کراچی:وزیراعلیٰ بلوچستان نواب ثناء اللہ خان زہری اور وزیراعلیٰ سندھ سید مرادعلی شاہ کے درمیان ہونے والی ملاقات میں دریائے سندھ کے پانی کی تقسیم اور استعمال کے حوالے سے دیگر حل طلب امور کو افہام و تفہیم کے ساتھ طے کرنے پراتفاق کیاگیا ہے جبکہ دونوں وزراء اعلیٰ نے بین الصوبائی سرحدوں پر سیکورٹی کے موثر اقدامات پر باہمی تعاون کے فروغ پربھی اتفاق کیاہے ۔وزیراعلیٰ بلوچستان نے جمعرات کے روز وزیراعلیٰ سندھ سے ان کے دفتر میں ملاقات کی سابق وزیراعظم میر ظفر اللہ خان جمالی ، سابق وزیراعلیٰ میر جان محمد جمالی، سنیٹر آغاز شہباز درانی، صوبائی مشیر محمد خان لہڑی ،اراکین صوبائی اسمبلی میر عاصم کرد گیلو، میر اظہار حسین کھوسہ ،رکن صوبائی اسمبلی میر دوستین خان ڈومکی، رکن قومی اسمبلی طارق مگسی ، سندھ کے صوبائی وزراء ،میر ہزار خان بجارانی، منظور احمد وسان ، اراکین اسمبلی دونوں صوبوں کے سیکرٹری آبپاشی اور سندھ کے دیگر حکام بھی اس موقع پر موجود تھے۔ ملاقات کے دوران بین الصوبائی معاملات پر تفصیلی تبادلہ خیال کیاگیا بالخصوص دونوں صوبوں کے مابین پانی کی تقسیم اور استعمال کے طے شدہ فارمولے پر عملدرآمد سے اتفاق کرتے ہوئے طے کیاگیا کہ دونوں صوبوں کے محکمہ آبپاشی کے سیکرٹری اور ماہرین اجلاس منعقد کرکے افہام و تفہیم کے ساتھ تمام امورطے کریں گے اور طے شدہ امور پر عملدرآمد یقینی بنایا جائے گا ۔ملاقات میں حب ڈیم کے پانی کے دونوں صوبوں کے استعمال سے متعلق امور پر بھی بات چیت کی گئی ۔ ملاقات میں کئے گئے فیصلوں پر عملدرامد کا جائزہ لینے کیلئے مارچ میں کوئٹہ میں ایک اعلیٰ سطحی اجلاس منعقد کیا جائے گا۔ قبل ازیں دونوں صوبوں کی دیرینہ روایات کے مطابق وفود کے درمیان روایتی حال احوال کیاگیا اور وزیراعلیٰ سندھ کی جانب سے وزیراعلیٰ بلوچستان اور ان کے وفد کو روایتی سندھی ٹوپی اور اجرک کے تحفے دےئے گئے جبکہ وزیراعلیٰ سندھ نے پرتکلف ظہرانہ بھی دیا۔ وزیراعلیٰ بلوچستان نے پرتپاک مہمان نوازی پر وزیراعلیٰ سندھ کا شکریہ ادا کیا۔
