گوں دوستاں ماہکانیں شپے ءِ گوازینگ ءَ پٹ ءُُ میدانے ءِ ضرورت بیت ءُُ نوشکی ءَ چشیں جاگہ باز انت ۔ہمے وڑیں یک روچے ءَ من گوں وتی سنگتاں پہ سئیل ءُُ شکارءَ درکپتاں ۔
مئے سنگت ءُُ ہمراہانی تہا من،بی ایچ نور،جمال،محمد بخش،خالد،عابد،شاہد،ثناہ اللہ، ءُُ ماسٹر مئے جاگہ یک بلائیں پٹ ءُُ میدانے اَت ءُُ ما پہ شکار ءَ درکپتگ اِتاں پہ مئے شکار ءَ بازیں گٹور ءُُ چرزے است ات ۔ما داں دو شپ ءَ نشتاں شپ ءَ گوں استالانی چارگ ءَ اوں روچ پہ شکار ءَ ۔۔۔۔
سنگتانی گپ ءُُ گالاں روچانی سما نہ بیت کہ اے دوئیں روچ چون ءُُ چے وڑ گوستاں ۔ہما چیز ءَ کہ گیشتر مارا تکانسر کتگ اَت آ مئے گاڑیانی ریکاں پسگ ۔۔۔۔چوکہ سرجمیں جاگہ ءَ ریکانی مزن مزنیں ڈاک است ات ہمے واست ءَ مئے گاڑی ریکانی تہا پس ات بلئے اودءِ مردمانی مہمانی ءَ بچار مارا یک میشے گون اَت ءُُ مئے مہمان بی ایچ نور ءِ سوب ءَ مارا ہمود ءِ کلگی مردماں دہ یک میشے پہ مہمانی دات بلوچانی روادار ءُُ مہمانداری انگت ءَ کوچگی ہنداں است انت۔
مئے وتی ٹکانہ ءِ سر بوہگ ءَ گوں یک چرزے مئے دیم ءَ اتک کہ دوستاں اے جت ءُُ جہلاد کت،چیزے گٹور ہم ہمے شکار ءَ جنگ بوتاں ۔مئے شپ وش اِتاں کہ محمدبخش ءَ وش کرتگ اِتاں آئی ءَ ٹوک ءُُ دومی ءِ ٹوک بند گ ءَ مئے شپ سک وش ءُُ تامدار کرتگ اَتاں ۔درائیں شپ ما انچو پہ کندگی گوازینت اگاں کسے ءَ شپ ماں ریکاں گوازینتگ آ زانت کہ ریکاں شپ چون سارت بنت آ ماہ بہ پدا نومبر ءِ داں چنچو سارتی بیت دومی ریکانی دگہ حرابی یے ایش اِنت کہ آ روچ ءَ پدا ہمنچو گرم ہم بنت شپ ءَ ما درست سر ما سری وپتاں بلئے روچاں بے آپی ءَ نہ بیت نک حشک اَت ۔شپ ماہیکان اَت چاردہی ماہ ءِ ندارگ ءُُ دوستانی دیوان ءَ منا باز وشی رست ۔
بائد مردم دائم ءَ انچیں گردگ بہ کن اَنت ۔اے تروتاب ءِ اولی مول ءُُ مراد وتی شادمانی اَت بلئے دومی ایش کہ ہمے زیدانی ہم ایوک ءَ دور بہ کن ءُُ اے بچار کہ گیاب بے ساہ دارءَ چنچو دلکش اَنت ۔مئے شکاری دو اِتاں یک واجہ عابد ءُُ دومی خالدجان ،خالد ءَ ہمے پٹ ءُُ میدانانی بازیں کسہ آورت اَنت ءُُ آئی ءَ گشت کہ ڈن ءُُ در ءِ مردہم اے پٹ ءَ پہ شکار ءَ اتکگ اَنت۔
عرب ءُُ اومانی مردم ہم اے پٹ ءَ پہ شکار ءَ اتکگ اَنت اے یک مزنیں شکار جاہ ئے بوتگ بلئے نوں بازیں شکارءِ واجہ ءَ اے دمگ ءَ شکار باز کم اِنت ۔یک وہدے اے جاگہ ءَ شکار کنگ یک وہد ءَ ہلک ءِ میر ءُُ معتبراں منع کرتگ اَت بلئے کئے شکاریاں کئے داشت کنت مرد م چہ دور دور ءَ اے پٹ ءَ پہ شکار ءَ کاینت ءُُ شکار کن اَنت ۔