زالبول کہ دنیا ءِ وش تریں ءُُ زیبداریں سگاتے زانگ بیت راجدپترءِ تاکانی تہ ایشیءِ بابت ءَ ہر وڑیں لبز رسیت جاھے گل ءُُ پھلانی بدل ،رد ءِ تاہیر،وشبو ءُُ رگام ،زینت ءُُ جلواہ گوشگ بوتگ گڈا جاھے بدبختی ءُُ شومی ءِ چیدگ ،شیطان ءِ دومی نام ءُُ رپک ءُُ ہنر ءِ پندل ساز گوشگ بوتگ۔

بلئے وھد ءِ گوزگ ءَ گوں دنیا ءِ گیشتری ملک ءُُ راجانی تہازالبول ءِ جوانیں کرد،آئی ءِ بستار ءُُ آئی ءِ حق منگ بوتگ اَنت انچو کہ مذھب اسلام ءِ تہا زالبول ءِ یک جوانیں بستار ءُُ جاھے ھمے رنگ بلوچ راج ءِ تہا ھم زالبول ءَ را یک جوانیں بستارے است اسلام ءَ چہ سر عربانی تہا زالبول ءِ بستار ءُُ ارزشت باز کم بوتگ ءُُ مردماں وتی گونڈیں جنکیں چکاناں قت کشتک ءُُ قبر کرتگ بلئے بلوچ راج چہ قدیمیں زمانگ ءَ وتی زالبول ءَ رایک شریں ءُُ جوانیں بستارے دنت ۔

’’ بلوچ راج کہ آوانی یک پر ارزشتیں ءُُ جتائیں راج دپترے ھست ءُُ اے راج ءِ دود و ریبدگ وڑ ءُُ پیم چہ درستیں راجاں جتا تر انت۔ اے راج ءِ مستریں ما ل ءُُ مڈّی ایشیءِ عزت انت آوانی زہم جنیں ،سوھنائیں ءُُ خوداریں زالبولاں کہ آوانی بلوچی چاگرد ءَ درجہ سک باز برز ءُُ پر ارزشت انتّ۔

بلوچ زالبو وتی ننگ ءُُ عزت ءِ پہازی ءَ سک باز مہشور ءُُ نامدار اِنت ھمے وڑا بلوچ مردین زالبول ءَ را وتی ننگ ءُُ شرپ زانت آئی ءِ سک باز عزت ءُُ شرپ ءَ کنت۔بلوچ زالبول بلوچی ربیدگ زندگیں مثال اِنت ۔آئی ءِ پُچ ءُُ پوشاک ،آئیءِ سہت ءُُ زیور، لوگ ءِ سینگار ءُُ سوارگ ،پردہ داری ،مہمان داری،میار جلی ایشاں ابید وتی لو گءِ کار ءُُ کمک ءَ ھم بلوچ زالبول پشت نہ اِنت ۔

پسانی چارینگ بہ بیت کہ کشت و کشاری ،آپ ءِ کشگ بہ بیت کہ دار ءِ چِنّگ بلوچ زالبول ءَ اے وڑیں کاراں مدام وت ءَ را پّد ءَ نہ داشتگ ۔دود ءُُ ربیدگ ءِ پڑ ءَ بلوچ زالبول ءِ بستار سک باز برز ءُُ بالا اِنت۔

’’ بلوچ جنین آدمانی پوشاک دنیا ءِ ڈولدار تریں پوشاک زانگ بیت کہ جنین آدمانی گدانی جوڑ کنگ ءَ ھمنچک ہید ریچی کنگ بیت کہ جنین آدمانی گدانی جوڑ کنگ انچک وھد نہ گیت بلوچ جنین آدمانی پوشاک ءِ مستریں سپت ایش انت کہ دگہ راجانی پوشاکاں باز جتا انت اگاں یکے چہ دور ءَ بگندیت ئے آزانت کہ اے ’’ بلوچے‘‘ بزاں بلوچ جنین آدم ءِ پوشاک پہ بلوچانی واستہ ( introduction) ئےِ‘‘ ۔

بلوچ زالبول ءِ پچ پوشاک نہ ایوک ءَ ڈولدار ءُُ زیبدار انت بلکیں اے پچانی گورا کنگ ءَ زالبول سرجم ءَ ستر بیت ۔اے پچانی دوچگ ءَ جنین آدم یکے دومی ءِ مدت ءُُ کمک ءَ کن انت بزان اشری کننت ھمے وڑا وتی بلوچیں زالبول وتی پچاں ابید وتی لوگ ءِ سمینگ ءُُ سوارگ ءَ نامدار انت ’’ لوگ گونڈینے بہ بیت یا مزنیں یے آئی ءِ چار ءُُ دلگوش ءِ ذمہ واری ھما لوگ بانک ءِ سر ءَ بیت۔لوگ جنین ءِ شاھوکاری ءُُ نابودی ھر دکاں پدر کنت ۔

لوگ ءِ صاف سلاکنگ جنین ءِ دست ءَ انت جنین گوں کمے حب ءُُ زانت ءُُ وتی لو گ ءَ سمبھینت ءُُ ڈولدار کت کنت۔ بلوچ زالبول وتی شاھوکاری ءَ ہرجاہ پیشدار یت آ لوگ ءِ سوارگ بہ بیت کہ پچ ءُُ پوشاک ءِ دوچگ ،کنور کنگ بہ بیت یا کجام یک دگہ کارے ما اے گوشت کناں کہ بلوچ زالبول ءُُ شاھوکاری یکے دومی ءَ گوں بندوک انت۔
بلوچ زالبول ءِ عزت ءُُ سرپ آئی ءِ کرد چاگرد ءِ تہا گوں جوانیں چمے ءَ چارگ بیت ءُُ بلوچ وتی زالبولاناں سک باز عزت ءُُ شرپ دنت۔

بلوچ زالبول نہ ایوک ءَ پہ جنگ ءُُ مڑائی ءَ ھلاس کنت بلکیں گونڈین گونڈین جیڑھاں ھم زالبول ھلاس کنت ۔بلوچ چاگرد ءِ تہا اگاں یک راھے ءَ زالبول آھگ ءَ بیت گڈا مردین آ راہ ءَ نہ ایت دومی کش ءَ روت ،اے زالبول ءَ را عزت ءُُ شرپ دنت ۔ھمے زالبول کہ یک نیمگے بلوچ ءِ عزت ءُُ ننگ انت تاں دومی نیمگ ءَ بلوچی دود ءُُ ربیدگ ءِ پاسپان اِنت۔بلوچ راج کہ وتی دود ءُُ ربیدگانی سوب ءَ درائیں دنیا ءَ نامدار ءُُ مشہور انت ۔(جاری اِنت)