آئی ءِ پت چہ تراسی بادشاہان ات ۔ آئی ءِ مات زیمر ءُُ شررنگی ءِ بانک اَت ۔ آیک وہدے گوں وتی مات ءُُ ہشت ترْوں پرناسی کوہ ءَ نشتگ ات ءُُ ہمودا گوں اپولو ءَ دچار کپت کہ آ مدام گوں کندوکیں دیھ تھالیا ءَ گوں دست ءُُ دوات۔

اپولو گوں آرپیس ءَ پجاروک بوت ءُُ آئی ءَ یک کلمے زرت ءُُ دات ئےِ کہ بجنت ۔ آئی ءِ مات ءَ آئی ءَ را شئیر گشت گوں ۔ اے وڑا آ یک شائرے ءُُ پہلوانے ءِ وڑا رست ءُُ مزن بوت۔ ہنچیں شائر ءُُ پہلوانے کہ دنیا ءَ چدو پیسر نہ دیستگ ات۔ مید ءُُ ماہیگراں آ مدام منت کت کہ گوں آہاں زر ءَ بئیت ءُُ مہلا سہب ءَ یکدار ءِ سرا وتی نل ءَ بجنت پرچہ کہ آہاں زانت کہ وہدے آ وتی نل ءَ دپ ءَ کنت۔

گڑا ماہگ چہ زر ءِ جہلانک سر بندانت ءُُ برزا کاینت پہ آئی ءِ نل ءِ گوشدارگ ءَ۔ ءُُ اے وڑا پرآہاں ماہیگ ءِ گرگ ارزان بیت بلئے اگاں آرپیس بیاتکین ہم آہاں ماہیگ گپت نہ کنت پرچکہ وہدے آئی ءَ نل دپ ءَ کت گڑا درائیں ماہیگر چہ ماہیگاں بے ترانگ بوت انت اتک انت آرپیئس ءِ کش ءُُ کر ءَ نشت انت ءُُ آئی ءِ نل ءِ توار اش گوش داشت ، آئی ءَ ہنچو نل جت کہ ماہیگرانی دپ ہم چو ماہیگاں پچ بوت انت ۔

ءُُ وہدے آئی ءَ نل ءِ جنگ بند کت ءُُ ماہیگراں داں سد ءُُ سما کت ماہیگ پدا زر ءِ جہلانک ءَ شتگ ات انت ۔ اے وڑا ماہیگرآرپیئس ہمراہی ءَ ہوں گوں ہشکیں دست ءَ لوگ ءَ اتک انت ۔ وہدے آئی ءَ کہچراں نل جت گڑا درائیں میش ،بزءُُ گو ک آئی ءِ رند ءَ بوت انت تہنا داشتگیں پس ءُُ گوک آئی ءِ رند ءَ نہ بوت انت بلکیں وکشی ہم ،لجوئیں کرگوشگ ، آسک ءُُ گرک دراہ۔

وہدے آ چہ کہچراں گوست گڑا اے درائیں گنگدام آئی ءِ پدا ات انت ءُُ وہدے نشت گڑا آ آئی ءِ چپ ءُُ چاگرد ءَ اوشتات انت ءُُ نل ءِ گوشداشت ۔ اے ولوت چہ آئی ءِ نل ءَ ہنچو بے سد ءُُ سما بوت انت کہ گرک ءُُ تولگ پس ءُُ میشاں ورگ ءَ بے ترانگ بوت انت ءُُ ہمے کہ نل ءِ توار بند بوت آہاں دریہہ کت بلئے آ مدام پشت کپت انت ءُُ چہ وت ءَ سک بژنی بوت انت کہ میش ءُُ پس چہ آہانی دست ءَ شت انت ۔

ہمے وڑا کہ آ مستریں بوان ءُُ ردان بوت آئی ءِ نل ءِ توار وشتر بوان بوت نوں ایوک ءَ دلوت ءُُ گنگدام آئی ءِ نل ءِ شیدائی نہ ات انت بلیں درچک ءُُ دار ہم آئی ءِ نل ءِ توار ءَ گران ءَ آئی ءِ دمب ءَ بوت انت ۔ درچکاں وہدے نل ءِ توار ایش کت گڑا آ چہ زمین ءَ درکپت انت گوں وتی تابءُُ ریسیں روتگاں آئی ءِ پشت ءَ سرگپت انت تراس ءُُ انگت ءُُ اے وڑیں درچکانی مچی یے است کہ انگت ءَ نل ءَ دلگوش انت ۔

ہمے وڑا مردم ہم آئی ءِ دمب ءَ ات انت ہنچو کہ آ نل ءُُ شئیرے جنگ ءَ درکپت ۔ جنین مردین،جنک بچک ، ءُُ گچینی جنک آئی ءِ رند ءَ بوت انت وہد ہمے وڑا وتی کنڈگ ءَ جنزان ات مردم ءُُ چیزانی رنگ ءُُ جاور بدل بوان بو ت انت بلئے یک چیزے آئی ءَ ماراتگ ات کہ یک دروشمے بدل نہ بوتگ مدام گوں آئی ءَ گون ات۔ مدام آئی ءِ دیم ءَ ات ءُُ آئی ءِ گوشدارگ ءَ ساڑی ات ۔

نوں کہ آئی ءَ شری ءَ دلگوش کت آئی ءَ زانت کہ اے مدام آئی ءِ گوشداروکانی سرپ ءَ است موجود انت تری آئی ءِ گوشداروک دلوت ءُُ گنگدام بوتگ انت یا درچک ءُُ مردم ،آ مدام گوں ہرچ وڑیں گوشداروکاں ساڑی بوتگ گوں وتی مزنیں سیائین چم ءُُ سیائیںءُُ دراجیں ملگوراں گوں بے ترک ءُُ توار اوشتاتگ ،آئی ءِ دیم چو گلاب ءِ پل ءَ ات۔ نوں یک روچی آئی ءَ آ زرت ءُُ یکرا برت ۔

آئی ءِ نام ایروڈائیس ات ایروڈائس آئی ءَ را گشت کہ آ چہ چرائی ہچ ءَ دلمانگ نہ انت آئی ءِ واہگ بس ہمیش انت کہ ہرجاہ کہ آ بیت آ ہم گون بہ بیت ،مدام ،آئی ءَ گشت کہ آ اے گپ ءَ ہم زانت کہ پرآئی ءِ دوستی ءُُ مہر امیت وار نہ انت ۔بلئے پرے گپ ءَ آ آئی ءَ را داشت نہ کنت کہ آئی ءِ دمب ءَ مہ بیت ،آئی ءِ سوت ءُُ نل ءِ توار ءَ گوش مدار ات ۔ آئی ءَ گشت آ آئی ءِ مولد بوہگ ءَ رازی انت اگاں دل ءَ میار ایت ۔
Heroes, Gods and Monsters of the Greek Myths )