وزیر اعظم عمران خان نے کہا ہے کہ ملک میں سرکس لگی ہوئی ہے۔ اپوزیشن کیسز معاف کرانے کے لیے مجھے بلیک میل کر رہی ہے۔ جتنے مرضی جلسے کر لیں جب تک قوم کا لوٹا ہوا پیسہ واپس نہیں کریں گے میں انہیں نہیں چھوڑوں گا۔حافظ آباد یونیورسٹی کے سنگ بنیاد اور جدید سہولیات سے آراستہ اسپتال کی تعمیر کی تقریب سے خطاب کرتے ہوئے وزیراعظم نے کہا کہ جنہوں نے 30 سال میں ملک کو لوٹا اب انہوں نے سرکس لگائی ہے۔ ہم نے ان کے خلاف نئے کیسز نہیں بنائے، یہ انہوں نے ایک دوسرے کے خلاف بنائے تھے۔ ان کے دور میں نیب غلام تھا، ہمارے دور میں نیب آزاد ادارہ ہے۔
چیئرمین پیپلز پارٹی بلاول بھٹو زرداری کا کہنا ہے کہ پی ڈی ایم کے جلسے میں فوجی قیادت کا نام لینا مسلم لیگ ن کے قائد نواز شریف کا اپنا فیصلہ تھا۔گزشتہ روز غیرملکی خبررساں ادارے کو انٹرویو دیتے ہوئے بلاول بھٹو زرداری کا کہنا تھا کہ پی ڈی ایم کے جلسے میں نواز شریف کی تقریر سن کردھچکالگا، انتظار ہے کہ نواز شریف کب ثبوت پیش کریں گے۔ان کا کہنا تھا کہ عام طور پر ہم جلسوں میں اس طرح کی بات نہیں کرتے، فوجی قیادت کا نام لینا نواز شریف کا ذاتی فیصلہ تھا، ان کی اپنی سیاسی جماعت ہے۔
نیب بلوچستان نے گزشتہ روز اپنے جاری کردہ بیان میں کہا ہے کہ ریکوڈک منصوبے میں قومی خزانے کو کھربوں روپے کا نقصان پہچانے والے عناصر بے نقاب ہوچکے ہیں، نیب نے 30 سال کے ریکارڈ کی چھان بین کے بعد ملزمان کے خلا ف نا قابل تردید ثبوت اکھٹے کر لئے ہیں،ریکوڈک میں ہونے والے کرپشن میں حکومت بلوچستان کے سابق اعلیٰ عہدیداران سمیت 26 افراد کے خلا ف ریفرنس دائرکیا گیا ہے۔ نیب کے مطابق ملزمان نے ذاتی مفادات کے حصول کے لیے قومی مفادات کی دھجیاں اڑائیں جس سے قومی خزانے کو ناقابل تلافی نقصان پہنچا۔
وفاقی ادارہ شماریات نے مہنگائی سے متعلق ہفتہ وار اعداد وشمار جاری کردئیے۔ رپورٹ کے مطابق ایک ہفتے کے دوران مہنگائی میں 1.38 فیصد اضافہ ریکارڈ کیا گیا اور 17 اشیائے ضروریہ کی قیمتوں میں اضافہ دیکھا گیا۔ آلو، پیاز، ٹماٹر، لہسن، چینی، انڈے، گوشت اور ایل پی جی کی قیمتوں میں اضافہ ہوا۔رپورٹ کے مطابق ایک ہفتے کے دوران ٹماٹر کی اوسط فی کلو قیمت میں 62 روپے 79 پیسے اضافہ ہوا جس سے ٹماٹر کی فی کلو قیمت 134 روپے 80 پیسے سے بڑھ کر 197 روپے 59 پیسے ہوگئی۔
وزیراعظم عمران خان نے کہا ہے کہ اب اپنی صنعتیں بند نہیں کریں گے کیونکہ ملک دوبارہ لاک ڈاؤن کا متحمل نہیں ہوسکتا۔ وزیراعظم عمران خان نے چھوٹی صنعتوں کے لیے پیکج کا اعلان بھی کیاہے۔وزیراعظم نے کہا کہ چھوٹی صنعتوں کو اضافی بجلی 50 فیصد سے قیمت پر فراہم کریں گے۔وزیراعظم عمران خان کا کہنا تھا کہ دنیا میں کورونا کی دوسری لہر تیزی سے پھیل رہی ہے اور پاکستان میں بھی کیسز بڑھ رہے ہیں لیکن اللہ تعالیٰ نے پاکستان پر بہت کرم کیا، ہم نے فیصلے سوچ سمجھ کر کیے۔انہوں نے کہا اگر کورونا بڑھا تو صنعتیں اور بزنس بالکل بند نہیں کریں گے۔
بلوچستا ن میں سیاسی درجہ حرارت بڑھتا جارہا ہے پی ڈی ایم کوئٹہ جلسے کے بعد مسلم لیگ ن کی صوبائی قیادت کے دو مؤقف سامنے آئے ہیں جس میں ایک نواب ثناء اللہ زہری کو جلسہ کی دعوت نہ دینا جبکہ دوسرا مسلم لیگ ن کا حالیہ اسٹیبلشمنٹ کے خلاف بیانیہ ہے۔ اب تک جو اطلاعات اور بیانات سامنے آئی ہیں ان کے مطابق جنرل عبدالقادر بلوچ نے اپنے عہدے سے مستعفی ہونے کافیصلہ کیا ہے ان کا کہنا ہے کہ موجودہ صورتحال پر پرانے اور نئے ساتھیوں سے مشاورت کرونگا جس کیلئے 7نومبر کو اجلاس بلایاہے اس کے بعد حتمی فیصلہ کر کے اپنا واضح مؤقف پیش کرونگا۔
وفاقی وزیر اطلاعات شبلی فراز نے کہا ہے کہ ملکی اداروں میں ٹکراؤ پیدا کرنے کی کوشش کی جا رہی ہے۔وفاقی وزیر اطلاعات شبلی فراز نے پریس کانفرنس کرتے ہوئے کہا کہ پاکستان میں اس وقت ہائبرڈ وار چل رہی ہے اور ملک میں نفسیاتی اور حقیقی طور پر ناامیدی کا تاثر دیا جا رہا ہے۔ڈان لیک،آل پارٹیز کانفرنس (اے پی سی)، پاکستان ڈیموکریٹک موومنٹ (پی ڈی ایم) مزارقائد، گوجرانوالہ اور کوئٹہ جلسہ سب نے دیکھا جہاں اداروں میں ٹکراؤ کی کیفیت پیدا کرنے کی کوشش کی جا رہی ہے۔وفاقی وزیر نے کہا کہ کراچی میں مزار قائد کی توہین کی گئی اور بلوچستان کے خلاف بات کی گئی۔
وفاقی وزیر اطلاعات شبلی فراز نے کہا ہے کہ ملکی اداروں میں ٹکراؤ پیدا کرنے کی کوشش کی جا رہی ہے۔وفاقی وزیر اطلاعات شبلی فراز نے پریس کانفرنس کرتے ہوئے کہا کہ پاکستان میں اس وقت ہائبرڈ وار چل رہی ہے اور ملک میں نفسیاتی اور حقیقی طور پر ناامیدی کا تاثر دیا جا رہا ہے۔ڈان لیک،آل پارٹیز کانفرنس (اے پی سی)، پاکستان ڈیموکریٹک موومنٹ (پی ڈی ایم) مزارقائد، گوجرانوالہ اور کوئٹہ جلسہ سب نے دیکھا جہاں اداروں میں ٹکراؤ کی کیفیت پیدا کرنے کی کوشش کی جا رہی ہے۔وفاقی وزیر نے کہا کہ کراچی میں مزار قائد کی توہین کی گئی اور بلوچستان کے خلاف بات کی گئی۔
کوروناوائرس کے سبب پاکستان میں مزید16 افراد جان کی بازی ہار گئے اور مرنے والوں کی مجموعی تعداد6 ہزار775 ہوگئی۔نیشنل کمانڈ اینڈ آپریشن سینٹر کے مطابق بدھ کے روز تک کورونا کے908 نئے کیسز رپورٹ ہوئے اور متاثرہ افراد کی مجموعی تعداداب 3 لاکھ31ہزار108 ہوگئی ہے۔پاکستان میں 3ماہ بعد ایک روز میں 900سے زائد کیسز رپورٹ ہوئے ہیں۔ ملک میں 3 لاکھ12ہزار638کورونا مریض صحت یاب ہوچکے ہیں اور ایکٹو کیسز کی تعداد11 ہزار695ہوچکی ہے۔کورونا وائرس کے باعث پنجاب میں 2 ہزار 347 اور سندھ میں 2 ہزار 611 اموات ہو چکی ہیں۔
بلوچستان نیشنل پارٹی کے سربراہ سردار اختر مینگل کی مسلم لیگ ن کے مرکزی نائب صدر مریم نواز سے گزشتہ روز لاہور جاتی امراء میں ہونے والی ملاقات کے حوالے سے مختلف قیاس آرائیاں چل رہی ہیں خاص کر ایک بار پھر بلوچستان حکومت کو گرانے کا تذکرہ کیاجارہا ہے کہ دونوں رہنماؤں کے درمیان ہونے والی اس ملاقات میں سب سے زیادہ فوکس بلوچستان کی سیاست کو کیا گیا تھا اور اسی پر بات چیت کی گئی تھی کہ بلوچستان میں آئندہ سیاسی حکمت عملی کو کس طرح مرتب کرتے ہوئے آگے بڑھایاجائے گا اور صوبائی حکومت پر دباؤ میں شدت لائی جائے گی خاص کر عدم اعتماد کی تحریک کی فضاء کو کس طرح بناکر اسے کامیاب کیا جاسکتا ہے۔
