نیشنل پارٹی کے مرکزی رہنماء،بلوچستان کی بزرگ قومی سیاسی شخصیت میر حاصل خان بزنجو 63برس کی عمر میں کراچی میں انتقال کر گئے جن کی تدفین آج آبائی علاقے نال میں کی جائیگی۔نیشنل پارٹی کی جانب سے میرحاصل بزنجو کی ناگہانی وفات پر دس روزہ سوگ کا اعلان کیاگیاہے، نیشنل پارٹی کے مرکزی سیکرٹری جنرل جان محمد بلیدی کے مطابق نیشنل پارٹی کے مرکزی رہنماء سینیٹر میرحاصل خان بزنجو کو جمعرات کو طبیعت ناساز ہونے پر کراچی کے نجی ہسپتال منتقل کیا گیا جہاں وہ دوران علاج انتقال کر گئے، میر حاصل بزنجو کینسر کے عارضے میں مبتلا تھے۔
دنیا کے کسی بھی ملک کی پہلی ترجیح معیشت کی بہتری ہوتی ہے جس کیلئے بڑے پیمانے پر وسائل خرچ کئے جاتے ہیں خاص کر ان شعبوں میں جو ملک کے اندر سرمایہ کاری کے فروغ کیلئے سودمند ہوتے ہیں اور اسی بنیاد پر پیداوارمیں اضافہ سمیت وسائل کو بروئے کار لاتے ہوئے آمدن کو بڑھایاجاتا ہے تاکہ ملک کے اندر موجود دیگرشعبوں میں سرمایہ کاری کی جاسکے اور اس سے روزگار کے مواقع پیدا ہونے کے ساتھ ساتھ برآمدات میں اضافہ ہوتاکہ ملکی مصنوعات کو دیگر ممالک تک رسائی مل سکے اور اس طرح تجارتی سطح پر تعلقات کو استوار کرکے عالمی سطح پر اپنی سفارتکاری کو بڑھایاجاتا ہے۔
وفاقی حکومت نے دوسال کے دوران وزراء کی کارکردگی کی رپورٹ جاری کردی ہے، وفاقی وزیر اطلاعات شبلی فراز کا کہنا ہے کہ جمہوریت میں حکومت عوام کے سامنے جوابدہ ہوتی ہے اور ہم عوام کے سامنے حکومت کی 2سالہ کارکردگی پیش کریں گے۔ان کا کہنا تھا کہ ہماری سیاست کا مقصد فلاحی ریاست کا قیام ہے۔ ہم ذاتی مفادات کے لیے سیاست نہیں کرتے۔احتساب، انصاف، میرٹ اور پسماندہ طبقے کی ترقی وزیراعظم کا وژن ہے۔
وزیراعظم عمران خان کے معاون خصوصی برائے صحت ڈاکٹر فیصل سلطان نے ملک میں کورونا کیسز بڑھنے کے خدشے کا اظہار کردیا۔ڈاکٹر فیصل سلطان کا کہناتھا کہ پاکستان میں کورونا کے کیسز بڑھنے کا خدشہ برقرار ہے، عوام کی ذرا سی بے احتیاطی وبا کے دوبارہ پھیلاؤ کا باعث بن سکتی ہے۔انہوں نے کہا کہ کورونا کیسز میں کافی حد تک کمی آرہی ہے لیکن ہمیں ماسک کا استعمال کم نہیں کرنا، بد احتیاطی سے ہم دوبارہ اسی صورتحال میں واپس جاسکتے ہیں۔معاون خصوصی برائے صحت کا کہنا تھا کہ پاکستان میں کیسز بڑھنے اور کم ہونے کا انحصار ہمارے اوپر ہے۔
وزیر اعظم عمران خان نے یوم آزادی کے موقع پر قوم کو خوشخبری سناتے ہوئے کہا کہ آئی پی پیز سے طویل مذاکرات کے بعد ہمارا معاہدہ ہوگیا جس سے بجلی سستی ہوگی۔ وزیراعظم عمران خان نے کورونا سے متعلق بات کرتے ہوئے کہا کہ شاید ہی کسی قوم نے اس کامیابی سے وبا میں ایسا بیلنس کیا ہو جیسا پاکستان نے کیا، ہمارے اقدامات پر لوگوں نے مثبت رد عمل دیا، آج معیشت بھی چل رہی ہے اور ملک میں کورونا کے کیسز بھی کم ہوئے۔ ہمارے 2 سال مشکل گزرے، اس کے بعد معیشت اٹھی، جب حکومت ملی تو زرمبادلہ کے ذخائر نہیں تھے، قرض واپس کرنا مشکل تھا، جب روپیہ نیچے گرتا ہے تو باہر سے خریدی جانے والی چیزیں مہنگی ہوجاتی ہیں، جانتا ہوں کہ کس طرح لوگوں کے حالات مشکل تھے اور اب بھی ہیں لیکن خوشخبری یہ ہے کہ اب حالات بہتر ہورہے ہیں۔
متحدہ عرب امارات اور اسرائیل معاہدے پر پاکستان کا ردِ عمل سامنے آیا ہے۔ترجمان دفتر خارجہ کا کہنا ہے کہ یو اے ای اور اسرائیل معاہدہ کا معاملہ ہمارے علم میں ہے۔انہوں نے کہا کہ فلسطینی عوام کے جائز حقوق میں ان کا حق خودارادیت شامل ہے۔ان کا کہنا تھا کہ پاکستان یو این، او آئی سی کی قراردادوں کے مطابق دور یاستی حل کی حمایت کرتا ہے، اس معاہدے کے دور رس نتائج ہوں گے۔
چیئرمین پی پی بلاول بھٹو زرداری نے عوام کو یوم آزادی کی مبارکباد پیش کرتے ہوئے کہا کہ پی پی نے ہمیشہ عوام کے مسائل پر توجہ دی ہے۔آئین و قانون بتائیں جس کے تحت کراچی وفاق میں آسکتا ہے، انہوں نے کہا کہ این ایف سی ایوارڈ کے تحت صوبوں کو ان کا حق نہیں دیا جارہا۔ ان کا کہنا تھا کہ پی پی نے ہمیشہ عوام کی خدمت کی سیاست کی ہے۔ پیپلزاسکوائر منصوبے کے لیے ورلڈ بینک سے قرضہ لیا۔ ورلڈ بینک کے تعاون سے سندھ حکومت نے منصوبہ مکمل کیا ہے۔
وزیراعظم عمران خان نے پشاور بس ریپڈ ٹرانزٹ (بی آر ٹی) منصوبے کا افتتاح کردیا۔افتتاحی تقریب سے خطاب کرتے ہوئے وزیراعظم نے کہا کہ بی آر ٹی پاکستان میں سب سے بہترین پراجیکٹ ہے۔ بی آر ٹی سے ٹریفک کا مسئلہ حل ہوگا۔ بی آر ٹی پشاور کا ٹریک 27 کلو میٹر طویل ہے۔ بی آر ٹی منصوبے پر میرے کچھ تحفظات تھے۔ پرویز خٹک کو بی آر ٹی منصوبے پر خراج تحسین پیش کرتا ہوں۔ بی آر ٹی پر میرے تحفظات غلط تھے پرویز خٹک آپ ٹھیک تھے۔انہوں نے کہا کہ بی آر ٹی کے ٹکٹ کے 10 روپے ہر عام آدمی دے سکتا ہے۔
وزیراعظم عمران خان نے کہا ہے کہ چھوٹے اور درمیانے درجے کے صنعتوں کا فروغ ترجیح ہے، کاروباری برادری کی سہولت کیلئے کوششیں جاری رکھیں گے۔وزیراعظم کی زیر صدارت تعمیراتی شعبے سے متعلق اجلاس کو بریفنگ میں بتایا گیا کہ حکومتی پالیسیوں سے معاشی اشاریوں میں بہتری آئی ہے۔ کورونا سے علاقائی اور دنیا بھر کی معیشت متاثر ہوئی، حکومتی حکمت عملی سے معاشی سرگرمیاں زورپکڑ رہی ہیں۔ فرٹیلائزر،اسٹیل، رئیل اسٹیٹ اور دیگرشعبوں میں بہتری آئی ہے۔وزیراعظم عمران خان نے کاروباری برادری کے بھرپور اعتماد پراطمینان کا اظہار کیا اور کہا نوجوانوں کیلئے نوکریوں کے مواقع پیداکئے جائیں گے۔
لبنان کے وزیراعظم اپنی پور ی کابینہ سمیت مستعفی ہو گئے۔ انہوں نے اس بات کا اعلان قوم سے خطاب کرتے ہوئے کیا۔وزیراعظم کا کہنا تھا کہ کرپشن کی جڑیں ریاستی نظام سے زیادہ مضبوط ہیں۔ انہوں نے اپنے خطاب میں کہا کہ سیاسی طبقوں نے ملک کو قرضوں کے بوجھ تلے دبا دیا ہے۔ لبنان کے دارالحکومت بیروت میں گزشتہ ہفتے ہونے والے دھماکوں کے بعد لبنان کی پوری حکومت نے مستعفی ہونے کا فیصلہ کیا۔ لبنان میں دھماکوں کے بعد ہونے والے حکومت مخالف پُر تشدد مظاہروں اور ہلاکتوں کے بعد لبنانی وزیراعظم حسن دیاب نے یہ فیصلہ کیا۔واضح رہے کہ 4 اگست 2020 ء کی شام خطرناک دھماکوں نے لبنان میں قیامت برپا کر دی تھی۔ چند لمحوں میں ہنستا بستا شہر قبرستان کا منظر پیش کرنے لگا۔
