ہما مردم کہ کلاں گیش راج ءِ درد واری ءَ کنت آ کلاں گیشدردیگ کنگ بیت ۔اے نہ ایوک ءَ بلوچانی گورا است انت بلکیں جہان ءِ درائیں مردگیں راجاں انچو بوہگ ءَ اِنت ۔پمشکا ما گوں کس ءَ اے تک ءَ گلہ ءُُ زنگے درشان مہ کناں کہ پلانی ءَ انچو کار کتگ ،وتی سرجمیں زند ءُُ وشی پہ زبان ءُُ راج ءِ دیمروئی ءُُ پہازی ءَ ندر ءُُ راج ءَ آ شموشگار کتگ ،کس آئیءِ یاتگیری روچے اوں دارگ ءِ جہدے نہ کنت کہ بلکیں آئیءِ ارواح کبر ءَ تاہیر بہ گپت بزاں ما مرگ ءَ پد اوں آئیءِ وشی ءُُ وشکامی ءِ واہگدار بوہگ نلوٹ اَنت ۔چشیں پگر ءُُ سسا ءِ واجہ بائد دیمروئی ءِ طلب گار مہ بیت ۔اے راج کہ وتی عہد ءِ پہر بندی ءَ وَ کنت بلکیں دپ ءِ پُر ءُُ بزیں دیواناں کنت بلئے وتی مرچیگیں کرد ءَ بہہ نچار ایت کہ آئیءِ انوگیں کرد چہ اِنت پہ زبان ءُُ راج ءَ آئی ءَ کجام زہم جتگ۔کریم دشتی ءِ یک شئیرے انوں گیر پیداک اِنت
تو بچار شانے کہ مرتگ انگت ءَ ملیت کریمؔ
سر ماں آکاں کپتگ ءُُ پگر ءَ چہ سرداری نہ شت
مئے سردار ی ،نوابی ،میر ءُُ واجہی چہ ازل گوماں گون اِنت ءُُ اے پہ ارزانیں دلے نہ روت ۔یکے رندے یک نامیگیں مردے ءَ را جست کنگ بیت کہ آئیءِ نام ءَ نگراں کہ پتوا جاری بیت،آئی ءَ را جست کنگ بیت تو پرچہ بلوچ راج ءِ دیمروئی ءَ وتی دپ جاکی ءَ یل نہ کنیں ؟ گڑاں آ پہ دپ جاکی ءَ پسو دنت کہ اے راج ءِ ماتءِ ۔۔۔۔۔۔۔۔ نوں بگش آ راج ءُُ قوم ءِ رانتکار ءُُ زانوگر کہ وتی راج ءِ بابت ءَ چشیں پگر دار اَنت گڑاں بزگیں سید ہاشمی ءِ جہد ءُُ قربانی چتور یات دارگ بنت ۔
سید کہ آئیءِ کرد ءُُ کار پہ بلوچی زبان ءُُ لبزانک ءَ انچو باز اَنت اگاں آ درکنگ بہ بنت داں بلوچی ءِ کاسگ ہورگ مانیت ۔کجام پڑ اِنتّ تری شاعری ،زبانزانتی ،راجدپتر،پولکار،گدار ءُُ آزمانک،ءُُ دگہ درائیں پڑ کہ بلوچی زبان ءُُ لبزانک ءَ است اَنت آ درائیں پڑانی دیمروئی ءُُ بندات ءَ سید ہاشمی ءِ وڑے نہ وڑے ءَ دست ہوار اِنت۔ءُُ اے گپ ءَ آئیءِ بدواہ ہم جوانی ءَ سرپد ءُُ زانوگر اِنت ۔گڑاں پرچکہ سید ہاشمی ءِ گوما چوشک کنگ بوہگ ءَ اِنت منی دل ءَ آئیءِ نام ءَ نہ ایوک ءَ مزن مزنیں شاہ دربر جوڑ بوتگیں بلکیں آئیءِ ودی ءُُ بیرانی ءِ روچاں سرکاری موکل دئیگ بوتیں ،( اے پہ سید ءَ کوریں مہر نہ اِنت بلکیں پہکیں راستی اِنت اگاں کسے شر بچار اِیت)آئیءِ یاتگیری ملک ءَ ابید درملکاں ہم برجم دارگ بوتین اَنت آئیءِ بت ہمک چار راہ ءَ جنوک بوتین انت بلئے وائے قسمت کہ سید اے راج ءَ ودی بوتگ۔۔۔۔۔!سیدہاشمی ءِ بابت ءَ چے نبشتہ بہ کناں آئیءِ کجام تک ءُُ پہنات ءِ بابت ءَ سرپدی دئیگ ءِ جہد بہ کناں ،آئیءِ کجام سپت ءَ دیم ءَ بیار اں کہ اندیم اِنت ،آ وَ انگت ءَ پدر کنگ نہ بوتگ آہماراستی کہ انگت نبشتہ نہ بوتگ ،ہما تران کہ انگت کنگ نہ بوتگ ہما گپانی شوہازی ءَ سربتگ کہ انگت گشگ نہ بوتگ اَنت ۔سید ظہور شاہ ہاشمی ءَ بلوچی زبان ءُُ لبزانک ءَ را وتی دیمروئی ءِ سر خیلاں سر کتگ ءُُ نوں دنیا ءَ یل کتگ ۔چش نہ اِنت کہ اے سپر ءَ سید ایوک بوتگ بلئے آئیءِ کتگیں کار ءُُ کرد آئیءَ را جتا جاہ ءُُ مقامے بکش اَنت کہ آئی ہمراہانی نیسب ءَ نیااتکگ اَنت۔باز گشیت اگاں سید ءِ تہا کمو لچک مان بوتیں داں زبان ءِ منتگیں کار اوں سرجم بوتگ اِتاں بلئے آگپ کہ سید ءِ بوتگ آ گوں سید ءَ حاکاں ہوار اِنت۔۔۔۔۔۔
