چیزے کہ زاھر نہ اِنت نیست اِنت منتگ ءْ پشت کپتگ ءْ اسل چیز کہ زاھر کنگی اِنت گار اِنت۔ انسان پگر نکنت ما سرجمیں گوستانک ءَ بچار ئیں داں ھمے آسرال ءَ سر بئیں کہ زلم ءْ تاریکی گیشتر منتگ ۔ فیض احمد ءَ انچیں چیزے گوشتگ اَت ۔
” ان گِنت صدیوں کی تاریک بہیمانہ طلسم ”
بے حسابیں زلم ءْ تھاری ماں تاریخ ءَ گوستگ چیزے کہ اَست کنگ بہ بیت، نیست اِنت ءْ چیزے کہ نیست کنگ بہ بیت، اَست اِنت ۔ برعکس اِنت ما رْڑن ءِ لوٹوک ئیں بلے تھاری ءَ دوست دار ئیں ما مھر ءِ لوٹوک ئیں بلے کینگ ءَ ساڑائیں برعکس اِنت ۔
انسان چوناھا بائد اِنت کہ راست بہ بیت ءْ شاعر گَنتر راست بہ بنت راستی ھمیش اَت کہ منظور بسمل ءَ گوں یک تھرے ” سْھلِ مْمتنع ” ءِ رِد ءَ پہ انچو جْوانی ءَ بیان کتگ کہ ھمک کس اے بند ءَ پھم اِت کنت
شاعر ءِ زبان ءَ چہ اے ھم بائد اِنت کہ سْبکّ ءْ پْوچکیں ھبر در مئیت سنگین ءْ گران بہ بنت ۔ چوناھا عام مردم انچو بہ بیت بلے شاعر دو ھمنچو وت بسمل گوش اِیت
’’چہ دپ ءَ دربئیت سنگین ایں ھبر
کپتگیں تْکّ ءَ پدا کس چِت نکنت ”
ھبر چہ دپ ءَ درکئیت تہ مردمے note کن اَنت ۔ شاعر ئیگ ءَ وَ گنتر note کن اَنت ۔ مارا اے دابیں بازیں شعرانی تہءَ انسانیت ءِ ھمک تَک ءْ پِھلو ءَ سبک ءْ سکین دست کپ اِیت ۔زانگ بیت کک بسمل راستی ءْ انسان دوستی ء4ِ چنچو واھگ دار اِنت منظور بسمل ءِ گورا مارا سرھال ءْ ھمک گونگیں زند ءِ مضمون دست کپ اَنت ۔ چوناھا اے ھم یک منّ اِتگیں ھبرے کہ زانت کاریں شاعر، نوک نوکیں سرھال بوج اِیت ءْ بیان کنت سرھالے ءِ بْنگیج کنگ وت یک مزنیں دانائی ی?ے لوٹ اِیت ءْ تھنا مزنیں شاعر اے کار ءَ کْت کنت۔ اگاں نا ما کْلّ یے بچار ئیں پہ مئے گورا تھنا دو سرھال ءْ بْنگپ ءَ ابئید دگہ ھچ نیست ۔ عشقیہ شاعری ءْ رزمیہ شاعری یا ما شعرانی تہءَ عاشقی کنیں یا جَنگ زند تھنا اے دوئیں چیزانی نام نہ اِنت ۔ مرچگیں بنیادم ءَ بازیں آساھش درگیتکگ ۔ بازیں راہ ءْ در، بازیں لیکہ ءْ نظریہ درگیتکگ اَنت ۔سائنس ءَ باز دیمروئی کتگ ءْ کنان اِنت ۔ زندگی ءِ ھمک تَک ءْ پِھلو ءَ تھنا یک سرپدیں شاعرے بیان کْت کنت۔ انچو کہ مئے گورا منظور بسمل اِنت ۔
ما مْردنی ایں ناز کناں کہ مارا منظور بسمل ے اَست ءْ مئے اھد ءَ زندگ اِنت ۔
گْڈّی ھبر ءِ نیمگ ءَ کایاںآ بْرزا ھرچی کہ ما گوشت شعرانی کسانْکیں ریسے اَت ۔ منظور بسمل ءِ شخصیت ءْ ازمی بالاد چنچو مزن اِنت ۔ اے چیز ءَ من گیشّینت نکناں ءْ نا کہ مارا منظور بسمل ساڑاھگی اِنت ءْ بْرز برگی اِنت ۔ وت منظور گوش اِیت ۔
کسّی توسیپ کسّ ءَ بْرز نکنت
جْوان ھما اِنت کہ ایرجَنت مارا
یکبرے ما بیائیں منظور بسمل ءِ ازم ءَ سرجم ءَ بہ پرّیس ئیں ءْ اے کاراں بائد اِنت کہ گَلّ ءْ اِدارہ ءَ اکیڈمی بہ کن اَنت ۔ ھاس بلوچستان اکیڈمی ءْ بلوچی اکیڈمی بکن اَنت ۔ اے یک فردے ءِ کار نہ اِنت ۔ اجتماعی کارے ۔ اکیڈمک صورت ءَ اے کار بنت ما بلوچ کہ مروچاں سوشل میڑیا ءَ گوں وابستگی دار ئیں، چَہ ھرّوچی ایں بے سریں ھبراں لَک گِھتر اِنت کہ ما بیا ئیں ءْ وتی مستر ءْ سینئیر ایں لبزانت آنی ازمی بالاداں ریس ءْ پرّیس بکن ئیں ۔ باوست مدام بکن ئیں کہ نپ دَے اَنت ۔پدا گْڈسرا من ءَ منظور بسمل ءِ جِند سک پھل بکنت کہ ما آئی ءِ ازمی بالاد ءِ آ مْکام ءَ سر نہ بوتگان ءْ شَرّیں دابے ءَ ریس ءْ پرّیس کْت نکت ۔ بلوچی زبان ءِ بادشاھیں بسمل گوں بلوچی زبان ءَ گْل ءْ میتاپ بات۔
