موجودہ صوبائی حکومت جب سے بنی ہے اس ڈیڑھ سال کے عرصہ کے دوران حکومتی تبدیلی کی افواہیں متعدد بار چلی ہیں کہ حکومتی جماعت کے اندر اختلافات بعض معاملات پر موجود ہیں اور اتحادی خوش نہیں ہیں۔ اسی طرح وزارتوں اور انتظامی معاملات سے لیکر پی ایس ڈی پی میں شامل اسکیمات پر ناراضگی کا ذکر بھی سامنے آیا۔بہرحال بعض سیاسی رہنماؤں نے کھل کراپنی حکومتی پالیسیوں کے خلاف تنقید کی ہے جبکہ پس پشت معاملات کیا چل رہے ہیں۔

مشرق وسطیٰ میں جنگ کے سائے منڈلاتے دکھائی دے رہے ہیں اس وقت امریکہ اور ایران کے درمیان کشیدگی شدت کے ساتھ بڑھتی جارہی ہے خدانخواستہ یہ تناؤ جنگی ماحول میں بدل گیا تو اس سے نہ صرف مشرق وسطیٰ بلکہ پوری دنیا کا امن متاثر ہوگا اسی لئے دنیا کے اہم ترین ممالک دونوں ممالک کے درمیان تناؤ کم کرنے کیلئے کوششیں کررہے ہیں تاکہ جنگی شدت میں کمی آئے۔ مگر امریکہ نے گزشتہ روز سخت ترین بیان جاری کرتے ہوئے بات چیت سے انکار کرکے مزید حملوں کا عندیہ دیا ہے۔

امریکا کے صدر ڈونلڈ ٹرمپ نے ایران کی جانب سے ایرانی فوجی کمانڈر قاسم سلیمانی پر کیے گئے ڈرون حملے کی جوابی کارروائی کرنے پر ایران کے ثقافتی مقامات کو نشانہ بنانے کی دھمکی پر قائم ہیں۔غیرملکی خبررساں ادار ے کی رپورٹ کے مطابق امریکی صدر ڈونلڈ ٹرمپ نے تنبیہہ کی ہے کہ اگر ایران نے فوجی کمانڈر کے قتل کا جوابی حملہ کیا تو بڑی انتقامی کارروائی کی جائے گی۔ڈونلڈ ٹرمپ کا کہنا ہے کہ قاسم سلیمانی امریکیوں پر حملے کی منصوبہ بندی کررہے تھے، انہوں نے مزید کہا کہ وہ انٹیلی جنس رپورٹس جاری کرنے پر غور کریں گے جو ایرانی کمانڈر کے براہ راست قتل کی وجہ بنیں۔ایران کی جانب سے ممکنہ انتقامی کارروائی سے متعلق امریکی صدر نے کہا کہ اگر ایسا ہوتا ہے، اگر وہ کچھ کرتے ہیں تو بڑی انتقامی کارروائی ہوگی۔امریکی سیکریٹری خارجہ مائیک پومپیو نے ڈونلڈ ٹرمپ کی جانب سے ایرانی ثقافتی اہداف کو نشانہ بنانے کی دھمکی دینے کو مسترد کیا لیکن جب اسی حوالے سے امریکی صدر سے پوچھا گیا تو انہوں نے مائیک پومپیو کے بیان کی مخالفت کی۔ ٹرمپ نے صحافیوں کو بتایا کہ ہمارے پاس ایک غیر معمولی مہنگا فضائی اڈہ ہے جو عراق میں ہے، اس کی تعمیر میں میرے دور سے کافی پہلے اربوں ڈالر لاگت آئی، ہم اس وقت تک نہیں جائیں گے جب تک وہ ہمیں واپس اس کی ادائیگی نہیں کرتے۔

امریکہ اور ایران کے درمیان حالیہ کشیدگی بڑھتی جارہی ہے جبکہ سعودی عرب اور ایران بھی مدِ مقابل دکھائی دیتے ہیں۔یہ بڑھتی کشیدگی خطے اور دنیا کیلئے جہاں خطرناک ثابت ہوسکتی ہے وہیں پاکستان بھی اس جنگ سے شدید متاثر ہوسکتا ہے۔ سعودی عرب اور ایران کے درمیان بڑھتی کشیدگی کے دوران حکومت اورمسلح افواج کے سربراہ نے مختلف ممالک کے دورے کئے تاکہ دونوں مسلم ممالک کے درمیان جنگی ماحول میں کمی آئے کیونکہ اس کے انتہائی بھیانک اثرات پورے خطے پر پڑینگے جبکہ پاکستان براہ راست اس سے متاثر ہوگا۔بہرحال موجودہ کشیدگی پر گزشتہ روز پاک فوج کے ترجمان میجر جنرل آصف غفور نے واضح کردیا کہ خطے میں امن خراب کرنے والے کسی عمل کا حصہ نہیں بنیں گے، جنرل قاسم سلیمانی کے قتل کے بعد خطے کے حالات میں تبدیلی آئی ہے۔

ملک میں معاشی ابترصورتحال سے لیکر بیڈگورننس، سیاسی مصلحت پسندی، مفاد پرستی، سیاسی بلیک میلنگ سمیت تمام غلط اقدامات کو ہر حکومت گزشتہ حکومتوں پر تھوپتی رہی ہے اور یہ ہماری سیاسی روایت کا حصہ بن گیا ہے۔ موجودہ حکومت بھی اس بات کو ماننے سے انکاری ہے کہ ماضی میں کی گئی غلطیوں میں موجودہ حکومت کے بعض اراکین بھی شامل تھے چونکہ یہاں سیاسی مفادات آڑے آتے ہیں جو کہ حکومت کیلئے نیک شگون ثابت نہیں ہوتا۔ حالیہ ایک مثال ہی لی جائے جب متحدہ قومی موومنٹ کو پیپلزپارٹی نے سندھ میں حکومت میں شامل کرنے کی پیشکش کی تو پی ٹی آئی کی مرکزی قیادت متحدہ قومی موومنٹ کو منانے کیلئے پہنچ گئی حالانکہ ایم کیوایم نے فوری طور پر حکومت میں شمولیت کی حامی بھی نہیں بھری، وہی پرانے مطالبات سامنے رکھ دیئے کہ مقامی حکومتوں کو بہتر بنایا جائے یعنی کراچی سمیت دیگر شہر جہاں پر ایم کیوایم کی اکثریت ہے وہاں پر اسے مکمل اختیارات دئیے جائیں، ویسے ایم کیوایم کی ہمیشہ کراچی پر سیاسی کنٹرول کی خواہش رہی ہے اور یہ پوری بھی کی گئی مشرف سے لیکر پیپلزپارٹی نے سابقہ دور میں کراچی کو ایم کیوایم کے حوالے کردیا تھا۔ بہرحال سابقہ ایم کیوایم اور موجودہ ایم کیو ایم میں آج کل بہت تمیز پیدا کی جارہی ہے۔

پاکستان نے عراق میں امریکی حملے میں ایرانی فوج کے کمانڈر میجر جنرل قاسم سلیمانی کے جاں بحق ہونے کے بعد مشرق وسطیٰ کی صورتحال پر شدید تشویش کا اظہار کیا ہے۔دفتر خارجہ سے جاری ایک بیان میں کہا گیا ہے کہ مشرق وسطیٰ کی موجودہ صورتحال خطے کے امن اور سلامتی کے لیے خطرہ ہے۔پاکستان کا کہنا ہے کہ خودمختاری کا احترام اور علاقائی سالمیت اقوام متحدہ کے چارٹر کے بنیادی اصول ہیں اور اقوام متحدہ کے چارٹر کے مطابق ان اصولوں کی پاسداری کی جانی چاہیے۔پاکستان نے یکطرفہ اقدامات اور طاقت کے استعمال سے گریز پر زور دیتے ہوئے کہا کہ مشرق وسطیٰ میں تناؤ کم کرنے کے لیے مثبت رابطوں کی ضرورت ہے۔

کوئٹہ ترقیاتی پیکج جس میں 15ارب روپے کے گیارہ منصوبے شامل ہیں، پیکچ کے لئے پانچ ارب روپے سابق وزیراعظم، پانچ ارب روپے سابق وزیراعلیٰ کی جانب سے اعلان کردہ ہیں جبکہ پانچ ارب روپے صوبائی پی ایس ڈی پی میں مختص کئے گئے ہیں۔علاوہ ازیں دس ارب روپے کی لاگت سے کوئٹہ ایکسپریس وے کا منصوبہ بھی تیار کیا گیا ہے جس کے لئے پانچ ارب روپے وفاقی حکومت اور پانچ ارب روپے صوبائی حکومت فراہم کرے گی۔ پانچ منصوبوں جن میں سریاب روڈ کی توسیع، سریاب کے علاقے میں 120کلومیٹر گلیوں اور سڑکوں کی تعمیر، جوائنٹ روڈ کی توسیع، سبزل روڈ کی توسیع اور ایئر پورٹ نواں کلی لنک روڈ کی تعمیر شامل ہے،پر کام کا آغاز کردیا گیا ہے جبکہ گوالمنڈی چوک کی توسیع، جی پی او چوک پر مجوزہ بائی پاس یا فلائی اوور کی تعمیر، جوائنٹ روڈ کی توسیع کے فیز ٹو، شہر کے مختلف علاقوں میں نکاسی آب اور ریلوے اسٹیشن پر فوڈ سٹریٹ کے قیام کے منصوبوں پر کام کا آغاز کیا جانا ہے۔

نیشنل ہائی ویز موٹروے پولیس کی جانب سے ایک روڈ سیفٹی سیمینارکے دوران نیشنل ہائی ویز موٹروے پولیس کے حکام نے اپنے خطاب کے دوران اس بات کا خود اعتراف کیاکہ ہر سال بلو چستان میں 6000 کے قریب لوگ حادثات کی نذر ہوجاتے ہیں اور مزید لوگ جو کہ بعد میں علاج کے دوران مر جاتے ہیں ان کی تعداد اس سے بھی زیادہ ہوتی ہے۔ گزشتہ سال کی نسبت اس سال 2019 میں روڈحادثات میں جاں بحق ہونے والوں کی تعداد میں 20 فیصد تک اضافہ بھی ہوا ہے۔موٹروے پولیس حکام نے ٹرانسپورٹر ز کو گورنمنٹ آف پاکستان کی جانب سے ترمیم شدہ رقم یعنی چالان کے نئے جرمانوں کے بارے میں بریف کیا۔

پاکستان میں دنیا کے دیگر ممالک کی طرح نئے سال 2020 کا جوش وخروش سے استقبال کیاگیا،وفاقی دارالحکومت اسلام آباد، کراچی، لاہور، راولپنڈی، ملتان، پشاور، کوئٹہ سمیت ملک کے مختلف شہروں میں آتش بازی کا مظاہرہ کیا گیا جبکہ عبادات کا بھی اہتمام کیا گیا،ملکی سلامتی،خوشحالی وترقی کیلئے دعائیں بھی مانگی گئیں۔

سال 2019ء میں بھی عوام نے کوئی خاص تبدیلی نہیں دیکھی البتہ موجودہ حکومت کا نعرہ ہی تبدیلی کا تھا جس میں بہتر معیشت، غریب عوام کو گھر، ملازمتیں سمیت دیگر بنیادی سہولیات فراہم کرنا تھا۔سب سے اہم بات ملک کو کرپشن سے پاک کرکے بڑے مگرمچھوں کو ٹیکس نیٹ میں شامل کرنے سمیت بیرونی ممالک سے پیسے واپس قومی خزانے میں لانا تھا مگر اس پورے دورانیہ میں ایک بھی وعدہ پورا نہ ہوسکا البتہ سیاسی ماحول میں کافی گرما گرمی دیکھنے کو ملی جہاں بڑی گرفتاریاں عمل میں لائی گئیں وہیں اس عمل کو سیاسی انتقامی کارروائیوں سے نتھی کیا گیا۔ مسلم لیگ ن کے اہم رہنماؤں کو کرپشن کیسز میں گرفتار کیا گیا جبکہ پیپلزپارٹی کے آصف علی زرداری اور خورشید شاہ بھی کرپشن کے الزامات میں گرفتار ہوئے۔ اس دوران سابق وزیراعظم میاں محمد نواز شریف زیادہ خبروں میں رہے جن کی صحت کی خرابی ایک بڑا مسئلہ بن چکا تھا، پلیٹ لیٹس کی کمی اور جان کے خطرہ کے پیش نظر انہیں بیرون ملک بھیجا گیا جس پر خوب سیاست کی گئی،ایک طرف اسے این آراو قرار دیاجارہا تھا تودوسری جانب نواز شریف کی بیماری کو بہانہ قرار دیکر ملک سے فرار ہونے کی باتیں کی گئیں۔