انور ءُُ پرواز ،کریم ءُُ جوہر ءُُ شات ءُُ زہیر
گڈ چہ من پربندانت پہ دستونک ءَ موتک ءُُ مودگاں 
(سید ہاشمی)
بژن ایش انت کہ تنگا اکرم صاحب خان ءِ بیرانی ءِ ٹپ نہ وش ءُُ زیمیگ ات انت کہ آئی ءِ برات ءُُ بلوچی زبان ءِ دستونک ءِ مزن نامیں شاعر انورصاحب خان ءَ بلوچی لبزانک موتکی کت ۔انور صاحب بلوچی لبزانک ءُُ گچینی شاعری ءَ ہما نام ات کہ آئی ءَ ایوک ءَ وتی شاعری ءُُ لبزانکی سنچ ءَ را نہ پلگار ات بلکیں وتی کش ءُُ کر ءَ بود ءُُ آکبتے بکشات ،اے درچ ءَ ایوک ءَ پسنی ناں درائیں بلوچی لبزانک ءَ را آئی ءَ پونزے دیم ءَ دات ۔

انور صاحب خان ایوک ءَ شاعرے ءُُ لبزانکی جہد کارے نہ ات بلکیں آئی ءَ اسٹیج کسمانکاں ازمکاری ہم کتگ ءُُ نوکیں دور ءَ بلوچی ٹلی فلماں ہم ایشیءَ ہوار انور صاحب خان جوانیں بینجو جنوکے ہم بوتگ آئی ءِ بینجو ءِ استاد نور محمد ات۔ انور صاحب خان ءَ گوں زیمر ءَ مزنیں حب ءُُ واہگے بوتگ۔ اے بابت ءَ آئی ءَ کیچ ءُُ پسنیءَ بنداتی روچ ءَ زیمر ءِ دیمروئی ءِ حاترا بازیں گل ہم شرکتگ تنکہ بلوچ ازمکارانی زیمری ہیئل کاری بہ بیت ۔انور صاحب خان 1945 ءَ کہدہ صاحب خان ءِ گس ءَ ماں پسنی ءَ ودی بوتگ ۔ انور صاحب خان ءَ وتی بنداتی وانگ ءُُ زانگ چہ پسنی ءَ دربرتگ ۔

آئی ءَ وتی شاعری ءِ بندات 1969 ہما روچاں کتگ کہ وہدے آ اولی وار کار ءُُ روزگار ءِ ھاترا پہ دبئی ءَ شتگ اَت ۔ہمے زمانگ ءَ آئی ءِ بازیں دستونک ءُُ لچہ یے ماں ’’زمانہ‘‘،ءُُ ماہتاک ’’بلوچی‘‘ ءَ شنگ بوت انت ۔ زیمر ءُُ اسٹیج کسمانکاں بہر زورگ ءُُ دیمروئی ءَ ہوار انور صاحب خان ءِ بلوچی تاک ءُُ تاکبندانی دیمروئی ءَ ہم مزنیں دستے بوتگ ۔ پسنی لبزانک ءُُ وانشتی کارانی دیمروئی ءَ انور صاحب خان گوں وتی برات اکرام صاحب خان ،مبارک قاضی ءُُ ایندگہ لبزانکی مردماں گوں مدام ہم کوپگ بوتگ ۔

دبئی ءَ واتر کنگ ءَ پد آئی ءَ پاکستان ءِ استانی بینک نیشنل بینک ءَ کار کتگ کہ وتی کار ءِ وہد ءَ ماں تربت ءَ 1973 ءَ آئی ءَ یک زیمری گلے جوڑ کت ۔ ہمے گل ءِ باپشت ءَ انور صاحب خان ءَ بلوچی نامداریں گشندہ ءُُ پہلوان واجہ سبزل سامگی ءَ را سک باز دلبڈی دات ءُُ آئی ءِ دیم برگ ءِ ھاترا سک باز جہد کت ہمے دو رءَ سبزل سامگی ءُُ انور صاحب خان ءِ بازیں شئیرے وتی وشیں توار ءَ الہان کت کہ آئی ءِ سوب ءَ انور خان ءِ ماں بلوچستان ءَ ءُُ پہ گچینی مکران ءَ یک شاعرے ءِ نام ءَ سک نامدار بوت پدا وہدے انور صاحب خان 1980 وہدے وتی جند ءِ ہنکین پسنی ءَ بدل بوت گڑا آئی ءَ کیچ ءِ ہمگونگی ءَ یک زیمری گلے ماں پسنی ءَ ہم جوڑ کت کہ آئی ءِ نام ’’ اسٹار میوزک کلب‘‘ ایر کنگ بوت ۔

ہمے زیمری کلب ءُُ انور صاحب خان ءِ لبزانکی جہدانی برورد انت کہ مرچی پسنی زیمر ءُُ لبزانکی پڑ ءَ بلوچستان ءِ سر ءِ تاج انت ۔ اشی ءَ ہوار 1983 ءَ انور صاحب خان ءِ جہدانی برکت ءَ اولی وار ءَ ماں پسنی ءَ اسٹیج کسمانکی مراگش کنگ بوت انت ۔وشیں گپ ایش انت کہ ہما کسمانک آئی ءَ وت نبشتہ کتگ اتاں ۔

اشنیا سوت ہم وت نبشتہ کت انت ہمے کسمانکاں وت ازمگری کت ،کسمانکانی تہا جتگیں شئیر ءُُ سوتانی ترز ءُُ دھن ہم وت جوڑ کت انت ۔ ادا چہ اے گپ ہم گیر آرگی انت کہ انور صاحب یک جوانیں شاعرے ءِ ہمرائی ءَ یک جوانیں کمپوزرے ہم است ات ۔

آئی ءِ بازیں سازتگیں سوت ءُُ شعر بلوچی زبان ءِ نامداریں گشندہ ءُُ پہلواناں جتگ ات کہ آہانی بے حال کنگ پہ بلوچی زیمر ءِ دوست داروکاں گران انت انور صاحب خان ۳ اگست ءَ اے کوڑہیں دنیا یلہ دات ءُُ بلوچی لبزانک پرسیگ کت اللہ آئی ءَ را وتی رحمتانی چیرا جاہ بدنت ءُُ آئی ءِ پش پداں صبر ءِ آٹیگ ءَ بدنت ( آمین)