آدینگ ءِ روچ ءَ بلوچستان ءِ سر وزیر میر عبدالقدوس بزنجو ءَ گشتگ ات کہ بلوچستان ءَ سنی ءُُ شعیہ فرقہ ءِ ہچ وڑیں تپاوت ءُُ دگری یے نیست ۔

گوستگیں بیست سالاں اے گپ ءَ را سک باز پلیس دئیگ بوتگ کہ بلوچستان ءَ سنی شعیہ جیڑہ چہ ملک ءِ ایندگہ دمگاں گیشتر بوتگ اے درچ ءَ یک نیمگے اے جہد کنگ بوت کہ بلوچستان ءَ قبائلی جیڑہاں گیش کنگ ءُُ ودینگ بہ بیت تنکہ دنیا اے باور بکنت کہ بلوچستان یک انچیں ہند ءُُ جاہے کہ اودا ایمنی ءُُ سلامتی ءِ جاور حال چہ بندر ءَ گیگ گوْم نہ انت ءُُ مہلوک چہ قدیم ءَ یک ناوشیں جاورحالے ءِ آماچ انت ۔

ہمے درچ ءَ کہندن بلوچ چاگرد ءَ را اے پیش دارگ بوتگ کہ اے یک مذہبی ءُُ نیکراہی چاگردے کہ اودا ایندگہ نیکراہ ءُُ فرقہاناں برداشت کنگ ءُُ سگگ نہ بیت ۔پہ زانت سنی ءُُ شعیہ تپاوت دیم ءَ آرگ بوہگان انت بلئے اے یک جوانیں گپے کہ گوستگیں روچاں فرقہہ یے ءِ نیمگ ءَ زرشانی کنگ بوتگ ات کہ آئی ءِ چیدگ ءُُ نشان بلوچ چاگرد ءِ بدل ءَ دگہ نیمگ ءَ شتگ انت۔

کہ چرآئی درا بیت کہ دنیا زانت ءُُ سرپد انت کہ بلوچ چاگرد یک نیکراہی ،مذہبی ٗءُُ فرقہ پرسیتں چاگردے نہ انت ءُُ ہما ملا ءُُ میاہاں کہ بلوچی ءِ چادر مانپوشتگ کہ آ وتی لیکہ ءُُ رو ءُ دم ءَ بلوچ چاگرد ءِ پدر یچ نہ انت بلکیں آہانی نام ءُُ پاگ بلوچی بیت بلئے آہانی کرد ءُُ گپتار بلوچ چاگرد ءِ چیدگ ءُُ نشان نہ انت پرچکہ بلوچ چاگرد ءَ چدوپیش اے وڑیں نشان ءُُ چیدگ گندگ نہ بیت ۔

ہندوستان ءِ بہر ءُُ بانگ ءَ پد درائیں پاکستان ءُُ بھارت ءُُ نیکراہی فرقہ پرستی ءِ بازیں جیڑہ یے ودی بوت ہزارانی کچَ ہند ایندگہ نیکراہی لیکہ داروکیں مردم کشگ ءُُ سوچگ بوت انت بلئے ہمے روچاں بلوچستان ہما ایوکین سرڈگار ات کہ اودا ننکہ بکالاں کشت ءُُ کونے بوت ءُُ ننکہ بلوچ چاگرد ءَ آہاناں تاچینگ ءُُ گلینگ بوت ءُُ ننکہ آہانی دکان ،زمین ءُُ مال ءُُ مڈی پولگ ءُُ پچ گرگ بوت انت بلکیں ہندوستان ءِ بہر ءُُ بانگ ءِ وہد ءَ بلوچستان ءِ ہماایوکین ہند ءُُ دیار ات کہ اودا بکال، گور ءُُ ایندگہ کم ٹکیں مردم ایمن ءُُ سلامت ات انت۔

اے درچ ءَ ملک ءِ ایندگہ دمگاں بکال ءُُ گور پولگ ءُُ جنگ بوت انت آہانی مال ءُُ مڈی پچ گرگ بوت انت ۔بلئے بلوچستان ءَ بلوچ مہلوک ءَ اشانی مدد ءُُ کمک کرت چدو پیش اگاں بلوچستان ءِ بند دپتر چارگ ءُُ ٹپاسگ بہ بیت گڈا گندگ بیت کہ بلوچستان ءِ حاکمانی دربار ءُُ سرکار ءَ بازیں کم ٹکیں مردماناں بدیں چم ءَ چارگ نہ بوتگ بلکیں آہاناں عزت ءُُ شرپ دئیگ بوتگ ءُُ حاکماں حکومت ءِ بازیں ذمہ واری ہمے بکال ءُُ گورانی دست ءَ بوتگ انت۔

چوکہ بلوچ ءِ خان کلیت دار گیشتر گور بوتگ انت کہ آہاں خان ءِ مالیات چاراتگ ءُُ دلگوش کتگ ۔اشی ءَ ابید بلوچستان ءَ بکال ،گور ءُُ ایندگہ کم ٹکیں مردمانی ہستی ءُُ بوتی بلوچی داستان ءُُ کسہاں ہم گندگ بنت کہ آہاں بلوچ چاگرد ءَ مزنیں کرد ءُُ بستارے ۔

اے داستان ءُُ کسہ اے شون دی انت کہ اے مردماناں ہچبر بلوچ چاگرد ءَ کمتر ءُُ کم ٹک چارگ ءُُ گندگ نہ بوتگ بلکیں بلوچ چاگرد ءِ ایندگہ مردمانی وڑا اے مردماں ہم عزت ءُُ شرپ ءِ نگاہ ءَ چارگ بوتگ پمشکہ اے گپ ءِ جنگ ءَ زبان کزا نہ بیت کہ بلوچ چاگرد ءَ ہستیں بلوچ میار ہچبر اے گپ ءِ اجازت ءَ نہ دنت کہ مردم اے حاترا جنگ ءُُ کشگ بہ بیت کہ آئی ءِ مذہب ءُُ فرقہ گوں تو جتا ءُُ گستا انت ۔

اگاں اے وڑیں کارے کنگ بیت آئی ءِ سیادی گوں بلوچ چاگرد ءُُ گوں بلوچ میار ءَ نہ انت بگندے ء اے وڑیں مردمے ءِ نام ءِ دیم ءَ بلوچی قبائلی نامے بہ بیت بلئے اے وڑیں مردمے سیادی ہچ وڑا گوں بلوچ چاگرد ءَ نہ انت ءُُ دومی گپ ایش انت بلوچ میار ءِ ردا کس پہ نام ءُُ نسب بلوچے نہ بیت بلکیں بلوچ بوہگ گوں بلوچ میار ءَ بندوک انت ہرکس کہ گوں اے میار ءَ نہ روت گوں، آ پہ نسل ءُُ نام بلوچ بوت نہ کنت۔

اے درچ ءَ بلوچ میار داریں مردم ءُُ سیاسی سروکانی ذمہ واری انت کہ بلوچ چاگرد ءِ حلاپ ءَ اے وڑیں بدیں لیکہانی دیم داری بکن انت ءُُ دنیاءِ دیم ءَ بلوچ چاگرد ءِ بنکی میار ءُُ کانوداں دیم ءَ بیار انت تنکہ دنیا بلوچ چاگرد ءُُ بلوچ میار ءِ کانوداں سرپد بہ بیت۔