بانک سمی پرواز بلوچی زبان ءِ نامداریں ندکار غنی پرواز ءِ جنک اِنت۔واجہ پرواز ءَ انچو کہ وت بلوچی لبزانک ءِ بازیں پڑ ے ءَ کار کتگ ءُُ بلوچی لبزانک ءَ گیشی آورتگ آئی ءَ ہمے حب ءُُ واہگ وتی زہگانی دل ءَ ودی کتگ آئی ءِ بچک محسن بالاچ ہم بلوچی زبان ءَ شاعری ءُُ آزمانک نبشتہ کنت ۔

بانک سمی پرواز ءِ پڑ آزمانکاری اِنت ءُُ اے تک ءَ دگہ چیزے کتاب اوں آئی ءِ چاپ بوتگ ءُُ اردو نظمانی کتابے ’’عذاب لمحوں کے غمکدے میں‘‘چاپ بوتگ ۔بانک ءِ اے کتاب کہ ایشی ءِ بابت ءَ چیزے گپ دل ءَ است انت۔

کہ گوں وانوکاں درشان اِش کنگ لوٹاں ۔اے کتاب ءِ سرجم ءَ سی ءُُ سے آزمانک ہوار کنگ بوتگ ءُُ ہمک آزمانک ءِ یک جتائیں بنگپے زانگ بیت ۔چنائی ءَ ہمک ندکار ءِ وتی یک بنگپے ءِ ہمرائی ءَ یک جتائیں درشانے اوں است بیت بلئے بانک ءِ درائیں آزمانکانی وانگ ءَ رند ہم نئے آئی بنگپ گپ مارگ بیت ءُُ نئے آئی درشانداب ،آں جا ہے جاہے آئیءِ پت واجہ غنی پرواز ءِ سمائی الم بیت ۔

بزاں بانک ءَ چہ ہمائی ءَ سان زرتگءُُ نبشتہ کنت۔بانکیں بازیں آزمانکانی ہما کہ بنکی تھیم اِنت آ اوں باز براں پہم ءَ نیئت انت چوکہ’’ Complicated‘‘ ،دیوال، پیژ ناہ ءِ گلمت اے انچیں آزمانکاں کہ پہم ءَ نیاں کہ ایشانی بن ءُُ بنگپ چے اِنت،یا بوت کنت کہ من اِش زانت مہ کناں ۔

ہمے آزمانک نئیت ءَ پلگار ءَ آئیءَ را وتی کارست جزباتی دروشم ءَ پیشدارگی اِنت دلگوش کن اِت کہ آ چتور جذباتی بیت ’’ گرک بہ باتے شما مناکشت ءُُ ایر کت امروز ءِ سجہیں روچاں من دل ءُُ شزاراں دل ریشیں چکانی سرا جاک جت ءُُ گشت‘‘ اے رداں جذباتی جزگ وَ مان نیست انچو سما بیت کہ نوک نبشتہ کارے نبشتہ کنگ ءَ بہ بیت ۔

گشنت کہ ہما ندکار سوبمند انت کہ وتی وانوک ءَ ہما ندارگاں لبزانی دروشمءَ پیش بدار ایت گریوگی جاہ ءَ ارس دربہ کنت کندگ بہ پرمائیت ہما ندکار سوب مند انت بلئے آ ندکار ءِ وانگ ءَ اگاں سر درد بہ کنت بزاں آ انگت ءَ پُہت ءَ نہ انت ءُُ بانک سمی پرواز ءِ بابت ءَ ہمے گشت گہتر انت کہ آئیءِ درشان انگت ءَ پہک نہ انت بلکیں آئیءِ وانگ ءَ اے سمائی نہ بیت کہ یک آزمانکے روگ اَنت باز باریں وَ نبشتانکے ءِ پہم ہم پگر ءَ کیت ۔

باز براں انچو سمائی بیت کہ آ ایوک ءَ لبز بازی کنگ ءَ انت ءُُ آئیءِ گپ وتسریں گپاں کہ گوں پلاٹ ءَ آئی ءِ سیادی نیست انت چوکہ گٹ گیریں چکاس ءِ اے رداں بچار ات’’ بیلڈ پدا چست کت ءُُ نان ءِ تانگ ءَ لگ ات کمے تانوک ءَ پرکت ءُُ دستے گشاد گشاد ءَ کار کنگ ءَ لگ اتاں نارشتاں گشئے سچگ ءِ بو پشار داتگ ات آئی آستیگ پرلیٹینت ءُُ نارشت ایر کتاں۔‘‘ اے رداں گوں پلاٹ یا کہ گوں کسہ ءَ ہچی سیادی نیست انت بلئے ہوار کنگ بوتگ انت ایوک ءَ ردانی گیش کنگ ءَ چنائی ءَ آزمانکے ءِ رِد گچین بنت پرچکہ ناولے نہ انت کہ دراج کشی کنگی انت آزمانکے ءِ جواناں چہ یک جوانی یے ہمیش انت کہ کمو رداں چہ مزنیں حیالے ءِ درشان کنگ ۔

بانک ہچ آزمانک ءَ چشیں رِدے گندگ نہ بیت کہ سرجمیں حیالے درشان بہ کنت بلکیں ہمک حیال ءِ درشان ءَ بازیں ردے پکار بوہگ ءَ انت ءُُ باز انچیں رد کہ گوں کسہ ءُُ کسہی پلاٹ ءَ سیادی یے اوں نیست بلئے ہوار کنگ بوتگ انت ۔

ءُُ حیال وتی مانشگی ءَ پیمگ نہ بنت چوکہ ’’ وتی بے گوائی‘‘ ءَ آئیءَ نبشتگ کہ ’’ استالانی لنت لونجان ات انت ءُُ یک روشنائیں تہار ماہی یے ہر دمک ءُُ کنڈ ءَ جمبرئیگ ءَ مان شانتگ ات‘‘ اگاں شعرے بوتگیں داں پہمگ بوتگ اَت چہر ءِ نام دئیگ بوتگ اَت بلئے روشنائیں تہار ماہی یکجا چتور۔۔۔۔۔ءُُ کجام استالاں لنٹ پر۔۔۔۔۔انچیں بازیں بے ردیں ردانی ہواریں گچینے پہ وانوک ءَ چاپ کنگ بوتگ ۔جہد جوان اِنت ءُُ بلوچی لبزیاتی ءِ ہم جوانیں کوشش کنگ بوتگ بلئے ردانی تچک کنگ ءَ بانک بے سوب بوتگ ۔