جمالیاتی زانت اگاں ساپ بہ بیت گڑا ایشی ءِ بنیاد ءَ چاگرد [environment]ءِ چیزانی یات کنگ پہ مارا یک کارآمدیں واسیلہ یے زانگ بیت ءُْ ایشی ءِ بنیاد ءَ مردماں علم ہم دئیگ بیت۔ اے جمالیات مردماں جتا نہ کنت پرچہ کہ اے جمالیاتی پہم ہر یکے ءِ الکاپیں تجربہ[sharp experience] ءَ چہ ودی بیت۔ پدا ہمے تجربہ پہ ایدگراں ہم تصدیق بوہان بیت[testimony to others]۔ 

جمالیاتی چاگرد [aesthetical environment] وتی ذات ءِ تہا غایتی[teleological] اِنت، ایشی ءَ گوں مول ءْ مْرادے بندوک اِنت کہ پہ ہر یکے ءَ لموس [palpable] اِنت۔ اے لموسیں جمالیات ءَ مڈیجا پمیشکا تعلیمی گْشیت کہ ایشی ءِ بنیاد ءَ مردم وتی چاگرد ءِ بابت ءَ سرپد بنت۔اگاں ما یک شعرے مثال ءِ گپ ءَ او ٹلو ٹالو ءَ پہ درور ءَ بْزوریں ءُْ بْگشیں کہ اے عومر کیلکوری ئیگ اِنت۔ 

بلئے پدا ہم لموس بوہگ ءِ بنیاد ءَ اے گشئے ہر ہما بلوچ ئیگ اِنت کہ ہما دمگ ءِ چاگرد ءَ سرپد اِنت ءْ ہمودا زندے گوازینگ ءَ اِنت۔ چونائی ءَ ما ایشی ءَ ’ یکے‘ ہم بْگشیں گڑا ایشی ءِ مطلب بیت ’ہمے یکیں نام یک بنزہ یے کہ چاگرد ءِ ایدگہ مردماں گوں بہر [share]بوہان اِنت‘۔

اے وڑ بوہگ ‘ ازمی زمینہ [discipline] ءِ تہا یک زندگیں متبادلے [viable alternative] سما بیت۔ اے وڑا ازم غایتی بیت۔ اے وڑا جمالیاتی بنیاد ءَ چاگرد ءِ پہمگ ءِ دَر پچ بنت ءْ چاگرد تجربہ ءِ ’روان‘ [flow] ءِ بنیاد زمینہ ءْ گیگ بوہان بیت۔‘ ازم ءِ بنیاد ءَ اے کارانی تہا زمینہ ءِ رِد ءَ مْچی [collectivity]ءِ سما ودی بیت۔ اے کار مئے جمالیاتی ایجوکیشن اِنت۔ 

اے درگت ءَ نہ لوٹیت کہ ما زانت ءَ بہربہر[compartmentalization] بکنیں کہ ما اے زانت ءَ سائنس ءِ تہا بکنیں یا آرٹس ءِ بلکیں اے یک گنجیں زانشے بیت کہ دْرستاں وتی اندر ءَ جاہ دنت۔ اے دْراہیں گپاں چہ مارا اے درس رسیت کہ انسانی رویّہ ہما چیز ءَ پیش داریت کہ چہ ہمائی ءَ انسان متاثر بوتگ۔ اے درس جمالیاتی زانت اِنت۔