روزنامہ آزادی کوئٹہ ءِ زیردستی ءَ بلوچی ءِ تاک ساچیتک واجہ سنگت رفیق ءِ شونکاری ءَ ھمک ھپتگ شنگ ءُُ تالان بوھگاانت۔ اِش درگت ءَ سنگت اِش جہد ءَ کنگ ءَ اَنت کہ بلوچی زبان ءِ نبشتہ ءِ وڑءُُ ڈول باید انت کہ یکراہیءُُ یکیں وڑا نبشتہ بہ بیت۔ من سر پد بیں کہ اِش وڑیں جہد زبان دوست ءُُ بلوچی لبزانک ءِ راست نبشتہ کاری ءَ الم ءَ پہکیں گامگیجے واجہ ءَ وتی بڈّا زرتگ۔
گوستگیں ھپتگ ءَ تمپ ءِ بانُک کیگد بلوچ ءِ آزمانک ” منی میتگ منی کتاب انت” کہ نبشتہ تالان بو تگ ،منی وتی سرپدی اِش انت کہ بانک ءَ ھما گہترتریں زبان کارمرز کتگ کہ آئی ءَ ما ذگریں بلوچی گوشت کنیں۔ ھمک گپ آئی ءَ چہ بلوچی زبانءِ” نگرھیں لبزانک ءَ چہ زرتگ ءُُ ھما وڑا نبشتہ/ کارمرز کتگ انت کہ بلوچی گُشگءُُ زانگ بیت۔ آئی ءِ لبزانی گچین کاری ءُُ پدا زبردستیں وڑے ءَ نچین دئیگ ءِ توجیل ھم کتگ۔
مروچاں کہ بلوچی نبشتہ ءَ ما وانین گڈا انچوش سُد بیت کہ من اردو وانگایاں ما وتی زبان یلو کتگ ، آئی ءِ گالوار ءُُ ترانانی دیم ترینتگ ءُُ اردو وڑا گپ کنگائیں دیم ءِ گوشداروک نکہ وانوک پوہ گیپت کہ واجہ اردو ءَ بلوچی زبان ءَ ترینگائنت (Translating)۔
چد ءُُ ابید بانک ءِ زباندانی ءُُ کلاں ئے وش تریں تہر آئی ئے ، آزمانک ءِ ترانانی وش رواجی ءُُ نپرشگ انت کہ آئی الّم اِش لیکہ داشتگ کہ آئی ئے ترانانی ردانک زیبد ارتر بہ بیتُ۔ اِش جہد ءَ آ آسر ھم بوتگ۔ بانک ءِ نبشتہ کاری ا ندگر بلوچی نبشتہ کنوکانی راھشونی ئے واستہ درپشناکیں چراگ ءِ اگاں کسے واھگ داریت۔
بلے مستریں نزوری اِش اِنت کہ ما سر زور جنیں ءُُ چوش ناسرپدیں نبشتہ کارانی وڑا یک ءِ دومی ءَ منّگ ءِ واستہ وتی کم شرپی لیکیں۔ دِگر زبانانی نبشتہ کارانی رند گیری ءَ وتی واستہ پہرے سرپدبیں۔ پہ دربرگ واستہ مردم دِگرانی ھم رندگیری ءَ کنت بلے چوش مہ بیت کہ اسپ ءَ وت ءَ نال کت، کُٹگ ھم نال کنگ بنا بکنت۔باید انت کہ ھر مرگ وتی بالاد ءَ بال بکنت۔مرچی آراج چہ سداں سال چہ ما پیش کپتگ انت ءُُ آلبزانکی پڑ ا ھر وڑا کہ ملنت مَلِت کن انت بلے ما وتا وت چو گولوءِ وڑ ءَ سِٹک جنگائیں ۔
یکبرے بائید انت کہ گو ر و گیگ ببئین ءُُ وتی جندے ماتی زبانءَ راست بکنیں ءُُ زبان ءِ لبزانک ءَ گوں بلوچی زبان ءِ لبزان نزبیار ءُُ گار گور بوتگیں ھبر ءُُ لبزان دربگیجیں ءُُ کارمرز بکینں نوں نبشتا نکی زبانی ئے ھدا بُند لیکگ بیں۔ دِگر زبانانی لبزے دُزگ ءُُ امبارے مانچگ ءَ زبان دیم رھی ئے بدل ءَ پشت ءَ روت ءُُ پدا چو گولوے وڑءَ سُِٹک بیت چہ ما چہ رند آؤکیں پسائندگ بلوچی گپ ءَ میار ءُُ لج ءِ وتی واستہ بلیکنت۔
واجہ مجاھد بلوچ ءِ چمانی سیمّسر ھم الکاپین نبشتانکے کہ آئی ءَ جہد کتگ کہ بلوچی زبان ءِ لبزانک ءَ چہ آئی ئے سوب ءَ گُذندے مر سیت ءُُ آئی ئے لبزانکی اِش نبشتانک ھم سکگی انت ءُُ انچو برز ءُُ جہل ءِ مان نیست۔ اگاں ما اش در گت ءَ بچاریں الکاپ گوشگ بیت ۔ امیتدارگی انت کہ اِش وڑیں ورنا دیمتر ءَ گہتر چہ گہتر ترین لبز پہ بلوچی ءَ ماں بلوچی ئے نیام ءَ پولنت۔
ھمیش تاک دیم ءَ ” سید ءِ شاعری ءُُ لبزیات ” ءِ سرھال ءَ واجہ عظیم مراد ءِ نبشتانک ءِ ھوار انت۔ منی نز ءَ واجہ ءَ سید ظہور شاہ ھاشمی ءِ زانت ءُُ شائری ءِ بابت ءَ وتی وس ءُُ واک ءَ گہترتریں زنتکار ی پجاری تران ءِ نبشتہ کتگءُُ جہد ءِ گتگ کہ نوک آئی نچینتگیں گپاں ارزانی ءَ پوہ بگپیت۔ من گوشیں کہ آئی ءِ اِش جہد الّم ستا کرزیت بلے منی ارمان ھما جاہ ءَ انت کہ چہ ءُُ پیش / سر بوتگ انت سوب اِش انت کہ پلیں نبشتہ کار ءَ بلوچی لبز باز جاہ ءَ چو اردو ءِ وڑا نبشتہ کتگ انت کہ انچوش سد بیت کہ واجہ ءَ اردو زبان ءَ پدگیری کنگا ئنت ءُُ الم ءَ (Translating urdu into Balochi)اِش وڑیں نبشتہ کار بائید انت کہ بلوچی ءَ بلوچی ئے وڑا نبشتہ کنگئے جہد ءَ بکن انت۔ انچوش کہ بُرز ءِ نبشتہ کتگیں آزمانکار ءَ بلوچ زبان ءُُ آئی ءِ لبزانکی روانک نبشتہ کتگ۔
من سر پد بین کہ لبزانک ءَ Literature دیم رھی واستہ الم زورگ ببیت ءُُ ذگریں بلوچی درگیجگ ءُُ پول ببیت داں بلوچی وتی لبزانکی میل ءَ جہل ایر مکپیت۔