ریاض: یمن سے ملحقہ سعودی علاقے میں بارودی سرنگ کے دھماکے سے ایک سرحدی فوجی ہلاک ہوگیا۔
سعودی وزارت داخلہ کے مطابق سرحدی شہر جازان میں سرحدی گارڈز کا قافلہ گشت پر تھا کہ دھماکا ہوگیا۔ حکام کے مطابق فوجی قافلے کو بارودی سرنگ کے ذریعے نشانہ بنایا گیا جو سڑک کنارے نصب کی گئی تھی۔
سعودی فوج کے ترجمان میجر جنرل منصور الترکی نے بتایا کہ حملے میں ایک سپاہی محمد شامی شدید زخمی ہوگیا، جسے فوری طور پر اسپتال منتقل کیا گیا جہاں وہ زخموں کی تاب نہ لاتے ہوئے ہلاک ہوگیا۔ واقعے کی تحقیقات شروع کردی گئی ہیں۔
دوسری جانب سیکیورٹی حکام کا کہنا ہے کہ گزشتہ روز یمن سے ایک مشتبہ گاڑی سعودی عرب کی حدود میں داخل ہونے کے لیے آگے بڑھ رہی تھی۔ اس موقع پر سیکیورٹی فورسز نے فوری کارروائی کرتے ہوئے گاڑی کو نشانہ بنا کر تباہ کردیا جس کے نتیجے میں اس میں سوار شدت پسند باغی ہلاک اور زخمی ہوگئے۔