یک راجے ءِ دیمروئی گوں آئی ءِ ورناہاں بندوک اِنت ءُُ ورناہانی دانکہ جوانیں وانگے ءُُ جوانیں زانتے گون مہ بیت آ راج ہچبر دیمروئی کت نہ کنت ۔ نہ ایوک ءَ بلوچستان ءَ بلکیں سرجمیں پاکستان ءَ دو رہبندی وانگ انت یکے پہ ازگار یں مردماں ءُُ یکے پہ غریب ءُُ ناتواناں ۔
ازگاریں مردم وتی زہگاں پرویوٹ ادارگاں وانین اَنت ءُُ ڈنی ملکاں اسکالرشپ ءِ درگت ءَ پہ وانگ ءَ روان دینت ءُُ غریب ءِ زہگ یک انچیں اسکولے ءَ وانگ ءَ اِنت کہ آودا نئے وانگ است ءَ نئے استادے ءُُ نئے کہ شہم ءُُ راہ داریں کتابے کہ چریشی ءَ زانت ءَ گیشی یے بئیت اِنت ۔
پمشکا چشیں یک نودربرے وہدے اگدہ یے ءِ سرا کیت آ قوم ءَ را چون دیمروئی دات کنت ءُُ آ مردم کہ ڈنی ملکاں وانگ ءَ روت ءُُ نوکریءَ اے ملک ءَ کیت آ ئی ءَ را چے سما اِنت کہ اے ملک ءِ بنکی جنجال چے چے اَنت ۔ اصل ءَ پاکستان ءِ ایجوکیشن سسٹم ءِ جند چہ بُن ءَ بے سر ءُُ پاد بوتگ است انت ۔یک زانتکاریں مردمے ایوک ءَ ہمے جوڑ کرتگیں کتاباں بچار ایت داں آ سرپد بوت کنت کہ اے قوم ءِ زہگ چے وانینگ بوہگ ءَ انت ۔
یک جاہ یے کہ وانگی کتاب شر نہ اَنت ءُُ ہما کورس کہ پہ وانینگ ءَ تیار بیت آ اوں بے زانتیں مردمے جوڑ کنت آئی آسر انچیں مردمانی بیت کہ مرچی گندگ بنت ۔یکے وَ وانگی کتاب جوان اَنت ءُُ نیکہ کورسے جوانیں دئیگ بوتگ ۔ دومی یک جوانیں راجے ءِ جوڑشت ءَ سائنسی سبجکٹاں گیش آئی ءِ آرٹس ءِ وانگی جوان کنگی بنت ۔ سائنس ءِ کار دیمروئی اِنت بلئے یک جوانیں چاگرد ءِ جوڑ کنگ ءَ آرٹس ءِ کمک لوٹیت ۔
بلئے اے ملک ءَ آرٹس ءِ نام ءِ گرگ چو دژنامے ءِ حساب ءَ اِنت ءُُ یک زہگے ودی رند ءَ بیت پیسر ءَ آئی ءَ را گشگ بیت کہ تئی سبجکٹ سائنس اِنت ۔ بلوچستان ءِ ہمک زہگ کہ میڑک کنت داں نود ءُُ نو درسد گونڈ ءِ سبجکٹ سائنس ءِ بیت ءُُ وہدے آ کالج ءَ کیت داں آئی ءَ را پہ زور ہمے سبجکٹ گٹ ءَ توک کنگ بیت ۔
پرچکہ کریئر کونسلنگ وَ نیست اِنت کہ وانگی کتابانی بابت ءَ یاکہ کورسانی بابت ءَ سرپدی یے بدنت بس ہمے یکیں چیز پگر ءَ نادینگ بیت کہ اگاں سائنس نہ وانت داں بے روزگار بئے ءُُ آرٹس ءَ کس جست نہ کنت ۔ بلوچستان ءِ نود ءُُ نو درس گونڈ یاوَ میڈیکل ءِ تیاری ءَ چیر ءُُ سر اَنت یاکہ گوں انجینرنگ ءَ سر ءُُ لینڈاَ نت چریشاں کس ءَ را آرٹس ءِ زورگ ءِ گشگ نہ بوتگ ۔
ءُُ اے سائنس سبجکٹانی وانگ ءَ پد اگاں چارگ بہ بیت کہ بلوچستان ءَ چنچو سائنٹسٹ جوڑ کتگ ؟ داں پسو ہچ۔۔۔۔نہ ایوک ءَ بلوچستان ءَ بلکیں سرجمیں پاکستان ءِ چنچو سائنٹسٹاں ۔۔۔یاکہ انچیں انجینر کہ آوانی جوڑشت میان استمانی جاہ ءَ پیش کنگ بنت ۔
اے وڑیں یک مردمے ہم گندگ نہ بیت۔ مئے گور ءَ سی ایس ایس ءُُ پی سی ایس اوں رٹہ پاس اَنت پمشکا وہدے اے وڑیں سیٹاں کاینت داں آ قومءَ را چے دات کنت ۔پمشکا ما نایک جوانیں چاگردے جوڑ کت کناں ءُُ نیکہ ما دیمروئی کت کناں ۔پرچکہ ہردوکانی بُنزہ گوں وانگ ءَ اِنت ءُُ مئے وانگی کتاباں اگاں میان استمانی زبان ءَ رجانک کنگ بہ بیت داں آ مئے سرا کند انت کہ ما آکبیت ءِ ورناہاں چے دئیگ ءَ انت ۔
بلوچستان ءَ چشیں اوں دورے گوستگ کہ ایجوکیشن منسٹر ءَ وت ایجوکیشن ءِ اسپیلنگ نزانتگ اَنت اے وڑیں ملکے دیمروئی چتور کت کنت۔ بائد حکومتی مردم یکبرے وتی کورس ءَ انچو رد ءُُ بند ے بدینت کہ مردم وتی چہ بدیاں دور بہ بیت آ بزانت کہ انسان چے چیزے ءُُ آئی ءِ ارزشت چے اِنت گڈاں یک دیمروئی کتگیں راجے بلکیں جوڑ بوت کنت۔