مرچی بزاں ۲۰ اکتوبر ۲۰۱۷ ءَ ،بلوچی کدگ ءِ نیمگءَ شاہ تیر یں کماش واجہ عنقا ءِ یاتگیری ءَ یک مراگشے جم دارگ بوتگ اَت ۔ دیوان ءَ گچین مردم نندوک اِتاں بلئے بندری ندارگ انچوش اَت گشئے بلوچ راج انگت ءَ واب اِنت آسہی نہ اِنت ۔

کہ جہان ءَ چے بوہگ ءَ اِنت پرچکہ سہب ءِ سہت ۱۰ ءُُ نیم ءَ مجلس بندات بوہگی اَت بلئے مردمانی کساس سے ءُُ چار اَت گوں مہمانداراں بلئے وہدے دیوان بندات بوت گڈاں اے کساس پنجاہ ءُُ ششت ءَ سر بوت ۔

یک گپے من انگت گیش کنگ لوٹاں کہ اے سرنام ’’ شاہ تیریں کماش‘‘ من چہ دیوان ءِ جار چین واجہ سنگت رفیق ءَ چہ زرتگ پرچکہ دیوان ءِ تلاوت ءَ پیش آئیءَ عنقا ءَ را ہمے نام ءَ گوں توار کت کہ من ءَ سک تو بوت ءُُ راستی ءَ عنقا بلوچی زبان ءُُ ادب ءِ شاہ تیراں چہ یکے بوتگ آ دگہ حبرے کہ من ہما شاہ تیر چنچو پہازاِتگ ۔۔۔

دیوان ءَ ساڑئیں درائیں مردمانی سیادی گوں بلوچی ءَ وڑے نا وڑے ءَ است اَت ،دیوان ءِ پاگواجہی ءَ واجہ ڈاکٹر سلیم کرد کنگ ءَ ات کہ وتی دراج بریں گشتانکانی سوب ءَ نامدار اِنت ،ءُُ اے مجلس ءَ ہم آئی ءَ وتی دود برجم داشتگ اَت ،اے گپ ءِ بابت ءَ دیمتر ا تران بیت۔

پیسرا واجہ زاہد دشتی صاحب ءِ بابت ءَ چیزے دانک درشان کنگ لوٹاں کہ آئی ءَ وتی تب ءَ در مرچی وتی گشتانک گوں شئیرے ءَ بندات کت آ دگہ حبرے کہ دیوان چنچو آئیءِ شئیر ءَ سرپد بوت یاکہ نہ بوت ۔

وہدے زاہد صاحب وتی ہما تب ءَ گوں عنقا ءِ احوالکاری ءِ بابت ءَ دیوان ءَ سرپدی دئیگ ءَ اَت داں نیام ءَ یک ورنائے ءِ موبائل ءَ توار کت کہ دیوان ءِ بے چڑکئی ھلاس کت ءُُ درائیں دیوان ءَ ہما ورنا ءِ دیم ءَ چک تراِینت ءُُ چاراِت بلئے واجہ دشتی ءَ ہچ خمار ہم نہ کت کہ دیوان ءَ چشیں واکیا یے بوتگ اَت ۔

مرچیگیں دیوان ءَ من نزاناں کہ واجہ سنگت رفیق ءَ وتی ہمروچگیں تب چیر داتگ اَت ءُُ یک نوکیں دروشمے سہر ءَ کنگ اَت پرچکہ من واجہ ءَ را بازیں دیواناں جار جنی ءَ دیستگ اَت بلئے مرچی گشئے آئیءَ را زبر دل ءَ نہ اَت۔

پمشکاآگچین لبزانی شوہازیءَ ات ۔درائیں مردمانی دلگوش گوں بانگ سیمرا عنقا اِتاں کہ آ بلکیں انچیں نوکیں ترانے کنت کہ چد ءُُ ساری کنگ نہ بوتگ۔

 بلئے آئی ءِ گشتانک چہ خالد خٹک ءِ مقالہ ءَ زرتگینے اَت بلئے بانک ءَ گڈی نزاناں پرچکہ چوش گشت کہ بائد پلان اسکول یا کالج ءِ نام ءَ عنقا ءِ نام ءَ ایر کنگ بہ بیت بانک زنہ بے ترانگ اَت کہ اے یک ادبی مجلسے بوہگ انت ءُُ دیوان ءَ سیاسی سروک ءُُ کارند نیست اَنت باریں کئی گورا آ اے پریات ءَ کنگ ءَ ات۔

دیوان ءَ درستاں چہ گیش ایکٹیو اگاں کسے است اَت داں آ لالہ مجاہد بلوچ اَت تو بزاں دیوان ءَ سرجم ءَ ہمائی ءَ را بڈا اَت۔۔۔۔مردمانی گر ءُُ دار ،چاہ ءُُ چہر ءِ انتظام ءُُ اے دگہ چنائی ءَ من لالہ مجاہد ءَ سک دیریں زاناں آ چشیں دیواناں مدام چاڑکگ انت ۔

منی کش ءِ مردم چنائی ءَ سکیں بے واکیں مردمے اَت من دو ءُُ سے رند ءَ گشت کہ واجہ منی ند ءِ سیاہی ہلاسی بوتگ انت وتی قلم ءَ بدئے گوں آ جوان ہچ سد ءَ اِنت سے چار رند ءَ من آئیءَ گشت کہ منی قلم ءِ سیاہی ھلاس اَنت وتی قلم ءَ بدئے گون ۔۔۔۔۔

پدا اوں پسو نیست ات یکرے دل ءَ گشت بلکیں کرّے ۔۔۔۔پدام سیلان بلوچ ءَ وتی قلم منا دات ۔حیر اجب اے بوت کہ واجہ داد ءِ گشتانک ءَ درائیں مردماں وتی موبائل زرتاں چیزے ءَ پہ عکس بندی ءَ چیزے ءَ آئیءِ تران ءِ ریکاڑ کنگ ءَ بلئے مرچی واجہ ءِ داد ءِ گشتانک انچو وش نہ اَت کہ ساری بوتگ ۔اے منی وتی حیال اِنت بلکیں اے دگہ مردماں دوست بوتگ ۔

آئی ءَ وتی گشتانک ءَ عنقا ءِ چہر ءُُ شبین ءُُ آئی ءِ فارسی گالانی کارمرزی ءِ بابت ءَ گشتگ اَت بلئے وہدے آئیءَ لبز ’۔۔۔۔‘‘ ءِ نام گپت داں پشتی نیمگ ءَ بازین ورنائے ءِ دپ پہ بچکندے ءَ اومان بوت اے حبر ءَ تہنا لُنڈیں مردم زانت کہ بلئے واجہ ءَ ایو کءَ ہما مٹ کہ جنین آدم وتی مہپراں پنگ کن اَنت ءُُ تو پات ءِ پیم ءَ گواپان اِش کن اَنت ہما مٹ انت ۔


باریں اے بچکاں وتی دل ءَ کجام چیززرتگ ات ۔حیر۔۔۔۔واجہ داد ءَ رند ءَ وہدے میڈم زینت ثناء ءَ ہم وتی گشتانک ءَ ہمے مٹ ءُُ سنگار ءِ لبز کارمرز کت گڈاں درائیں مردماں ورنا وت ماں وت سُک سُک اِش یکبرے پدا بندات اش کت ۔۔۔۔بانک ءَ گشتگ اَت کہ عنقا ءَ وتی شاعری ءَ جنین آدمانی سہت ءُُ سنگاری چیزانی نام ہم گپتگ اَنت۔(برجاہ انت