضان بامری نائب کارمستر اولی، بانک مریم بلوچ نائب کارمستر دومی، خالد بلوچ کارگشاد، جمال ناصر نائب کارگشاد، سلمان بلوچ ھسابدار، سجاد بلوچ رابطہ کار، چندن ساچ جار کش، ظریف محمود کارگس کاردار، انتظام کار کمیٹی ءَ بانک شریفہ شمبے، شرف شاد، حسن علی حسن، عبدالرؤف بلوچ، عمران ایڈوکیٹ ءْ حامد بلوچ سوب مند بوت اَنت۔ زانگ بہ بیت کہ انتظامی کار کمیٹی ءِ واستا بازیں مردماں پہ گچین کاری ءَ کاگد جم داتگ ات انت بلے گچین کاری ءَ شش مردم دیما آرگ بوتگ۔