نامداریں قولے است اِنت کہ ’’ راجدپتر ءِ مستریں راستی ایش اِنت کہ چہ آئیءَ کس ہچی ہئیل نہ بارت‘‘ بزاں راجدپتر ہما راستیں راستی اِنت کہ آ بدل بوت نہ کنت بلئے چرئی ءَ پنت ءُُ سوج یاکہ ہیل گرگ بوت کنت ۔جہان ءِ تہا ہما درائیں قوم ءُُ راج سوبمند بوتگ اَنت کہ آہاں چہ وتی راجدپتر ءَ چہ سوج زرتگ ءُُ وتی سوبمندی ءِ راہ گیشوار کتگ اَنت ،دومی دست ءَ ہما راج ءُُ قوم کہ چہ وتی راجدپتر ءَ ہیئل نہ زور اَنت آہچبر تاہیر ی ءَ نشت نہ کن اَنت ءُُ مدام جنگ ءُُ جیڑگانی آماچ بنت ۔بلوچ قوم ءُُ بلوچستان ءِ راجدپتر وتی استی ءِ ھساب ءَ سک کہن ءُُ گیدی اِنت ہمیشی راجدپتر ءِ دامن ءَ بازیں رازے ماپنوشتگ شرت ایشانی شوہاز ءُُ قوم ءِ دیم ءَ تالان کنگ اِنت ءُُ چشیں مردم سک کم اِنت کہ راجدپتر ءِ سرپوشیں رازانی نیام ءَ راستی ءَ شوہا ز بہ کنت اِنت ءُُ دیمروئی ءِ راہاں گیشواری ءَ وتی کرد ءَ پیلو بہ کنت ۔پرچکہ مئے چاگرد ءِ تہا راجدپتر ءَ یک بے بودیں وانگی یے پہمگ بیت ءُُ کس ایشیءِ وانگ ءَ اوں ساڑی نہ اِنت اگاں چہ دنیا ءِ درائیں دیمروئی کتگیں قوم ءُُ راج گیشتر وھد وتی راجدپتر ءَ دئینت دانکہ آوتی راج ءِ نفسیات ءَ جوانی ءَ زانت بہ کن اَنت ءُُ قوم ءِ دیمروئی ءَ جوانی ءَ کار کت بہ کن اَنت۔
بلوچانی راجدپتر اوں دنیا ءِ دیم ءَ زاہر اِنت ءُُ بازیں دپتر زانتانی ایشیءِ سرا چم چاری است اِنت ہمیشانی تہا یک نامداریں دپتر زانتے پنام’’ غلام فاروق بلوچ ‘‘ اِنت کہ آئیءَ وتی زند ءُُ وانگ ہردو پہ بلوچ ءُُ بلوچستان ءِ راجدپتر ءِ تچک ءُُ پہک کنگ ءَ ندر کتگ ءُُ ہمے درچ ءَ آئیءِ سے کتاب چاپ ءُُ شنگ بوتگ ءُُ چارمی کتاب پہ چاپ ءَ جریدگ اِنت۔ایشی ءَ پیش کہ واجہ فاروق بلوچ ءِ بابت ءَ دگہ گیشیں تران بہ بیت دو دانک آئیءِ زند بابت ءَ درشان کنگ لوٹاں واجہ فاروق بلوچ ۷ دسمبر ۱۹۶۷ ءَ کوئٹہ ءَ ودی بوتگ بلئے واجہ ءِ بنجاہی سیادی گوں ضلع مستونگ ءَ اِنت ،واجہ فاروق بلوچانی کٹم دھوار ءَ چہ سیادی داریت ءُُ آئیءِ کماش ءُُ بن پیروک ہمے کٹم ءِ مستر ءُُ میر بوتگ اَنت ۔واجہ فاروق بلوچ ءَ وتی سرجمیں وانگ چہ کوئٹہ شہر ءَ وانتگ اَنت وتی ایم اے چہ راجدپتری وانگ بزاں تاریخ ءَ کتگ ءُُ انوگیں وھد ءَ مزن شاھدربرجاہ کوئٹہ ءَ ہمے بہرگ ءِ سوجکارے ءِ جہت ءَ وتی کرد ءَ پیلو کنگ ءَ اِنت ۔ واجہ فاروق بلوچ تاریخ ءِ وتی ایم فل سرجم کتگ ءُُ ہمے وانگی یے تہا انوں پی ایچ ڈی ءِ گڈی سیمسران سر اِنت ءُُ ہمے زوتاں واجہ ءَ را ڈگری بکشائگ بیت ءُُ آ تاریخ زانت بزاں ڈاکٹر گشگ بیت ۔چنائی ءَ ہم واجہ ءَ وتی راجدپتر ( بزاں بلوچ دپتر) ءِ بابت ءَ ہمنچو زانت ءُُ زانگ است اِنت کہ من پہ ستک گشت کن اَنت کہ جامعہ بلوچستان ءِ دگہ ہچ سوجکار ءِ گور ءَ انچو زانت ءُُ زانگ بلوچ ءُُ بلوچستان ءِ دپتر ءِ بابت ءَ است بیت چش نہ اِنت کہ ا ے رد پہ آئیءِ توسیپ ءَ کمائگ بوئگ اَنت بلئے راستی ہمیش اِنت اگاں کسے ءَ آئی ءِ دیوان گپتگ گڈا آئیءِ گپ ءُُ تران مدام چہ بلوچ دپتر ءَ بندات بیت ءُُ چہ بلوچستان ءَ آسر۔۲۰۰۵ ءَ واجہ ءَ بلوچستان اسٹیڈی سینٹر ءَ ااسسٹنٹ پروفیسر ءِ اگدھا دست گپتگ ءُُ داں روچ مروچی ہمے اگدگ ءَ گوں بندوک اِنت ۔واجہ ءِ کتابانی تہا اولی کتاب ’’خان اعظم میر نصیر خان نوری ،بلوچ اور انکا وتن ،بلوچستان کے تہذیبی نقوش ، بابا امیر حمزہ چاپ ءُُ شنگ بوتگ اَنت ابید چہ ایشیءَ دگہ دو کتاب پہ چاپ ءَ جرید گ اَنت کہ ہمے زوتاں چاپ ءُُ شنگ بنت ۔واجہ ءِ بے ھساب پٹ ءُُ پولی نبشتانک جتا جتا ئیں پولکاری تاکبنداں چاپ بوتگ اَنت۔ءُُ آئیءِ وانگی اوں پٹ ءُُ پولی اَنت کہ ہر ھساب ءَ وتی درور وت اَنت ۔ایشاں ابید کہ واجہ فاروق بلوچ ءَ پہ بلوچ قوم ءَ بے مٹیں کارے کتگ آ بلوچانی دودمان ءِ رکینگ اِنت بزاں آئیءَ سرجمیں بلوچستان گول اِتگ ءُُ بلوچانی دودمانی ساز ءُُ ازباب یکجاہ کتگ اَنت ایشانی تہا مہرگڑھ ءِ دودمان بہ بنت یاکہ کوہلو ءَ چہ درکپتگیں ڈائناسورءِ مائیگ،دمبانی عہدی شک ءُُ سنگ نبشت بہ بنت یاکہ ہزاراں سال کہنیں کمبانی سرامد کہ مئے دودمان ءِ شاہدی ءَ بس اَنت کہ بلوچستان ءِ اسل نندوک بلوچ بوتگ اَنت ءُُ مئے دودمانی مرچی ءَ ہزاراں لکھاں سال کہن ءُُ گیدی اِنت۔آئیءِ جوڑ داتگتیں آجوبگاہ( میوزیم) ءِ تہا بلوچستان ءِ کنڈ کنڈ ءَ درکپتگیں دودمانی سرامد ایر کنگ بوتگ اَنت ءُُ اے آجوبگاہ ( میوزیم) ءِ سیرآپ کنوک واجہ فاروق بلوچ ءُُ آئیءِ چندے نزیکیں ہمراہ بوتگ اَنت ۔واجہ فاروق بلوچ ہما یکیں راجدپتر نویس اِنت کہ آئیءِ دپترنویسی ءِ توسیپ پاکستان ءِ مستریں راجدپتر نویس واجہ مبارک علی ءَ کتگ آئیءَ کم ءُُ گیش سد ءَ برز راجدپتر ءِ سرا کتاب نبشتہ کتگ ءُُ آ واجہ فاروق بلوچ ءِ بابت ءَ گشیت کہ ’’ جناب فاروق بلوچ کی شائع شدہ کتابیں بلوچوں کی تاریخ کو سمجھنے اوراس کے گوشوں تک رسائی کے لئے بنیادی اور کامل حیثیت رکھتی ہیں ‘‘ اے واجہ مبارک علی ءِ گشگ اِنت ءُُ ہمک کس ءَ کہ واجہ ءِ کتاب وانتگ اَنت آ جوانی ءَ زانت کنت کہ مبارک علی ءِ گپ دروگ نہ اَنت۔واجہ فاروق بلوچ ءِ کتاب’’ بابا امیر حمزہ‘‘ یک انچیں کتابے کہ بلوچانی بابت ءَ بازیں گمان ءُُ بے بنیں گپانی گیشواریءَ کنت کہ بلوچ قوم حضرت حمزہ ءِ اولا اَنت ءُُ پری ءِ چک ءُُ پسگاں ءُُ اے دگہ بازیں انچیں گمانی گپانی پسو اِنت ءُُ واجہ ءَ وتی جہد ءُُ پولکاری ءَ چہ اے پدر کتگ کہ بلوچ قوم راستی حمزہ ءِ اولاد ءُُ پسگ اِنت بلئے آ حمزہ نہ بلکیں حمزہ بلوچ ءِ کہ یک بلوچے بوتگ ۔ءُُ پہ بلوچانی ھاترءَ جنگے کتگ۔واجہ فاروق بلوچ ءِ راجدپتر نویسی ءِ بابت ءَ یک راجدپتر نویسے اگاں تران بہ کنت داں جوانتر ءُُ شرتر اِنت کہ آ تک ءَ گیش سرپدی دات کنت بلئے مئے قوم ءِ مستریں بدبہتی ہمے بوتگ ءُُ ہمیش اِنت کہ مارا وتی راجی بامردانی آھانی زند ءُُ حیاتی ءَ سد ءُُ سما نہ بیت ءُُ آھانی بیرانی ءَ رند ہما مردم کہ آئیءِ ھلاپ بوتگ اَنت ہمائیءِ توسیپ ءَ انچیں انچیں گال کتار اَنت کہ کس ءَ چد ءُُ پیسر نہ کتگ۔ جامعہ بلوچستان کوئٹہ ءِ بلوچی ڈیپارٹمنٹ ءِ بہرگ ءَ یک دودے کہ چیزے سال اِنت برجم داشتگ آ ایش کہ وتی لبزانک ءُُ زبان ءِ بامردانی دلبڈی ءَ ’’ عہد بستگی ‘‘ داد ءُُ سوگات دئیگ بیت امبری (۲۰۱۶)اے داد بلوچی زبان ءِ نامداریں زبانزانت ءُُ لبزانتکار ’’ واجہ غنی پرواز ءَ ‘‘دئیگ بوئگ اَنت کہ آئیءِ جہد ءُُ کرد پہ بلوچی زبان ءِ نامداری ءُُ دیمروئی ءَ ہچبر شموشگ نہ بنت ہمے درگت ءَ من گوں بلوچی بہرگ ءِ کارمستر ءُُ کارگشاداں گشگ لوٹاں کہ اے عہد بستگی داد ءَ ایوک ءَ لبزانک ءُُ زبان ءِ سیمسراں داں بندیگ مکن اِت بلکیں ہمادرائیں بامرداں ایشیءِ تہا ہوار بہ کن ات گوں کہ چراہانی کرد ءُُ کتہ کاریاں بلوچ ءُُ بلوچستان ءِ نام وشنام بوتگ،ایشیءِ تہا راجدپتر نویس،گشندہ،ازمکار،سازندہ ءُُ ہنرکارانی اوں دلبڈی کنگ بہ بیت دانکہ کس وت ءَ را چہ اے عہد بستگی داد ءَ بے بہر مہ زانت ءُُ اے دل ءَ میار ایت کہ آئی ءِ کرد قوم ءَ شموشگار کتگ۔گڈی ءَ بس ہمے گشگ لوتاں کہ واجہ فاروق ءَ بلوچ راج ءُُ قوم ءِ دپتر نزآرتگ ءُُ داں روچ مرچی گوں ہمے کارءَ گلائش اِنت ،گوں اللہ پاک ءَ ہمے دعا اِنت کہ آ واجہ فاروق بلوچ ءِ توپیک ءُُ آٹیگ ءَ دائم ہمے رنگ ءَ برجم بہ کنت دانکہ آ ہمے ڈول ءَ مئے راجدپتر ءَ گوں نوک نوکیں پولکاریاں چکار بہ کنت۔
