ھمے وڑا بلوچ مردین زالبول ءَ را وتی ننگ ءُُ شرپ زانت آئی ءِ سک باز عزت ءُُ شرپ ءَ کنت ۔بلوچ زالبول بلوچی ربیدگ زندگیں مثال اِنت ۔

آئی ءِ پُچ ءُُ پوشاک ،آئیءِ سہت ءُُ زیور، لوگ ءِ سینگار ءُُ سوارگ ،پردہ داری ،مہمان داری،میار جلی ایشاں ابید وتی لو گءِ کار ءُُ کمک ءَ ھم بلوچ زالبول پشت نہ اِنت ۔

پسانی چارینگ بہ بیت کہ کشت و کشاری ،آپ ءِ کشگ بہ بیت کہ دار ءِ چِنّگ بلوچ زالبول ءَ اے وڑیں کاراں مدام وت ءَ را پّد ءَ نہ داشتگ ۔دود ءُُ ربیدگ ءِ پڑ ءَ بلوچ زالبول ءِ بستار سک باز برز ءُُ بالا اِنت۔

بلوچ جنین آدمانی پوشاک دنیا ءِ ڈولدار تریں پوشاک زانگ بیت کہ جنین آدمانی گدانی جوڑ کنگ ءَ ھمنچک ہید ریچی کنگ بیت کہ جنین آدمانی گدانی جوڑ کنگ انچک وھد نہ گیت بلوچ جنین آدمانی پوشاک ءِ مستریں سپت ایش انت کہ دگہ راجانی پوشاکاں باز جتا انت اگاں یکے چہ دور ءَ بگندیت ئے آزانت کہ اے ’’ بلوچے‘‘ بزاں بلوچ جنین آدم ءِ پوشاک پہ بلوچانی واستہ ( introduction) ئےِ‘‘ ۔

بلوچ زالبول ءِ پچ پوشاک نہ ایوک ءَ ڈولدار ءُُ زیبدار انت بلکیں اے پچانی گورا کنگ ءَ زالبول سرجم ءَ ستر بیت ۔

اے پچانی دوچگ ءَ جنین آدم یکے دومی ءِ مدت ءُُ کمک ءَ کن انت بزان اشری کننت ھمے وڑا وتی بلوچیں زالبول وتی پچاں ابید وتی لوگ ءِ سمینگ ءُُ سوارگ ءَ نامدار انت ’’ لوگ گونڈینے بہ بیت یا مزنیں یے آئی ءِ چار ءُُ دلگوش ءِ ذمہ واری ھما لوگ بانک ءِ سر ءَ بیت۔لوگ جنین ءِ شاھوکاری ءُُ نابودی ھر دکاں پدر کنت ۔

لوگ ءِ صاف سلاکنگ جنین ءِ دست ءَ انت جنین گوں کمے حب ءُُ زانت ءُُ وتی لو گ ءَ سمبھینت ءُُ ڈولدار کت کنت۔ بلوچ زالبول وتی شاھوکاری ءَ ہرجاہ پیشدار یت آ لوگ ءِ سوارگ بہ بیت کہ پچ ءُُ پوشاک ءِ دوچگ ،کنور کنگ بہ بیت یا کجام یک دگہ کارے ما اے گوشت کناں کہ بلوچ زالبول ءُُ شاھوکاری یکے دومی ءَ گوں بندوک انت۔بلوچ زالبول ءِ عزت ءُُ سرپ آئی ءِ کرد چاگرد ءِ تہا گوں جوانیں چمے ءَ چارگ بیت ءُُ بلوچ وتی زالبولاناں سک باز عزت ءُُ شرپ دنت۔

بلوچ زالبول نہ ایوک ءَ پہ جنگ ءُُ مڑائی ءَ ھلاس کنت بلکیں گونڈین گونڈین جیڑھاں ھم زالبول ھلاس کنت ۔بلوچ چاگرد ءِ تہا اگاں یک راھے ءَ زالبول آھگ ءَ بیت گڈا مردین آ راہ ءَ نہ ایت دومی کش ءَ روت ،اے زالبول ءَ را عزت ءُُ شرپ دنت ۔

ھمے زالبول کہ یک نیمگے بلوچ ءِ عزت ءُُ ننگ انت تاں دومی نیمگ ءَ بلوچی دود ءُُ ربیدگ ءِ پاسپان اِنت۔بلوچ راج کہ وتی دود ءُُ ربیدگانی سوب ءَ درائیں دنیا ءَ نامدار ءُُ مشہور انت

بلوچی رسمانی مستریں آسیت ہمیش انت کہ آہانی نیام ءَ اجتمائیت ءُُ اشتراکیت سک باز است انت بلوچی رسم پہ یک دومی ءِ کمک ءُُ امداد کلیں ٹک و راج ءِ پائیدگ ،شاتی ،آباتی ءُُ سلامتی ءِ بنیات ءِ سر ءَ ایر انت۔

اے آسیت مارا ہر یک بلوچی رسمے تہا گندگ ءَ کینت ‘‘بلوچی زالبول انچو کہ وتی دود ءُُ ربیدگ ءِ پاسپان انت ھمے وڑا،آ وتی رنگ ءُُ دروشم ءَ ھم نامدار اِنت ۔بلوچ زالبول وتی پچ ءُُ پوشاکانی سوب ءَ ستر ءُُ پردہ اِنت ءُُ آئی ءِ براھداری ھمے اندیمی ءُُ پردہ داری ءِ تہا اِنت۔

بلوچ زالبول وتی سہت ءُُ سینگار ءِ ھم ھیال ءَ کنت بلوچ زالبول ءِ رنگ ءُُ گوناپ ،آئی ءِ براھداری داب ءُُ ملّگ ،شرنازیں کندگ ،لب ءُُ رخسار قابل ء توسیپ اَنت۔بلوچ زالبول ءِ شررنگی ءِ توسیپ ءُُ ستاہ بلوچی شئیرانی تہا ھم است انت کہ مئے شائراں ایشانی تعریف کرتگ ءُُ اے وڑ گوشتگ ۔

جان ءِ گلابی پیرہن
زربغت ءُُ کاشی گل بدن
سہریں لباں مثل ء سمن
مینتہ سمین ءَ جان ءُُ تن

اے شئیر ءِ تہا نامداریں شائر جام درک وتی دوستدار ءِ توسیپ ءَ کنان ءَ گوشیت کہ آئی ءِ سہریں لنٹ چوسمن ءِ وڑا ڈولدار ءُُ سہر اَنت ءُُ آئی ءِ بالاد چو گلاب ءِ پھل ءَ گلابی ءُُ نازرک انت ۔ ھمے رنگ ءَ نامداریں شاعر ملا قاسم یک کاڑے ءِ تعریف ءَ اے وڑ ءَ کنت۔

من دچار کپتاں گوں حمارچمیں مہوشے
گوں وتی ملک ءِ ہمسراں لال پین ءُُ سشے
کبگی لڈانیں کرام کنان انت کش مان کشے
منی خیالانی باطن ءَ کپتگ بش بشے

مئے شائران ہر وھد ءَ زالبول ءِ ملگ ءُُ لڈ ءَ بزاں آئی ءِ رواجانی تعریف ءُُ توسیپ اگاں کرتگ گڈا گوں کبگ ءَ آئی ءَ را دیم پہ دیم کرتگ پرچا کہ کبگ ءِ رواج ءُُ لڈگ چہ درائیں مرگاں وش تر انت ءُُ آئی ءِ رواج ءُُ کرامانی تہا یک جتائیں ءُُ براھداریں ندرگے ودی بیت۔چوشکہ نامداریں شاعر واجہ آدم حقّانی زالبول ءِ بالاد ءُُ آئی ءِ رواجانی توسیپ ءَ کنت

مود کنلیں چّم کجلیں لنٹ سہر دنتان چو ٹلیں
رکّ ململیں دپ شکلیں دوست کرامگانی شانتلے
لڈّی چو کبگ ءَ نگوری ملیّ چو سید ءَ کوہسری
گڈ ءِ بہاران ءَ چری دوست سرو ءِ راستیں شاہلے
(برجم اِنت)