زانت ءُُ بے زانتی ءِ گپ ءَ مدام زانت باج بارت بلئے زانت ءِ بندات گوں بے زانتی ءَ اِنت پمشکا بے زانتی زانت ءِ اولی پدیانک اِنت۔ شاہ زانتاں مدام گشتگ کہ آ مردم کہ وت ءَ زانتکار لیک ایت مستریں جاہل ءُُ بے زانت ہما اِنت ۔
نامداریں شاہ زانت سقراط ءَ وہدے جست بیت کہ تئی زانت ءِ کیلو چے اِنت بزاں تو چنچو ہیل برتگ ءُُ چنچو زانئے داں آئی پسو ہمیش اَت کہ من بس ہمے زاناں کہ من ہچی نزاناں ۔۔۔۔۔بلئے چشیں مردم تئی ءُُ منی کرءُُ کشاں ہزارانی حساب ءَ است انت کہ وت ءَ را چہ کلیں دنیا ءَ زانتکار ءُُ لاحق سرپد بنت ،آوانی گورا ایوک ءَ ہماوانی جند ءِ توسیپ ءَ ابید دومی ءِ توسیپ کنگ زاہ ءِ برابر انت چشیں مردم اے گپ ءَ بے حال اَنت کہ توسیپ ہما انت۔
کہ دنیا ئے بہ کنت وت وتی جند ءِ توسیپ کنگ ءُُ کنائینگ ءَ را بلوچاں ہم بوئے پیماز ءَ گوں شبین داتگ۔لاحقیں مردم ہما انت کہ وتی نزانتی ءَ سرپد بہ بیت ءُُ زانت ءِ شوہاز ءَ دربئیت ءُُ زانت انچیں چیزے کہ آسر نہ بیت آئی ءَ را آسری نیست انت ءُُ آ زانت کہ آسر بہ بیت آ زانتے نہ اِنت ۔مرچیگیں چاگرد ءَ وتی گلائی ءُُ وتی ستائی سک باز انت ۔
ہرکس گشیت کہ ایوک ءَ من ءُُ بس من پدا پیر ءُُ مرشدی ہم باز انت اگاں یکے مردمے ءِ دو سے لوٹوک یا دوسے لِٹک مہ گون مہ بیت آ اے تچءُُ تاگ ءَ گون نہ بیت ۔پمشکا مئے چاگرد ءِ عالمانی ہمے واہگ انت کہ آئی ءِ گور ءَ مردمانی مچی مہ بیت ،آ مردم آئی ءَ را جست ءُُ پرس مہ کناں ایوک ءَ آئی توسیپ ءَ بہ کن اَنت ءُُ آئی ءَ را کہ ہما مردم دوست نہ بیت آئی ءِ مپت ءُُ ناحق ءَ ایرجنی ءَ بہ کن اَنت ۔
چشیں واکیا باز انت یک مردمے کہ تو ہچبر نہ دیستگ آئی دیوان نہ گپتگ ،آئی بابت ءَ سہی ءُُ سرپد نہ ات بلئے ایوک ءَ وتی ہما پیر ءِ گشگ ءِ پدا آئی ایرجنی ہم جاہلی ءُُ بے زانتی یے۔بوت کنت ہما مردم ءِ گوماآئی دگہ ذاتی جیڑگے بندوک انت بلئے مرشدے وَ نزان اَنت ۔
بلئے آ ایرجنی ءُُ بد ءُُ ردی ءَ ساڑی بنت پرچہ ءَ پیر ءَ گشتگ ۔۔۔یکے دومی ءِ نہ منّگ شریں گپے ہو!!!! من ءَ کسے اگاں جست بہ کنت داں منی پسو ہمیش بیت کہ نہ منّی شریں گپے اگاں منوکائی بہ بیت داں ساچست ءُُ نوکیں چیزانی جوڑ کنگ ءُُ نوکیں حیالانی پیداکی نہ بیت ،پرچہ ہرچی تو منّ ات ءُُ من ہم منّ ات داں نوکیں حیالے چتور ودی بیت ۔
آں آ نہ منّوکائی جاہلی یے تک ءَ مہ بیت بلکیں لوجیکل ءُُ دلیلانی حساب ءَ مہ بیت چش مہ بیت کہ دو جمع دو چار انت بلئے دیمئے مردم پہ سد ایشی ءَ پنچ کنگ ءِ آٹیگ ءَ بہ کنت بلکیں چش بہ بیت کہ’’ ایک اور ایک دو ہم بنت ءُُ گیارہ ہم‘‘کسے ایشی ءَ دو ہم گشت کنت ءُُ کسے ایشی ءَ گیارہ ہم۔ اے پیمیں زانتے بہ بیت داں وش انت ۔پرچکہ اے وڑا دونوکیں چیز دیم ءَ کیت ۔
مئے چاگرد ءَ بلئے گشیتر ہما دو جمع دو چار نہ انت بلکیں پنچ ءِ وڑیں جاہلی ءُُ بے زانتی انت ۔دانکہ اے جاہلی ءُُ بے زانتی در مئیت اے قوم ہچبر شر نہ بیت ۔انوں زیکیں گپے کہ پی سی ایس ءِ چکاس بوہگ ءَ اتءُُ پیپر بلوچی زبان ئیگ اَت ۔نودربرانی کساس ءَ بچار اِت داں ہزارانی حساب ءَ ات ءُُ ہمے ہزاریں مردمانی سیادی گوں بلوچ ءُُ بلوچی ءَ ات ۔بزاں درست بلوچ اِتاں ۔
بلئے وہدے چکاس ءِ وہد بوت ءُُ پیپر ایشاں دات ءُُ ڈن ءَ کہ اتکاں درائیں ورناہانی لونس لونجان اتاں ءُُ لنٹ ہشک اِتاں ۔وہدے جست بوت کہ گشگ ہمیش ات کہ پیپر سک گران جوڑ کنگ بوتگ ۔بلئے پیپیر ءِ اگاں جستانی کسے بچار ایت آ وت حیران بیت کہ اے جستانی تہا گرانی کجا بوتگ ۔ہزار بلوچءِ تہا اگاں کسے سید ظہور شاہ ہاشمی ءِ پہ زبان ءُُ لبزانک ءَ کار ءُُ کرد ءَ نزانت داں جست گر چے بہ کنت ،ہزاربلوچ ءِ تہا اگاں کسے گل خان نصیر ءِ شاعری ءَ چہ پوہ ءُُ سرپد نہ انت۔
داں جست گر چے بہ بیت ،ہزاربلوچ چہ وتی جند ءِ گدار بزاں چہ ناولاں سرپد ءُُ آشنا نہ انت گڑاں جست گر چے بکنت ۔انگت ءَ درائیں مردم زہر ءَ زہر اَنت کہ پیپر گران بوتگ اڑے پیپر گران نہ بوتگ بلکیں چم وتی عیئب ءَ کور اِنت ۔آ چیزءَ کہ تو وت نزان اِت داں دومی ءَ پرچہ میاریگ کنئے ،باز سنگت ءَ گلگ کتگ کہ اے لبزانکی جست بوتگ اَنت ،۔
ءُُ مئے پیپر زبان ءِ بوتگ ،بلئے ہمے بے زانتاں کسے جست بہ کنت کہ زبان چہ لبزانک ءَ چون ءُُ چتور جتا بوت کنت ؟ ءُُ اگاں پہکیں زبانزانتی جست آرگ بوتیں داں گشگ پدا ہمیش اَت کہ ما وَ لبزانک ءِ مردم بوتگ اَنت ایشاں زبانزانتی ءِ جست آورتگ ۔
اے وتی جند ءِ بے زانتی انت اگاں اے گپ منّگ ءُُ بہ بیت ءُُ وتی جند ءِ چماں پٹی شر م ءُُ حیا ئے اگاں است انت داں کموپگر بکن اِت کہ ما ءُُ شمو انگت ءَ وتی جند ءَ چے سرپد ءُُ آشنا نہ ایں گڑاں اے جہان ءَ چتور سرپد ءُُ آشنا بوت کنیں ۔
ہزار بلوچ انگت ءَ وتی جند ءَ چہ سرپد نہ انت اے افسوس ءِ گپ نہ اِنت؟؟؟؟ہزار بلوچ انگت ءَ سید ہاشمی ءَ چہ سرپد نہ انت کہ آئی ءَ پہ زبان ءُُ لبزانک ءَ کجام زہم جتگ اے افسوس ءِ گپ نہ انت ؟؟؟ما انگت ءَ پہر بندیں کہ’’ ما چکیں بلوچانی ،ماچکیں بلوچانی ‘‘اڈے تو انگت ءَ بلوچ ءَ نزانئے تو چتور آئی چک بوت کنئے ؟؟؟من پیسر ءَ گشتگ اَت کہ دروگ بندیں مردم مدام وتی نزوری ءُُ عیب ءَ دومی ءِ سرا مشگ ءِ جہد کنت ،آ مدام وتی نزانتکاری ءَ دومی ءِ نزانت ءَ ایرجنت ءُُ مئے چاگرد ءَ انچیں کور پہم ءُُ بے زانتیں مردمانی کمی نہ اِنت ۔
ہمے گپ ءَ را دگہ درآمدے ءَ بجت ایں کہ پیپر گران بوتگ داں پہمگ بوتگ اَت ،یک انچیں مردمے ءَ بہ کتیں کہ آئی ءَ بہہ بلوچی دست نہ جتگ داں انگت ءَ حئیر ات بلئے ہمے مردم کہ باریں سالانی سال ہمے چکاس ءِ تیاری ءَ گوں گلائش اِنت ۔
ءُُ بلوچی زبان بہ بیت یاکہ لبزانک آئی ءِ اولی تاکدیم کہ بندات بیت آ چہ سید ہاشمی ءُُ گل خان نصیر ءَ چہ بندات بنت ءُُ اے ہچبر سرگوز کنگ نہ بنت ۔بلوچی ءِ ہمک تک ءُُ پہنات ءَ سید ہاشمی گون انت تو آئی ءَ کہ نزان اِت داں اے دگہ بلوچی ءِ شاہ زانت ءُُ ندکارانی زانگ دروگے۔