ھدا کجا اِنت ءُُ ما ھدا ءَ کجاشوھاز بکنیں؟؟؟ پرچکہ بنی آدم ءَ ھدا گار کرتگ ءُُ آئی ءِ شوھاز ءَ سربتگ اِنت ۔بازیں مردماں ھدا چہ زمین ءَ دور ماں آزمان ءَ نادینتگ ءُُ مُلّا آں ایوک ءَ ھدا مسیت ،پاگ ءُُ ریش ءِ تہا بند کرتگ آھانی گشگ انِت کہ ھدا شوھاز کنگ لوٹیت بلئے ھدا شوھاز کنگی چیزے؟؟؟
آ ھستی ءَ بمار وتی جند ءِ شاہ رگ ءَ
قاضیؔ نماز جاہ ءِ ھدا تئی ھدا نہ اِنت
گش اَنت وھدے تو وت ءَ سرپد بوت ئے تو الم ءَ کائنات ،چاگرد ءُُ ھدا ءِ قدرتاں گوں دلءِ چماں دیست کنئے۔ ھدا درچک ءِ پُل ءُُ کُنٹگ ءِ،رنگ ءُُ وشبو ءِ تہا اِنت بلئے تو ھدا ءَ کجام وھد ءَ شوھاز کرت کنئے۔
’’ دل ءَ بلین کہ دل ءَ روک بیت ھزار چراگ‘‘
وھدے تئی دل ءِ چراگ تامور بہ بیت گڈا تو روکیں روچ ،چاردھی ماہ ءَ ھم دیست نہ کنئے تو زر ءُُ تیاب ءَ ھم دیست نہ کنئے تو گلزمین ءَ ھم دیست نہ کنئے
عطا ءِ اے شعر گوں ھدا ءَ چنچو نزیکی کنت پرچکہ وھدے تئی دل ءِ چراگ بلیت تو ھدا ءُُ آئیءِ قدرتاں گوں دل ءِ رژنائی ءَ دیست کنئے۔اگاں ترا ھدا شوھاز کنگی انت کلاں ساری وتی دل ءِ چراگ ءَ روک کن،پرچکہ وھدے تئی دل ءِ چراگ بلیت گڈا تو ھدا ءَ شوھاز کرت کنئے انسان ءَ شوھاز کرت کنئے راستی ءَ شوھاز کرت کنئے ۔
وھدے دل ءِ چراگ بلیت گڈا تو راست ءَ راست ءُُ دروگ ءَ دروگ گشت کنئے ،تو شپ ءَ شپ ءُُ روچ ءَ روچ گشئے،تو ھمک بنی آدم ءِ دل ءِ توار ءَ سرپد بوت کنئے تو کل انساناں ھدا ءِ پیدا کرتگیں محلوق سر پد بئے تو زوت چہ مذہب ،زبان،ھند ءُُ علاقاں برزتر سوچ فکر کنئے ۔
ھدا گار نہ انت ھدا شوھاز کنگی چیزے نہ انت بلکیں ھدا تئی جبین ءِ ءُُ رگ رگ ءِ تہا اِنت ۔ھدا ھمک جاہ ءَ است انت کہ زمینءُُ آزمان ءِ تہا انت ھدا ماھیگ ءُُ آپ ،درچک ءُُ دار،پل ءُُ کنٹگ ،کاہ ءُُ کہچر ،کوہ ءُُ دریا ءِ تہا انت
’’بس دل ءَ بلین۔۔۔۔۔۔۔۔۔۔۔۔۔۔۔‘‘
