مرچی بزاں ۲۵ نومبر ءَ بلوچی اکیڈمی ءِ کماش واجہ ممتار ءِ کماشی ءَ بلوچستان ءِ یونیورسٹی ءِ بلوچی ڈیپارٹمنٹ ءِ ایم فل ءُُ پی ایچ ڈی اسکالراں گوں گندءُُ نندی مراگشے جم دارگ بوتگ ۔اے دیوان ءَ بلوچی اکیڈمی ءِ کماش ممتاز یوسف،سر کماش سنگت رفیق،جنرل سکیرٹری شکور زاہد ،پبلیکیشن سیکرٹری عیبتان دشتی ،فائینس سکرٹری واجہ پناہ بلوچ ءُُ بلوچی ڈپیارٹمنٹ ءِ کارمستر واجہ حامد علی بلوچءِ ہمرائی ءَ واجہ جان محمددشتی ہم ہمے دیوان ءَ ساڑی اَت۔

دیوان ءِ جم دارگ ءُُ اے گندءُُ نندی مجلس ءِ مول ءُُ مراد گوں اسکالراں بلوچی اکیڈمی ءِ نیمگ ءَ چہ اسکالرشپ دئیگ ءُُ آہانی اڈ ءُُ جنجالانی بابت ءَ سرپدی اَت ۔ دیوان ءِ جار جن شکور زاہد اَت ءُُ کماش ممتاز یوسف ءَ درائیں اسکالرانی وش اتک ءَ پد آہانی اکیڈمی ءَ آیگ ء ءُُ اسکالر شپ ءِ بابت ءَ سرپد ی اَت ۔ اے اے درگت ءَ واجہ سنگت رفیق ءَ تران کنان ءَ گشتگ اَت کہ اے واہگ ایوک ءَ بلوچی اکیڈمی ءِ نہ بوتگ بلکیں بلوچی ڈیپارٹمنٹ ءِ منگ ءَ گوں کنگ بوتگ ۔

واجہ ءَ وتی تران ءَ بلوچی اکیڈمی ءِ کارگشادی ءِ بابت ءَ تران کنان ءَ گشتگ اَت کہ بلوچی اکیڈمی ءِ اگاں گوستگیں باریگ یات کنگ بہ بیت داں اے ادارگ ءَ چشیں دیمروئی ءِ کار باز کم گندگ بنت بلئے دیمروئی ءُُ کارانی گیش ءِ کنگ ءِ کار ہچبر کم کنگ بہ بیت آئی ءَ گشتگ اَت ۱۹۵۷ ءَ وہدے اکیڈمی مستونگ ءَ اَت داں آئیءِ کارانی کساس انگت ءَ گیش کنگ بوتگ ۔

اَت وہدے ۱۹۶۰ ءَ اکیڈمی ءَ کوئٹہ ءَ آرگ بوتگ ءُُ آئیءِ ماڑی مک کنگ بوت داں اے دیمروئی ءِ کارچد ءُُ گیش دیم ءَ شت اَنت ۔آئیءَ گشتگ ات کہ اگاں اکیڈمی مرچی اے دیمروئی ءِ پند ءَ سر بوتگ داں اے آئیءِ کارگشادانی دیمروئی انت ءُُ اے اسکالر شپ دئیگ ہم ہمے دیمروئی ءِ یک بہرے ۔۔۔۔

واجہ ءَ اکیڈمی ءِ گوستگیں دوئیں سالانی کار ءُُ کتہ کاریانی بابت ءَ تران کنان ءَ گشتگ ات کہ اکیڈمی ءَ بازیں کتابے چاپ کتگ ءُُ نوں آ میزان میزان ءَ ریسریچ ءِ نیمگ ءَ روگ ءَ انت ۔

آئی ءَ گشتگ کہ اے اسکالر شپ پہ اسکالراں ایوک ءَ مالی کمکے نہ انت بلکیں گوں اسکالرانی دلبڈی یے ایشیءَ ہما دلبڈی یے ھساب ءَ زورگ بہ بیت ۔یک جستے ءِ پد ءَ آئیءَ گشتگ اَت کہ اکیڈمی ءِ کار کماش ءُُ لبزانتکارانی زند ءُُ بیرانی ءِ روچانی دارگ ءِ جا ہ ءَ آہانی ناسرجمیں کارانی سرجم کنگ ءُُ یک نوکیں پدریچے ءَ را آہانی کارانی گوں ریسرچ ءِ رنگ ءَ دیم ءَ آرگ انت ۔

سنگت رفیق ءَ گشتگ اَت کہ گوستگیں روچ ءَ اکیڈمی ادبیات ءِ چئیر مین ءَ اکیڈمی ءَ تر ءُُ گرد ءَ اکیڈمی ءِ ہمے کتہ کاری ءِ بزاں اسکالرانی اسکالرشپ دئیگ ساڑا تگ ۔۔ گڈی ءَ آئیءَ گشتگ اَت کہ ہما اسکالراناں کہ اسکالر شپ رسیت آ ایوک ءَ زر ءُُ مالی نیت ءَ مہ بیت بلکیں آئیءِ کار ہم انچینے بہ بیت آ قوم ءُُ زبان ءِ دیمترا کار بئیت انت ۔

دیمتری تران ءَ بلوچی ڈیپارٹمنٹ ءِ کارمستر واجہ حامد علی بلوچ ءَ ہمے اسکالرشپ ءِ بابت ءَ گیشتریں سرپد دیان ءَ گشتگ اَت کہ بائد نودربر نوں ’’زند ءُُ ازم ‘‘ بنگپاں یلہ بہ کناں ءُُ کمو اے دگہ بنگپانی سرا کاراں گوں دلگوش بدئینت ۔

آئیءَ گشتگ اَت کہ اسکالر باید انچیں بنگپ بوزور اَنت کہ آ چاگر د ءِ تہا بدلی یے بیار انت ایوک ءَ سرشونی ءُُ کمپائلیں کار مہ بیت ۔ اسکالر مدام ارزانیں بنگپ پہ وت گچین کنت ءُُ کار کنت بائد چش کنگ مہ بیت ۔چشکہ حامد علی بلوچ وت ہم اکیڈمی ءِ باسک ءُُ ممبر اَت پمشکا آئیءَ ہم اے اسکالرشپ ءِ بابت ءَ گشتگ اَت کہ ہرکس ءُُ ناکس ءَ اسکالر دئیگ نہ بیت بلکیں گچین بنگپ کہ آہانی کار پہ زبان ءُُ لبزانک ءَ پُرارزشت بہ بنت ہماہاں اے دلبڈی ءُُ کمک دئیگ بہ بیت۔

دیوان ءَ بہرزرتگیں اسکالرانی تہا پی ایچ ڈی اسکالرانی تہا واجہ شریف میر،عاصم زہیر ،شکور زاہد ،ہوار اِتاں ءُُ ایم فل اسکالرانی تہا ۲۰۱۶ ءُُ ۲۰۱۷ ءِ نودربرانی تہا عرفان جمالدینی ،عزیز مراد،اعظم بلوچ،مجاہد بلوچ، الطاف آزاد،قدیر بلوچ،نثار ساجد ،تنویر بلوچ، سیف جان ،بالاچ حمید نورؔ ،عزیز جمالدینی ، ءُُ واجہ علی گوہر ہوار اِتاں ۔ دیوان ءِ دومی بہر گوں اسکالرانی جست ءُُ پسو ئیگ اَت ۔

اے درگت ءَ اسکالراں چیز جست دیم ءَ آورت کہ چیز ے ءَ گوں ہمے نندءُُ گندی مراگش ءَ گوں سیادی یے است ات ءُُ چیزے ءَ چہ اے مجلس ءِ مولاں ڈن اَت ۔چشکہ تنویر بلوچ ءَ اے جست دیم ءَ آورت کہ اسکالرانی ہاسٹل ءَ نند جاہ نیست ءُُ اے یک جنجالے دومی ایشانی noc ءِ جیڑ گ است اَنت ۔اے جست ءِ جواب ءَ واجہ رفیق سنگت ءَ گشتگ اَت کہ ہردو جیڑگاں گوں تچکی ءَ اکیڈمی ءَ وَ سیادی نیست بلئے آ اکیڈمی ءِ وفد ے گوں بلوچی ڈیپارٹمنٹ ءِ کارمستر ءِ ہمرائی ءَ مزن اکدہ ایں مردمانی گورا ءَ کاگد روان دنت یا وت گوں آہاں نندو نیاد کنت ءُُ اے جیڑگانی بابت ءَ تران کنت ۔

دگہ جستے مجاہد بلوچ ءَ ایر کتگ اَت کہ اے اسکالر شپ ءِ کول ءُُ پیمان سالے ءَ ساری کنگ بوتگ ءُُ اکیڈمی ءِ نیمگ ءَ ایشیءِ بابت ءَ دگہ سرپدی دئیگ نہ بوتگ ءُُ بازیں مردمے ءَ گوں کار سرجم کتگ اَنت آہاں گڈاں اسکالر شپ دئیگ بیت یا نہ بیت؟ داں ممتاز یوسف ءَ ایشیءِ جواب دیان ءَ گشتگ اَت کہ اے اکیڈمی ءِ نزوری بوتگ ءُُ آاے بابت ءَ انگت ءَ پگر کنت۔ 

عرفان جمالدینی ءِ جست تچک ءَ گوں ہمے مجلس ءِ وڑ ءُُ پیم ءَ ات کہ اکیڈمی بائد انت کہ ریفرنس ءِ درگت ءَ درائیں بلوچ اکیڈمیزانی کتاباں بلوٹائینت ۔ ابید چہ ایشیءَ اے دگہ بازیں اسکالرانی جست ءُُ اکیڈمی ءِ اگدہدارانی پسو اِتاں ۔

دیوان ءِ گڈی بہر ءَ واجہ جان محمد دشتی ءَ درائیں اسکالرانی منت گپت ءُُ آہانی درائیں جستانی پسو دات اَنت۔واجہ ءَ بید ریا ءُُ رو ءَ درائیں گپ ءُُ ھال تچکی ءَ گشتگ اَنت ۔واجہ ءَ وتی تران ءَ درائیں اسکالرانی جم داتگیں پروپوزلانی بنگپانی بابت ءَ تران کت ءُُ بنگپانی ارزشت ءِ بابت ءَ ہم گشت کہ چشیں بنگپ اسکالر شپ دئیگ نہ بنت آ زبان ءُُ لبزانک ءِ ہچ وڑیں دردے مہ وارت ۔

آئی ءَ گشتگ ات کہ آوکیں وہد ءَ ہمے درائیں اسکالراں وتی ءُُ زبان ءِ آکیبت درست کنگی اِنت پمشکا آ بائد انچیں بنگپ پہ وت گچین بکن اَنت کہ آ زبان ءُُ لبزانک ءَ پُر ارزشت بہ بنت۔واجہ ءَ گشتگ اَت کہ اکیڈمی ءَ ہما گپ کہ گوں اسکالراں جتگ اَت سے ایں نکتہ آں نہ وارت ءُُ وتی گپ ءَ اوشتیت بزاں آئیءِ کتاب ءَ چاپ کنت ،رائلٹی دنت ءُُ اسکالر شپ ہم دنت بہ شرطے کہ آہانی بنگپ سلامتیں بہ بنت ۔ گڈی ءَ دیوان ءَ ساڑی ایں درائیں مردماناں بلوچی اکیڈمی ءِ چاپ بوتگیں کتابانی مڈی اوں سوگات کنگ بوتگ اَنت ۔