زر دیر اِنت ،بلوچی لبزانک ءِ ہما بے مٹیں شاعر ءُُ لبزانت ءِ رجانکانی مڈی اِنت کہ بلوچی زبان ءِ نوکیں باہندیں پولکار عاصم زہیر ءِ شوہازاِنت۔مراد شاعر یک شاعرے ،جوانیں آزمانکارے ءَ وَ درستاں زانتگ بلئے مراد ساحر یک بے دروریں رجانکارے اوں بوتگ ۔

اے کتاب وت ہمے چیزے ءِ گواہی ءَ بس اِنت ۔کتاب سرجم ءَ ۲۳۰ تاکدیمانی تہا اِنت ۔ کتاب ءِ پیش گال واجہ شرف شاد ءَ نبشتگ ءُُ کتاب ءِ نامدات ہمااولی آمازنک ءِ رجانکار ءُُ واجہ عبدالصمد امیری ءِ نام ءَ کنگ بوتگ ۔کتاب ءِ بندات ءَ واجہ عاصم زہیر ءَ زر دیر انت بزاں کتاب ءِ ارزشت ءُُ واجہ مراد ساحر ءِ ازم ءِ گیشواری کتگ ءُُ دومی بہر ءَ آئیءَ رجانک ءُُ بلوچی رجانکاری ءِ بابت ءَ جوانیں سرپدی دئیگ ءِ جہد کتگ۔

عاصم زہیر کہ وت انوں پی ایچ ڈی ءِ یک نودربرے ءُُ چد ءُُ پیش ہم آئیءَ بانل دشتیار ی ءِ کتاب اوں رد ءُُ بند داتگ کہ نگدکاراں ءُُ بلوچی وانوکاں سک دوست بوتگ اَت۔اے کتاب ہم ہما ڈول ءَ دوست دارگ بیت ۔سرجمیں کتاب ءَ مراد ساحر ءَ آزمانکی پڑ ءِ نامیگیں ندکارانی مواد زرتگ ءُُ بلوچی ءَ رجانک کتگ اَنت چشکہ خلیل جبران،الکسے نکولائی ایوچ ٹالسٹائی،میکسمگورکی،امرتا پریتم،کرشن چندر،جمال ابڑو،نسیم کھرل ،علاوالدین آلازاد،ابراھیم جویو،فہمیدہ اختر ڈولیں نامداریں آزمانکارانی مواد بلوچی ءَ ترینتگ اَنت کہ لاحق ءِ ستا اَنت ۔ہ

میشانی تہا واجہ مراد ءَ گیشتر خلیل جبران ءِ گیشتر مواد بزاں آزمانک رجانک کتگ اَنت۔ چشکہ امیت ءُُ ورنائی،جوریں الہان، شاعر ءِ وصیت،شاعر ءِ مرگ ،ہمے رنگ ءَ آئیءَ را امرتا پریتم ءِ آزمانک اوں چیزے رجانک کتگ، چشکہ بو،بختاور، موز ءِ پوست چریشی ءَ اے زانگ بیت مراد چہ وتی لبزانک ءَ ابید ہم دنیا ءِ ادب ءَ چہ سرپدیں ندکارے بوتگ اَنت ءُُ آئی ءَ زانتگ کجام ندکار ءِ کار لاحق ء رجانک اِنت کہ بلوچی لبزانک ءِ دردے وارت بہ کنت ۔

ساحر ءِ رجانک آئیءِ آزمانکی حساب ءَ انچو مہر ءُُ محکم گندگ نہ بیت بزاں آئی ءَ گیشتر چو لبز پہ لبزی رجانک ءِ جہت ءَ مواد رجانک کتگ اَنت چشکہ آئیءِ شاعر ءِ مرک تاکدیم ۷۸ ءِ یک کسانیں رِدے پرے گپ ءِ پدرائی ءَ دیم ءَ آرگ لوٹ اَنت کہ ’’۔۔۔۔آئی ءَ وتی زند ءَ گوں اے کسانیں بالاد ءَ بازیں تجربہے حاصل کتگ اَت‘‘اس کم عمری میں زندگی سے اسے بہت سے تجربے حاصل ہوچکے تھے۔

ہردوئیں ردانی اگاں تپاس بہ بیت داں ہمے گمان بیت کہ آئیءَ لبز پہ لبزی رجانک کتگ بلئے چش نہ اِنت کہ آئیءِ اے رجانکی تجربت سرجم ءَ بے سوب بوتگ اِناں ایشیءِ مانا اے نہ اِنت ۔

چشکہ رجانک وتی بندتی دروشم ءَ بوتگ وہدے مراد رجانک کنگ ءَ بوتگ آوہداں رجانکاری ءِ بابت ءَ انچو لٹریچر بلکیں آئیءِ دسترس ءَ مہ بیت ءُُ بلوچی بزانک ءَ آ وہداں انچو مواد رجانک اوں کنگ بہ بوتگ اَت پمشکا چشکہ رجانک نزوری بوت کن اَنت ۔

چشکہ مراد یک بندات ندکارے بلوچی لبزانک ءِ پمشکا آئیءِ مواد ءُُ نکان پہ نوک نبشتہ کار ءُُ حاس رجانکاراں یک سرشونے ءِ جہت ءَ بوت کن اَنت کہ آ وہد اں چونیں رجانکاری بوتگ ءُُ نوں رجانکاری ءِ لوٹ چے اَنت ۔