منی پت ءَ وتی زند ءَ بازیں پرشت ءُُ پروشے دیستگ ،زند بکشوک ءُُ گروک حدا وند انت ،منی پت ءَ گوں آئیءِ زند ءَ بازیں وئیل ءُُ واکیائے سر ءَ کپتگ اَت بلئے حدا ءَ آئیءِ زند مدام پہازاِتگ ،کسانی ءَ آئیءَ را گرمپک ءِ گور جتگ اَت کہ آوہداں اے اوں یک بے علاجیں نادراہی یے ات۔بلئے آئی ءِ بحت ءَ پہ راج ءُُ بلوچی لبزانک ءَ زانہ بازیں کارے نبشتہ اَت ۔

کراچی ءَ الکاپیں اعلاجے ءَ رند ءَ وہدے آ دراہ بوت داں ہمود ا یک حرگاڑی ءَ گوں راہ رواجی آئیءَ جت ءُُ آئیءِ پہلو ءُُ پادے پرشت بلئے ہمود علاجے کت ءُُ دراہ بوت۔منی پت ءَ را وانگ ءِ باز ہب ءُُ واہگ است ات بلئے ۱۹۶۵ ءِ وہد ءَ آئیءِ پت بزاں منی ابی ءَ دنیا یلہ دات داں آئیءِ وانگ ءِ در بند بوت۔پدا دیر نہ بوت کہ منی ماتی ءُُ آئی ءِ مات اوں بیران ءُُ رند ءَ لوگ ءِ ذمہ واری ءُُ اوں ہمائی ءِ کوپگاں شت ۔منی پت ءَ رالبزانک ءِ ہب ءُُ واہگ چہ کسانی ءَ بوتگ اَت بلئے بلکیں بازیں مردم مہ زانت کہ آئیءَ را ساز ءُُ زیمل ءِ ہم شوق بوتگ ۔

بلئے بلوچی لبزانک ءَ آ وہداں تژن ءُُ بچکند ءِ نیمگ ءَ کس ءَ انچو زور نہ داتگ اَت داں منی کماش ءَ ہمے پڑ ءَ نبشتہ کنگ بندات کت ءُُ داں زند ءِ گڈسر ءَ آ گوں ہمے پڑ ءَ بندوک اَت ۔

وانوکانی دلبڈی ءِ سوب ءَ آئی ءَ تژن ءُُ بچکندی دو کتاب ،بیلءُُ آلاڈ،ءُُ دومی کتاب پدگوانک نبشتہ کتءُُ چاپ کتاں ۔منی پت ءَ نہ ایوک ءَ ردانک بلکیں شاعری ءِ پڑ اوں بچکند نویستگ ات۔ 

شاعری ءَ آئیءَ وتی پنام ناکو تیابدپی ایر کت ءُُ یک شعرے کتابے ،گواتی ءِ مات،چاپ کت۔پدا دومی شعری کتاب چنگال ءِ کہ انگت ءَ چاپ نہ بوتگ منی واہگ انت کہ من آئیءَ چاپ بہ کناں ۔ منی کماش ءَ وتی زند پہ زبان ءُُ لبزانک ءَ سرجم ءَ ندر کتگ اَت بلے آئیءَ را انچو موہ نہ رست کہ آ زبان ءُُ لبزانک ءِ ہمے پڑاں گیشتر کار نہ کنت سال ۲۰۱۷ ءَ جولائی ءِ ماہ ءَ بلوچی اکیڈمی کوئٹہ ءَ منی پت ءِ نام ءَ یک دیوانے جم داتگ اَت ءُُ کوئٹہ ءَ آئیءِ زندءِ گڈی مراگش ہمے ات،پت نادراہ اَت آئیءِ گٹ انچو حراب ات کہ آئیءِ توار اوں درنہ کپت بلئے آئی ءَ انگت گوں پچ روحی ءَ اے دیوان ءَ بہر ءُُ مردمانی حاتر وش کت۔کراچی ءَ ہمے نادراہی ءِ جیڑہ ءَ شتگ اَت ۔

وہدے لوگ ءَ واتر بوت داں بلوچی ءِ نمیرانیں شاعر جی آر ملا ءِ سالروچ اَت اے مراگش ءَ اوں منی پت ءَ بہر زرت ۔منی پت ءَ را گٹ ءِ کینسر اَت بلئے آئی ءَ اے گپ بہہ نہ مارات آئیءَ زانتگ ات کہ زند ءُُ مرگ حداءِ دست انت ءُُ مرگ پہ ہرکس ءَ حق انت ۔آ دل سدک اَت کہ پہ زبان ءُُ لبزانک ءَ آئی ءِ چیزے پُشت ءَ یل کتگ ات آئیءَ دائم زندگ داریت ۔

من پت ءَ را ہچبر ملوری ءَ نہ دیستگ آئیءَ را مال ءُُ دولتے نہ بوتگ بلئے بہہ ملور نہ بوتگ ڈاکٹراں وہدے کراچی ءَ آئی ءَ را گشت کہ تئی گٹ ءِ کینسر گڈی جاہ ءَ سر بوتگ آ انگت ءَ ملور نہ بوت بلئے گوں حدا ءَ کئی دست رست کنت ۱۵ دسمبر ۲۰۱۷ ءِ بیگاہ ءِ شش بج ءَ منی پت ءَ امروز یلہ دات ۔منی وتی کماش ءِ ازم ءُُ آئی ءِ کارانی سرا پہر اِنت کہ من اکرم صاحب خان ءِ زہگ اَت۔

پت ءِ مزن نامی من ہما روچی زانت کہ بلوچی اکیڈمی ءَ من پہ درآمدی شتاں بلئے ہرکس ءَ من ءَ زانت کہ اے اکرم صاحب ءِ زہگ انت،داں درساں پہ چکی پتے من ءَ مہر دات۔