اے حبر ءَ کس ھم رد کْت نہ کنت کہ نیکراہی(مذہب) ءِ سیادی گوں بنی آدم ءِ ذند آہی ءِ روحانی،چاگردی ءْ دود ءْ ربیدگاں گوں پراہءْ شاہگان اِنت.پمیشکا سیاستداناں گوں ملاھاں ھوار مذہب ءَ را وھد ءِ ھمبراہی ءَ وتی ذاتی مقصد ءْ لوٹانی سرجم کنگ ءِ ھاترا کارمرز کْت۔

دومی لہس مہلوک ءِ جیڑگ ھمدا اتکگ ءْ سر بوتگ کہ اے مہے دیمروہی ءْ بہتری ءِ ھاترا جہد کنگ ءَ انت بلے دومی نیمگ ءَ ھمے مذہبی رہشون وتی جند ءِ لوٹانی پورا کنگ ءَ گوں دسگٹ بوتگ انت۔ اے کسانیں سرحال ءِ اندر ءَ ھمے دیم ءَ آرگ ءِ جْہد بوتگ کہ پاکستان ءِ توک ءَ مذہب ءَ را چے وڈ سیاسیءْ کاروباری لوٹ ءْ گْزرانی پورا کنگ ءِ ھاترا کارمرز کنگ بوتگ۔

وھدے کہ مسلم لیگ ءْ آہی ءِ رہشوناں یک جْداھیں مْلکے ءِ لوٹ کْت گڈا آہی ءِ مزنیں نہ منْوک مذہی ٹولی اتاں، کہ آھانی توک ءَ جمیعت علماء ہند، جماحت اسلامی ءْ مجلس احرار درستاں چہ پیش اتاں۔ اشانی گْشگ ھمیش اَت کہ مسلم لیگ ءِ رہشون انگریزی دانشور انت، بزانکہ آ انگیش تعلیم یافتہ انت آھانی مذہبی علم ءْ زانت اکا نی انت ، پمیشکا اشاں اِکا ھاٹیگ مان نیست کہ مسلمانانی رہشونی ءَ کْت بہ کن اَنت، ءْ الگ سر زمینے ءِ لوٹ ءَ بہ کن انت۔

بزانکہ اشانی واھگ ھمیش اَت کہ اے حق تہنا علماھاناں ھست کہ آ ایوک ءَ مذہبی حسابہ مسلمانانی رہشونی ءَ بہ کن انت۔ بلے وھدے 1947 ءَ پاکستان وجود ءَ اتک گڈا آ وھد ءَ جمیعت علما ہند ءَ وتارا ہندوستان ءَ داشت بلے جماعت اسلامی ءَ وتارا اے نیمگ ءَ کش اِت۔ مجلس احرار کہ آھانی بازیں رہشونانی سیادی گوں پنجاب ءَ ات، گڈا اشاں وتی گیشیں وھد قادیانانی غیرمسلم نامینگ ءِ ھاترا ھرچ کْت۔

ھمے وڈا جماعت اسلامی ھما جماعت ات کہ آہی ءَ شریں عملی رنگے ءَ گوں پاکستان ءِ سیاستِ توک ءَ بہر زرت۔ ءْ چہ بندات ءَ حکومت ءِ سرا زور دات کہ پاکستان ءِ دستور اسلام ءِ چیر نظر ءِ ساھگ ءَ اڑ کنگ بہ بیت۔

گڈا اے جاورحالانی توک ءَ لیاقت علی خان)(مرگ 16 اکتوبر 1951) ءَ اے فیصلہ کْت کہ (دینی کواس) علماھانی طاقت ءِ نزور کنگ ءِ واستہ المی انت کہ سرکار مذہب ءَ استعمال بہ کنت پرچا کہ مہلوک مذہبی رہشونی ءِ ھاترا علماھانی نیمگءَ نہ بلکیں سرکار ءِ نیمگ ءَ بیا انت۔ ھمے مول ءْ مراد ءِ ھاترا خان ءَ ہندوستان ءِ علماھاناں ھم دعوت دات کہ آھانی توک ءَ سیدسلیمان ندوی ءْ پروفیسر حمیداللہ پیش پیش اتاں کہ پاکستان ءِ واستہ مناسبیں دستورے اڑ کنگ بہ بیت، بلے علماھانی بحث ءْ کوکاراں چہ پد دستور وَ جوڈ کنگ نہ بوت بلے یک ((قراردادء مقاصد)) ءِ نام ءِ سرا یک ((دستاویزے)) جوڈ کنگ بوت۔

آہی ءَ را 1949 ءَ (( دستور ساز اسمبلی)) ءَ منظور کْت۔ اشی ءِ توک ءَ ھمے جار جنگ بوت کہ ((اقتداراعلیٰ)) ھداوند ءِ نظرانی چیرا بیت ءْ ھچ وڈیں قانون قرآن ءْ سنت ءِ ھلاپ ءَ جوڈ کنگ نہ بیت ءْ دگہ۔ دیمترا قراردادء مقاصد ءَ پاکستان ءِ دستور سازی ءِ توک ءَ جوانیں کِردے پہلو کْت ءْ ضیاء الحق ءِ دورِحکومت ءَ قرارداد مقاصد ءَ را 1973 ءَ دستور ءِ یک بہرے جوڈ کْت۔

اے پشت در ءَ رند پاکستان ءِ راجدپتر چارگ ءْ تپاسگ بہ بیت گڈا اے پدر بیت کہ بنداتی دور ءَ پاکستان ءِ حکمراناں مذہب ءَ را چوں سیاسی رنگ ءَ کارمرز کتگ ءْ سیاسی نزوری ءْ ردیاناں چوں چیر داتگ ءْ مذہب ءِ زور ءِ پدا وتی لوٹ سرجم کتگاں۔ھمے دور انت کہ حکمراناں اے پالیسی جوڈ کت کہ مہلوک ءَ دلجم کنگ ءِ واستہ اسلامی ہنراں دستورءِ توک ءَ جاگہ داینت تانکہ ملاھاناں ھچ وڈا اے موقع مہ رسیت کہ آھانی واستہ سیاست توک ءَ جاگہ ء ے پچ بہ بیت۔ بلے پالیسی آخر کار بے سوب بوت، پمیشکا حکومت ءْ آہی ءِ نیکراہی ءِ استمعال کنگ ءِ کلیں چست ءْ ایر بے سوب بوتاں۔ انچو اے ناکامی ءَ چہ مذہبی ٹولیاناں ءْ گیشتر جماعت اسلامی ءَ را مہو دات کہ آ وتی دیم ءَ آھگ ءِ چست ءْ ایران گیش بہ کن انت ءْ عوام ءِ توک ءَ وتی نام ءْ توار ءَ بْرزبہکن انت۔

بنداتی وھد ءَ جماعت ءِ ٹولیانی دو لوٹ دیم ءَ اتکگ ات اشانی توک ءَ یک گروپے ءِ مول ءْ مراد ہمیش ات کہ جماعت ءَ گوں سیاست ءَ دست ءْ دعواہ مہ بیت، پیسرا چاگرد ءِ دیمروہی ءِ واستہ کار بہ بیت۔

دومی ٹولی ءِ ھیال اش ات کہ سیاست ءَ بہر زورگی انت ءْ پدا ریاست ءِ سرا قبضہ کنگی انت ءْ آوکیں دور ءَ ادا شریعت دیما آرگی انت۔ آخر ھمے ٹولی سوب مند بوت مذہبی ءْ سیاسی پارٹی ءِ شکل ءَ دیم ءَ اتک۔وھدے کہ ضیاالحق ءِ دور اتک 1977،گڈا جماعت اسلامی ءَ مارشل لا، فوجی حکومت ءِ حمایت کْت کہ اشی ءِ زور ء پدا شریعت ءَ بیار انت۔ ضیاالحق ءَ مذہبی جماعتانی پْشت پناہی ءَ چہ وتی فوجی حکومت ءِ نامدار کنگ ءِ جہد کْت ءْ ملک ءِ کْنڈ کنڈ ءَ اسلامی نظام ءِ آرگ ءِ درگت ءَ بازیں مگراگش اڑ دات۔

اے ھما دور ات کہ ریاست ءْ علماھاں ھور یکے دومی ءِ تاوان ءَ گوں مذہب ءَ را سیاسی رنگ ءَ کارمرز کْت۔ اے دور ءِ توک ءَ ھم مذہب ءِ کارمرز کنگ ءْ دومی نیمگ ءَ نظامِمصطفےٰ ءِ نعرہ ءِ جَنگ ءْ مہلوک ءَ ھمے باور کناینگ کہ اے نظام ءَ کہ حکومت آرگ لوٹگ ءَ انت اے اسلامی نظامے ءْ عوام ءِ بہتری ءِ واستہ انت. اے میان ءَ وانگجاھانی کتاب اسلامی جوڈ کنگ بوتاں ءْ سوجکاراناں ھمے گْشگ بوت کہ ہر چیزے وانین ات آ اسلامی علم ءِ مطابق ءَ بہ بیت۔

دیمترا ((رابطہ ہی)) ،کارانی توک ءَ ھم اسلامائزیشن ءِ پروگرام آرگ بوت، چوشکہ ” خداحافظ” ءِ بدل ءَ “اللہ حافظ ” ءِ گشگ ءِ رواج ءَ عام کنگ، اے بدلی ءِ پشت ءَ ھمے خیال ات کہ پاکستانی چاگرد ءَ چہ ایرانی اثراتاں ھلاس کنگ ءْ عربی کلچر ءَ را عام کنگ ات(برجاہ)