بلوچی لبزانک ءِ درائیں پڑ پہ پولکاری ءَ ہورک ءُُ ھالیگ اَنت پکار ایوک ءَ پولکارئیگ اِنت کہ بئیت ءُُ گچین بکنت چہ چکاریں بنگپاں۔۔۔۔واجہ اکبرغمشاد چشکہ وت یک لبزانکے مردمے ءُُ ہمے لبزانک ءَ وتی نودربراں سرپدی دئیگ ءِ کار ءَ کنگ اِنت پمشکا آجوانی ءَ سرپد اِنت کہ بلوچی لبزانک ءِ کجام پڑ است اَنت کہ آھود ءَ گیشتر کار کنگ ءِ حاجت است اِنت ۔

آئی ءَ وتی تب دوستی ءُُ وتی پڑءِ ھساب ءَ اے بنگپ پہ پولکاری ءَ گچین کتگ چشکہ آئی ءِ وتی پڑ اوں شاعری اِنت پمشکا آئیءَ یک شاعری بنگپے پہ پولکاری ءَ گچین کتگ چنائی ءَ اے پولکاری ءَ کار آئیءِ سندی بزاں ایم فل ڈگری یے ھاتر ءَ کتگ بلئے آئیءِ اے کار لاحق ء ستا اِنت۔آئیءِ بنگپ ’’ بلوچی نوکیں نظم‘‘ یک انچیں بنگپے کہ ایشیءِ بابت ءَ پیسر ا بازیں ترانے بوتگ کہ بازیں تاک ءُُ ماہتاکاں چاپ ءُُ شنگ بوتگ اَنت بلئے گوں پولکاری دروشم ءَ اے اولی جہد اِنت کہ آئیءَ کتگ ۔

آئی ءَ وتی ہمے کار ءِ جم کنگ ءَ رند وتی پولکاری پہ چاپ ءَ بلوچی اکیڈمی کوئٹہ ءَ داتگ ءُُ اکیڈمی ءَ پہ وڑے ایشیءَ را چاپ کتگ ۔ اے پولکاری ءِ سرجم ءَ پنچ در اَنت اولی در آئی ءِ ’’ نوکیں نثم ءِ سر ءُُ بن یا پشدر‘‘ ءِ نام ءَ اِنت ایشیءِ تہا آئیءَ پٹ ءُُ پول ءِ وڑ ءُُ دروشم ءَ لچہ ءُُ آئیءِ بندات ءُُ دپتر ءِ بابت ءَ تران کتگ ،دومی در آئیءِ ’’بلوچی شاعریءِ تہا نوکیں نظم ءِ رواج‘‘ اِنت ۔

کہ اد ا آئیءَ بلوچی لبزانک ءِ بنداتی لچہ گُشیں شاعر ءُُ آہانی ازم ءِ تک ءُُ پہناتانی گشواری ءِ جہد کتگ آاے جہد ءَ چنچو سوب مند بوتگ ایشیءِ سوڈگ ءَ وانوک کتاب ءِ وانگ ءَ رند وت کت کن اَنت۔سیمی در ’’بلوچی نوکیں نظم ءِ فکری تک ءُُ پہنات‘‘اے در ءَ آئیءَ بلوچی لچہ گشی ءِ استیں جیڑگ ءُُ نوکیں دور ءِ اثرانی سرا تران کتگ۔

چارمی در آئی ءَ ’’ بلوچی نوکیں نظم ءِ رنگ ءُُ گوناپ ءُُ آئی ازمی تک ءُُ پہنات‘‘ ءِ نام ءَ ایر کتگ آئی ءَ اے در ءَ نہ ایوک ءَ بلوچی لچہانی تہر ءُُ دروشمانی بابت ءَ بابت ءَ تران کتگ بلکیں اے اوں گشیوار ءِ جہد کتگ کہ کجام شاعر ءَ لچہ ءِ گیشتر کجام تہر ءُُ دروشم ءَ شعر گشتگ ۔پنچمی ءُُ گڈی در آئی ءَ ’’ آسر‘‘ ءِ نام ءَ ایر کتگ کہ ادا آئی ءَ وتی درائیں پولکاریءِ آسرے دیم ءَ آورتگ ۔
سرجمیں رنگے ءَ واجہ اکبرغمشاد ءِ اے پٹ ءُُ پولی کار بلوچی لبزانک ءِ پڑ ءَ یک جوانین گیشی ءِ زانگ بیت آئیءَ وتی پولکاری ءَ نہ ایوک ءَ بلوچی نوکیں لچہ ءِ تہر ءُُ دور ءُُ باریگ ءِ بابت ءَ تران کتگ بلکیں آئی ءَ ایشی ءِ میان ءَ یک راہ یے ءِ گیشوار کنگ ءِ اوں جہد کتگ بزاں آئیءَ یک کسانیں جہد ہما شئیرانی نگدکنگ ءُُ شرگدارآرگ ءِ اوں جہدے ہوار کتگ ۔

چش نہ اِنت کہ آئیءِ کار پہ بلوچی نوکیں لچہ ءِ پڑ ءَ سرجم توام اِنت بلئے منی چماں یک بنداتی کارے المی ءَ است اِنت ءُُ انگت ءَ اے بنگپ ءَ کار کنگ ءِ سک باز جاہ است اِنت۔

چشکہ مئے پولکاری پڑاں پٹ ءُُ پولکار مدام یک مزنین بنگپے دستاں زور اَنت چشکہ بلوچی کلاسیکل شاعری،بلوچی سفرنامہ،بلوچی ردانک یاکہ باز مردم ایوک ءَ زند ءُُ ازم ءِ سرا کار کنت سید ءِ زند ءُُ ازم ،کریم زند ءُُ ازم،گل خان نصیر ءِ زند ءُُ ازم ،عطا شاد ءِ زند ءُُ ازم چشکہ نہ اِنت کہ اے بنگپاں ہچ ارزشت نیست اِنت ۔

ایشانی ارزشت سک باز اِنت بلئے اے مزنیں بنگپ اَنت پمشکا یک کسانیں وہدے ءَ ایشانی سرجمی ءَ گر ءُُ بند کنگ نہ بوتگیں حبرے زانگ بیت بلئے اگاں ہمیشانی بنگپاں چہ کسانیں تکے زورگ ءُُ کار کنگ بہ بیت منی دل ءَ یک نوکیں کارے اوں دیم ءَ کیت ءُُ پہ وہدے،پہ شوق سرجم اوں بیت ،چشکہ سید ءِ دستونکاں لبزیات،عطاءِ چہرماں لچہاں ،کریم ءِ شاعری ءَ تژن ءُُ شیگان،ہمے رنگیں کسانیں بنگپ اگاں زورگ بہ بیت داں ایشانی گر ودار جوانی ءَ بوت کنت ۔