مروچیگیں دور وانگ ءُُ زانگ ءِ دور اِنت ہرکس ءَ بچار ءَ کتاباں گوں سرءُُ لینڈ اِنت لہتیں جنزل نالج وانیت ،لہتیں وتی جند ءِ دربرجاھانی کورس بکاں وانیت ءُُ لہتیں مردمءَ ایوک ءَ زانگ ءِ ھب اِنت پمشکا آ ھمک پڑ ءَ وانیت آئی ءَ ہرچی دست ءَ بئیت آ وانیت،بلئے سد اپسو ز کہ ھمے ہرچی کہ آئی ءِ دست ءَ آ وانیت آ بلوچی بہہ نہ وانیت ،چشیں مردماں وھدے جست بیت کہ واجہ تو بلوچی پرچہ نہ وانئے گڈاں دائم آئی ءِ پسو ہمیش اِنت کہ بلوچی ءِ تہا انگت ہچی نبشتہ کنگ نہ بوتگ ما چے بواناں یکبرے اگاں مردم کمو بش بش وارت کہ بلوچی ءِ تہا اے درائیں کتاب کہ ھمک سال دوسد ءَ برز کتاب چاپ بیت ءُُ چشیں مردم گشیت کہ بلوچی ءَ انگت ءَ ھچی نبشتہ نہ بوتگ ،بلئے وھدے ما ھمائی ءِ پگری ھساب ءَ چاراں داں زانگ بیت کہ ھو! بلوچی زبان ءَ انگت ءَ ھچی نبشتہ کنگ نہ بوتگ۔
زی یونیورسٹی بک پوانئٹ ءِ کارمستر واجہ ملک عیسیٰ خان رند ءَ اگست ءِ ماہ ءِ یک تاریخ ءَ بگر داں بیا چاردہ تاریخ ءَ یک کتاب میلہ یے ءِ بنءُُ بند کتگ ھمے میلہ ءِ تہا واجہ ءَ ھمک نہادی کتاب ءِ نہاد نیم کتگ بزاں ففٹی فرسنٹ ڈسکاونٹ،منی ھم روگ بوت پرچہ کتاب ءِ واہگ ءَ ھمک نودربر ءَ وتی نیمگ ءَ کشیت،وھدے کا ملک عیسیٰ ءِ دکان ءَ سر کش ایت داں پاد ءِ ایر کنگ ءَ جاہ نیست انت نودربرانی یک بلائیں لڑے آھود ءَ مچ اَت اے درائیں مردم ھمود ءَ کتاب ءِ بہاگرگ ءَ اتکگ ات انت ،درائیں زر داریں نودربراں وتی وتی پیلک پر کتگ ات انت چہ کتاباں بلئے اجکہی ھبر ایش اَت کہ ایشانی تہا یک کتابے اوں بلوچی زبان ءِ ھوار نہ اَت نہ ایوک ءَ یک مردمے بلکیں درائیں مردماں ہرچی کہ کتاب زرتگ اَت ایشانی تہا درائیں کتاب اردو انگریزی کتاب ات اِنت بلئے بلوچی یک کتابے اوں آہاں گون نہ اَت،اگاں چہ اے دکان ءَ بلوچی کتابانی ھم یک بلاھیں بہرے پہ بہا ایراَت بلئے کس ءَ اے نیمگ ءَ چک اوں نہ جت۔من وتی دپ نہ اوشتی ءَ یک ءُُ دو نودربر جست کت کہ شمئے وَ بلوچ ئے شما بلوچی کتاب پرچہ نہ زور ئے ءُُ نہ وان ئے ؟ آھانی پسو ھم ھما اَت کہ بلوچی ءِ تہا انگت ءَ نبشتہ کنگ نہ بوتگ ،من ھما بلوچی کتاباناں شر ھورت چاری کت کہ درائیں کتاب دو بہر اَنت گیشتر شئیری کتاب اِت انت ءُُ لہیتں رد ءُُ بندی کتاب اِت انت ،اگاں یک ءُ دو آزمانکی ءُُ یکے کپے گدارے اوں مان اَت ،بلئے پداں اوں اے نودربرانی گشگ اِنت کہ بلوچی ءَ انگت ءَ ھچی نبشتہ نہ بوتگ اَت۔وھدے ما آہانی زرتگیں کتاب چار تاں داں سرپد بوتاں کہ ھو یار اے راست گش اَنت بلوچی ءَ انگت ءَ ھچی نبشتہ کنگ نہ بوتگ۔
پرچکہ مئے زبان ءِ تہا شئیر ،آزمانک،گدار،ءُُ ردءُُ بندی کتابءَ ابید ءَ ما دگہ چاگری ءُُ وانگی کتاب انگت ءَ نبشتہ نہ کتگ ،مئے زبان ءَ تنی وھد ءَ چشیں نبشتہ کارے ودی نہ کتگ کہ آ چاگردی انچیں جیڑگانی سرا نبشتہ بہ کنت کہ وانوک آھانی وانگ ءَ لاچار بہ بیت ۔
انچو کہ اردو ءِ تہا بازیں چشیں کتابے نبشتہ کنگ ءَ بوتگ چوکہ ،انسان اور خدا،سائنسی دور میں انسان کی زندگی،آج کی باتیں ،خدا کا تصور،عورت،نیا دور ابھرتے قلم کار،نفسیات کے کرشمے،ءُُ اے دگہ بازیں دگہ چونیں چونیں بنگپانی سرا نبشتہ کن اَنت کہ کہ ایشانی نام ءَ دل آپ دنت کہ ایشاں بوان ایت،مئے لبزانک ءِ تہا انگت ءَ چشیں بنگپانی بابت ءَ کس ءَ پگر نہ کتگ اگاں کسے جہد بہ کنت داں اے بنگپ ھم نبشتہ کنگ بنت بلئے آ ند کئی بیت آ وھد کئی بیت آ مردم کئے بیت ایشیءَ خدا وت بزانت۔
من بازیں سنگتے دیستگ کہ آ چو وَ بلوچی ءِ زبان ءِ بابت ءَ سک باز گپ کناں پہ آئیءَ کار کنگ ءُُ جہد ءِ گپ جن اَنت بلئے وتی کرد ءَ بہہ دیم ءَ نیاراں ،آایوک ءَ ھما وھد ءَ بلوچی کتابے وان اَنت کہ کسے آھاں کتابے پہ مپت بدنت ،اے اوں یک اجبیں ھبرے کہ دنیا ءِ درائیں کتاباں ما پہ بہا زوراں آئی ءِ نہاد توری ۱۰۰۰ کلدار بہ بیت بلئے بلوچی کتاباں بل،ما وَ ماہتاکے اوں بہا نہ زوران دانکہ کسے مارا آئی ءَ پہ مپت مہ دنت اے مپت زوری ءَ اوں بلوچی زبان ءِ ارزشت کم کتگ ءُُ مئے چاپکاران ھم بلوچی ءِ ارزشت دور داتگ من اے گپ ءَ اے گپ ءَ پمشکا کنگ ءَ اَنت کہ مئے چاپکار ایوک ءَ ھما کتاب ءَ چاپ کن اَنت کہ آئیءِ تہا ھماآنی جند ءَ نپ ءُُ سیتے برسیت آ بہہ اے جہد ءَ نہ کناں ک چہ ایشی ءَ زبان ءُُ لبزانک ءَ ھم نپ ءُُ سیت بہ رسیت گوں ۔
ارز ءَ کئی د ر بند ءَ برے
شاہ کہ اد ءَ وت لج بر اِنت
بلوچی لبزانک ءِ ھما روچ ءَ دیمروئی کت کنت کہ آئی زبان ءِ دیمروئی ءَ دیم ءَ بہ کنت ءُُ نوں دل جنگ ءَ یل بہ کنت نوں گامے دیم ءَ بروت ءُُ ھما بنگپاں نبشتہ کنگ بہ پرمائیت کہ زبان ءَ گوں میان اوستانی لبزانکاں نزیک ءُُ ھمدپ بہ کنت نوں تہنا شئیر ءُُ آزمانکی کتاب چاپ مہ بنت بلکیں اے دگہ بنگپاں دلگوش دئیگ بہ بیت دانکہ کتاب وانوک اے دگہ زبانانی بدل ءَ ھما مواد ءُُ نکانان بلوچی ءِ تہا بوآن اَنت۔
