ہما کہ گمان اَت آ راست ءُُ پہک اَنت ،ہماکہ نہ پہکی دل ءَ اَت آ زاہر بوتاں ،بازیں مردمے بہا بوت،بازیں بہازورگ بوت،بازیں پہ ترس ءُُ بازیں پہ ہُب سیم ءُُ زر بوت ،زاہ ءُُ ملام بوت،ڈاہ ءُُ بیہار بوت بلئے گچین کاری ءِ روچ آسر بوت۔
اے روچ گمان ایمنی یے وَ چنائی ءَ نیست اَت بلئے بیرانی مہ بیت یا کم ءَ چہ کم بہ بیت ہمیشی ءِ دعا ہرکسی لنٹان اَت بلئے کسی دعا قبول نہ بوتاں ءُُ اے گچین کاری ءَ ہم بلوچستان ءِ سینگ چاک ءُُ ہونی بوت بازیں مردمے بیران بوتگ اَت بازیں ٹپی بوتگ اَت ،بلئے گچین کاری آسر بوت۔حکومت پی ٹی آئی ءِ اتکگ چون اتک پرچہ اتک کیا آورت اے گپاں ہرکس زانت ءُُ سرپد اِنت بلئے کس گشت نہ کنت حئیر ۔۔۔۔!
بلوچستا ن ءِ حکومتی اے رندی ہم دو پارٹی ءِ میان ءَ بہر بوہگ ءِ گمان است انت یکے وَ بی این پی (مینگل) ءِ بزاں واجہ اختر جان مینگل ءِ ءُُ دومی چہ بی اے پی ءَ گچین بوتگیں مردمے گیشتر جام کمال ءِ نام گرگ بوہگ ءَ اِنت بلئے اے انگت ءَ پہک نہ انت۔بلوچستان ءَ دوبہرگی حکومت پیسرا ہم بے سوب بوتگ ءُُ بلوچستان ءَ را ہچی نپ ءُُ ستے نہ رستگ اے برے اگاں پدا ہمے دو بہر گی حکومت جوڑ کنگ بوت ۔
کہ دو ءُُ نیم سال اختر بلوچستان ءَ حکومتی کنت ءُُ دگہ دو ءُُ نیم سال چہ بی اے پی ءَ کسے کیت ءُُ حکومتی کنت۔اگاں اے ڈول بہ بیت داں نکس بلوچ ءَ را بیت،بلوچستان ءَ را بیت پرچہ دو پہ قوم ءِ دیمروئی یے کاراں ہچ نہ اِنت آ اوں پدا اے ڈولیں پدمنتگیں دمگے ءَ جان دراہی ،وانگ،ایمنی ،زر ءُُ مالی ،مال ءُُ مڈیگی ہچ حسابیں آسراتی یے نیست انت ۔
یک ءُُ دوسال ءَ اے درائیں چیز چون ءُُ چتور گپت بنت۔پمشکا اگاں واجہ عمران خان کہ تبدیلیءُُ نوکیں پاکستان ءِ گپ ءَ جنت داں گوستگیں باریگ ءِ اے ردی ءَ کم چہ کم مہ کنت ۔بلوچستان ءِ گچین کار ی ءِ بازیں ہنداں ردیں ووٹ ءُُ دروگیں ٹپہ جنی ءِ گپ ءُُ حال بازیں شنگ ءُُ ایشی ءِ ہلاپ ءَ زارشان ءُُ الیکشن کمیشن ءَ را ہم نوٹس روان دئیگ بوتگ بلئے اے ملک ءَ زانہ کدی حق ءِ گپ کنگ ءُُ جنگ بوتگ کہ باری مرچی ءِ بہ بیت ۔
پمشکا’’ بشود زم زم ءِ آپ ءَ دل ءَ ہزار برا‘‘ بازیں مردم گل اِنت کہ آوانی بدوائی کہ ہما مردماں گوں بوتگ آ بے سوب بوتگ اَنت ۔بلئے اے چیز ءَ کس نچارایت کہ اگاں تئی دل ءِ نادوستیں مردمے بے سوب بوتگ بلئے راج ءِ یک نادوستیں یاراج بدوائیں مردمے پہ زور سوبمند کنگ ءُُ راج ءِ سرا مُشگ بوتگ آ چتور پرتو وشیں بانداتے آورت کنت ۔فیس بک ءُُ وٹس ا پ ءَ بازیں مردمے لہتیں مردم ءَ را من نام نہ گراں چیوا ءُُ ملنڈ کنگءَ اِنت۔
بلے اے بد بخت اے نزاناں کہ آ وتی جند ءِ باسک ءُُ باہڑی ءَ تاوان بارکنگ ءَ اَنت ۔انوں ایشانی پہم ءَ اے گپ نیت اِنت بلئے وہد سکیں زالمیں چیزے اے کس ءَ بہ بکشائی وہد وت پیش داریت کہ کئے راست بوتگ ءُُ کئے دروگ بند۔
انچو کہ من پیسر ا گشگ ءَ اِتاں کہ توک ہماانت ایوک ءَ نوک کنگ بوتگ،پمشکا مہلوک بائد اے برے اے توک ءِ سانکل ءَ بہ سندایت بقول واجہ جان محمد دشتی ئیگ ءَ اے ودار ءَ راج مہ کنت کہ پدا گچین کاری یے بئیت انت نوں گڑا گچین بوتگیں مردماں جست گرگ بیت ،اناں بلکیں انوں ہمے وہد ءَ چہ ہما کہ گچین پہ پہ سرکماشی ءَ اے راج ءِ آئیءِ پد ءُُ رند کنگی اِنت آ ئی ءَ گٹ کنگی اِنت۔
آئی ءِ کتہ کاریانی چار ءُُ بچار کنگی اِنت،اگاں آئی ہما کار کہ انوں بلوچستان ءَ الم اَنت نہ کت اَنت داں آئی جیگ گرگ ءُُ جست کنگی اِنت،اگاں آئی وتی ہما قول کہ گچین کار ی ءِ وہد ءَ پہ ووٹ گرگ ءَ اتکگ ءُُ راج ءَ گوں سوگند کتگ اَنت آ اِش پیلو نہ کت اَت داں آجست کنگی انت پمشکا اے پگر مہ نند اِت کہ آوکیں دور ءَ دگہ گہتر ءُُ شرترینے کیت انت۔دگہ پہک ءُُ پلگاریں اشرفی اچے پمن ءُُ پرتو ہچبر نئیت انت بلکیں مردم ہمیش اَنت کہ تو دیستگ اَنت۔
بدلی ترا وتی اندر ءَ آرگی اِنت دانکہ تو بدل نہ بئے تئی رہشون ءُُ لیڈر بدل نہ بنت ۔آ مدام تئی کم زانتی ءُُ بزگی ءُُ نادانیاں گنداں تئی ریپین اَنت رد دئینت بلئے اے برے بائد شمئے وتی رد دئیگ ءَ پیسر ایشاں اے سرپدی ءَ بدئیت کہ نوں دنیا بدل بوتگ لس مہوک شیوار ءُُ زانتکار اِنت ،نوں شمئے پندلاں سرپد ءُُ پوہ اِنت۔ گومے گپاں بس دعائے کت کناں کہ پاریگیں جاوراں چہ اگاں شرتر نہ بیت داں گندگ اوں مہ بیت ۔
بلوچستان ءِ نوکیں حکومت تُری ہرکسی بہ بیت بلئے بلوچستان ءِ جاوری مٹی ءِ گمان زبریں نیست اِنت ،پرچکہ ہما مردم ءَ کہ مہلوک ءِ امیت وابستگ بوتگ اَنت۔
کہ بلکیں اے مردم دیم ءَ بیا اَنت وڑے بہ بیت بلئے زوراک ءُُ زالماں نیشت کہ مہلوک یک انچیں رہشونے ءِ امیت وار اِتاں کہ پہ راج ءُُ قوم ءَ کارے کت بہ کنت ،وتی راج ءِ بزگی ءَ بہ زانت ء‘ آئی گیشوار ءَ جہدے دیم ءَ برت بہ کنت چشیناں و اے ملک ءَ نیل اَنت نوں چون کنئے ۔۔۔۔۔