دروگ ءِ پروش دئیگ ءُُ راج ءِ سوبمندی ءَ چار روچ پشت کپتگ ،اگاں راج سوبمند کنگی اِنت داں وت قیمتی ایں ووٹ ءَ تپر ءَ بجن اِت۔بی این پی ءِ درائیں نمائندگ ءُُ امیت داراے گپ نہ اِنت پہک ءُُ پلگا ر اَنت بے عیب کس نہ اِنت بلئے اے مردماں چہ مردم امیت داشت کنت ۔

پرچکہ اے راج ءِ خرید ءُُ فروخت ءَ گون نہ بنت ،مردمانی مستریں ردی ہمیش اِنت کہ آ وہدے پہ وتی نمائندگی ءَ مردمے گچین کنت داں دوبر آئی ءَ گوں تران نہ کنت اگاں یکے کپے تہنائی ءَ پہ وتی کارے ءَ آوانی گورا روت ءُُ وتی کارے ءِ پریات ءَ کنت ءُُ آ وہدے کہ کارائے نہ کنت۔

داں ایوکی ءَ زاہ ءُُ زکتے وَ کنت بلئے دیم پہ دیمی ءَ یاکہ گوں مچی ءَ آئی ءَ بہہ نہ گشیت اے ہما مردم اَنت کہ سرجمیں پنچ سالاں پہ راج ءَ ہچ اِش نہ کتگ بلکیں قوم ءُُ راجے گیشتر بزگ ءُُ رسوا کتگ یک برے پدا گچین کاریاں مہلوک ءِ لوگاں اتکگ انت ءُُ ووٹ لوٹگ اَنت۔

پہ زر ءُُ مال پہ چہ لالچے ءُُ متائے ما بہا وَ باں بلئے ایشیءَ بے حال کن اَنت کہ وہدے اے سوبمند بنت داں پہ ما چے کن اَنت وتی گران بہائیں ماڑی ءُُ نگرہیں گاڑیاں گوں سلامے اوں نہ کن اَنت ۔گڑا پرچہ ما وتی ووٹاں ایشاں بدیں ،زندءُُ مرگ ءِ یک گرانیں نوبتے بلوچانی سرا میلانک اِنت اے انچیں نازرکیں وہدے یا وَ مردم حاموشی ءَ لوگاں بہ نندایت ءُُ ندارہ بچار ایت چوقاضی ءِ وڑ ءَ 

گوں وتی مکر ءُُ فریباں گوں وتی زوراکیاں 
تو منا پونز ءَ رسینتگ من ندارہ چار اِتگ

اگاں نندگ ءُُ ندارہ چارگی اِنت گڈاں شر اِنت بلئے اگاں اے نازرکیں وہد ءَ پہ راج ءِ متا ءُُ سلامتی ءَ کارے کنگی اِنت داں انچیں پارٹی ءُُ انچیں مردم گچین کنگی اِنت کہ آ پہ راج ءَ دردے وارت بہ کن اَنت ۔

واجہیں جان محمد دشتی ءِ یک گپے منا باز دوست بوت کہ اگاں کار ءُُ روزگارے ءَ آئی ءِ ناکوزہگے پیسر بئیت انت داں منی گورجیگ گرگ بہ بیت،بلئے درائیں بلوچ منی ناکوزہگ اَنت،منی چک اَنت،من پماآہاں اے گرانیں بار اے عمر ءَ وتی کوپگاں زرتگ ،گڑا مئے بائد نہ اِنت کہ اے پیر مرد ءِ ہمراہ داری ءَ بکنیں ۔۔۔۔

واجہ جان محمد دشتی ءِ لوگ ءُُ کہول ءَ ہرکس زانت ءُُ سرپد اِنت ونت وانتگے ،وتی سرجمیں کہولے وانینتگ ءُُ مز ن مزنیں اگدہاں وت اوں کارے کتگ ءُُ آئی ءِ کہول ءِ مردم اوں جوان جوانیں اگدہاں کار کنگ ءَ اَنت۔

آئی وتی عمر ءِ یک بہرے آسر کتگ آئی چے پکار کہ اے عمر ءَ قوم ءُُ راج ءِ چشیں گرانیں بارے وتی نزوریں کوپگاں بہ کنت آئی اگاں بلوٹ اِتاں داں درملکاں یا وتی جند ءِ ہند ءُُ میتگ ءَ زند آسر کتگ اَت بلئے اِناآئی وتی راج ءِ بزگی ماراِتگ ءُُ زانتگ کہ اے بری اگاں اے قوم تیمارگ نہ بوت آوکیں وہد ءَ باریں اے قوم ءُُ راج ءِ جاور چون بنت ۔چیزے مردم است کہ واجہ جان محمددشتی ءِ ہلاپ ءَ بیان بازی کنگءَ اَنت۔

وہدے دشتی صاحب ءَ جست بوت کہ اے مردم کہ تئی ہلاپ ءَ وتگڑیں گپ کنگ ءَ انت تو ایشاں پسو پرچہ نہ کنئے داں آئیءَ درائینت کہ اے منی زہگ اَنت ایشاں وتی زہرشانی ءِ حق اِنت من پرچہ ایشاں پسو بہ کن اَنت اگاں من اے باری ءَ گچین کنگ بوتاں داں گوں وتی جہد ءُُ کاراں ایشانی پسوءَ دیاں۔چشیں زانت ءُُ زانگ ءِ واجہ ءِ بائد مردم ہمراہ داری ءَ بہ کنت۔

آ اوں انچیں ہمراہ داری کہ آسری بہ بیت پہ ووٹ ءُُ الیکشن ءَ مہ بیت،پہ پنچ سال ءُُ دہ سال ءِ مہ بیت بلکیں دائمی بہ بیت ۔کس پہک ءُُ پلگا ر نہ انت ،مردم پہک ءُُ پلگار کنگ بنت وہدے آوانی نزوری دیم ءَ آرگ بنت ،آواں سرپد کنگ بیت کہ چے چے کنگ لوٹ ایت ءُُ چے چے کنگ نلوٹ ایت ہما وہد ءَ یک شریں قومے جوڑ کنگ بوت کنت ۔گچین کاری نوں اتکگ ءُُ سر اِنت۔

اگاں پہ بلوچءُُ بلوچستان ءَ شریں بانداتے دئیگ لوٹ اِت داں واجہیں جان محمد دشتی ءِ باسک ءُُ ہم کوپگی کنگی اِنت ءُُ آوکیں ووٹ ءِ روچ ءَ ایوک ءَ تپر ءَ را وتی مہر ءُُ نشان جنگی انت۔اگاں بی این پی سوبمند بہ بیت داں سرجمیں راج سوبمند بیت ۔پمشکا اے بری مارا واجہ جان محمد دشتی ءِ ہمراہ داری کنگی اِنت،ہاموشی بوہگی نہ اِنت لوگاں نندگی نہ اِنت،چنائی ءَ بلوچ انوں تاوان بار اِنت۔

اے رژن کہ دشتی ءِ دروشم ءَ سہر اِنت ہمیشی ءِ گوما روگی اِنت۔ بلکیں رژنائیں بانداتے راج ءَ را رست بہ کنت اگاں نا تہاری ،چہ سیاہی گیش ءُُ بیم ناک بیت۔کرد وت مردم ءَ سہرا کنت کہ آ چتوریں واہگے ءِ مردم بوتگ یا است اِنتءُُ اگاں کسے ءَ واجہ جان محمد دشتی نزیکی ءَ دیستگ داں آئی ءِ نام ءَ گوں مدام اے گپ وت ہمدپ بیت کہ 
The man of Values