’’توہر‘‘ ءِ گتاپیں ساہگ ءَ یک بزگیں مرد ے ءَ بلائیں سنگے سر ءِ چیر ءَ کتگ ءُُ وپتگ ات۔ گدے راڑ راڑ ءُُ میدے شنگ ءُُ شانگ ات انت۔ آئی ءِ دیمءَ سدانی سالانی بے وسیانی کرْچک لونجان ات انت ۔کمک ءَ رند سینگ ءِ سر ءَ چیزے ءَ ٹک اِت ۔یک چمے پچ کرت ءُُ چار ات ئے ماں حاکی گداں اپسر وڑیں پزور ءُُ تمردیں مردینے گوں شنگریں لٹ ءَ پاد کنگ ءَ ات ۔ہمے حاکی پوشاکیں مرد ءَ درائینت پادا انچک مہ وپس ،بزگ ءَ جست گپ آیا وپسگ ءِ سر ءَ ہم پابندی لگ اِتگ؟
پادا واجہ ،پادا! حاکی گد پوشیں پزوریں مرد ءَ گشت ’’ توہر‘‘ ءِ ساہگ ءَ زاناں کسے وپس ایت؟
آ پاد اتک ہمے راڑ راڑیں گداں وتی جان ءَ پردیان ءَ گشت ئے اد ءِ درچک اِش برتگ ات سندھ انت ۔یلہ دئے مرد ءَ ترندی ءَ گشت بیا جیپ ءَ تیلانک دئے آ پاد اتک راڈیں گدانی حاک ئے چنڈ ات حاکی پوشاکیں مرد ءِ پشت ءَ بوان ءَ پلکیں راہ اِش یلہ کت پکائیں سڑک ءِ سر ءَ بوت انت ماں جیپ ءَ رنگ رنگیں گد ءُُ پچی وشبوئیں جنین آدم نشتگ ات انت ۔حاکی گد پوشین مرد ءَ گوں ہمے بزکار ءَ گشت ۔ہو تیلانک ئے دئے ۔آئی ءِ جیپ ئے تیلانک دات جیپ ءِ بندیں مشین گر ءُُ گار کناں ءُُ روگ ءَ لگ ات۔
حاکی گد پوشیں مرد ءَ یک پادے بریک ءِ سر ءَ کت آ جست گپت ما بھٹ شاہ ءَ روگ ءَ ایں تو شاہ لطیف ءِ میڑہ ءَ چارئے ؟ من چہ بھٹ شاہ ءَ دراں ڈیہہ کنگ بوتگاں ۔آئی ءَ پیشانی ءِ ئید پہک کت انت ءُُ گشت ۔من ءَ بھٹ شاہ ءَ پادا ایر کنگ ءِ اجازت نہ انت ۔ھاکی گد پوشیں مرد ءَ آ پہ حیرانی سرتا پاد ءَ چار ات ءُُ جست ئے گپ تو کئے ۔۔۔؟
من شاہ عبدالطیف بھٹائی اوں۔آئی ءَ پسہ دات ءُُ پد ’’ توہر‘‘ ءِ تنکیں ساہگ ءِ نیمگ ءَ شت۔
