بلوچستان ءِ بازیں جیڑہ است انت کہ پریشاں حکومت ءَ ہچ رنگیں گامگیج نہ زرت ءُُ نیکہ آئی ءِ زورگ ءِ وڑ ءُُ پیم است انت ۔ہمے جیڑہاں چہ یکے گیس اِنت ۔ بلوچستان ءَ چہ حدائی نعمتاں چہ یک ہمے گیس اِنت کہ چہ بلوچستان ءَ درکپگ اَنت ۔
ایشی ءِ یک بلائیں ہسٹری یے است انت من آنوں روگ نہ لوٹاں ،پرچکہ گپ دگہ معنایے ءَ روت بلئے ہمے کہ چم اِش گندانت گڈا چم بند کنگ وَ نہ بنت ۔ حکومت ءِ کار مہلوک ءِ آسراتی اِنت آوائی ءَ تاوان کنگ انت آئی جیڑہانی گیشوار کنوک ہمے حکومتی مردم اَنت بلئے بلوچستان ءَ چش نہ اِنت حکومت مہلوک ءِ جیڑہانی گیشواری ءِ جاہ ءَ آہاں انگت گیش کنگ ءَ انت،بلوچستان ءِ درائیں دمگاں انوگاں چہ گیس سر نہ بوتگ۔
بلکیں سوئی ءَ کہ گیس ءِ جند درکپگ ءَ اِنت آود ءِ چیزے کوچگاں گیس نیست ءُُ مہلوک چہ دار ءُُ بُنڈ اں وتی گزران کنگءَ انت مکران ءُُ رخشانی دمگاں بل،کوئٹہ کہ بلوچستان ءِ بنجاہی شہر اِنت اِداں ہم گیس است ءُُ نیستی ءِ نیام ءَ انت ۔ بہہ سرجم ءَ گیس دئیگ نہ بیت۔
ءُُ سارتی ءِ زور کہ گیش بیت گڈاں گیس ہم سست بیت ءُُ جاہ یے جاہ یے گار بیت ۔ انوں حکومت ءَ نوکیں گران باری یے لس مہلوک ءِ پرشتگیں سیرن ءَ داتگ آ ایش کہ نوکیں میڑانی جنگ ءَ چہ مردمانی گیس ریڈنگ گیش بوتگ ءُُ ایشانی بِل سک باز برز بوتگ ۔
بزاں ہنچو گیس حرچ نہ بیت بلئے گیس بل آزمان ءَ سر بیت ۔ اے ہمے گپ ءِ بابت ءَ گیس والا گشگ بوتگ اَنت بلئے آوانی گوش ءَ مورے نہ وارت ۔اے زلم ایوک ءَ گوں بلوچ دمگاں بوہگ ءَ انت ۔ بائد حکومت اگاں مردماں جوانیں آسراتی دات نہ کنت داں ہمے پژمردگیں آسراتی ءَ پچ وَ مہ گپت ءُُ اے گران نیادیں زمانگ ءَ ہنچو بلنگ یک مڈل مین ءِ بسات ءَ در اِنت ۔
اے بابت ءَ حکومتی سوڈگ نیست انت ۔مہلوک ءَ وتی ہمے نوکیں میٹر کہ جنگ بوتگ اَنت چیزے ءَ ہمے میڑ جنوک ءَ را زر داتگ ءُُ ہمیشی ءِ ریڈنگ کم کنائینگ، چیزے اگاں اے کار نہ کتگ داں گوں بلاں ہمے حکومتی مردماں گوں جنگ ءُُ مڑ کنگ ءَ انت ، چیزے مردماں ہمے بل سوتکگ ءُُ بل دئیگ ءَ نہ اِنت۔
،پدا ہمے میٹر جنوک لوگ پہ لوگ گردگ ءُُ آوانی جیڑہانی گیشواری ءِ جاہ ءَ چیزے زر دئیگ ءُُ زورگ ءَ آوانی میٹر ءِ لوڈ ءَ کم کن اَنت ءُُ آوانی پشتی بلاں گار کن انت ۔ چرے گپاں ہمے زانگ بیت حکومتی سوڈگ ایش نہ اِنت کہ لس مہلوک ءَ را آسرتی دئیگ بہ بیت بلکیں ہمیش اِنت۔
کہ چہ مہلوک ءَ چون ءُُ چے حساب ءَ بے راہ کنگ ءُُ چہ دونمبریں راہاں ایشانی دل ءُُ پگراں بے ایمانی بیار اَنت ۔اگاں حکومت ءَ ہمے میٹرجنوکانی زر زورگ ءُُ میٹر ءِ بل ءِ کم کنگ ءُُ حکومت ءِ ریپنگ ءَ چہ شرتر ہمیش اَت کہ انچیں میٹر جوڑ کتیں کہ آ کم چہ کم زر ءَ گیش آسراتی یے دات کتیں بلئے آپ چہ بُن ءَ لرد انت ءُُ سری ساپی ءَ بُنی لردی ہلاس نہ بیت ۔ہمے جیڑگ گوستگیں روتاک ءُُ ٹی وی نیوزاں دئیگ بوہگ ءَ انت ۔
بلئے حکومت ءِ نیمگ ءَ انگت ءَ ہچ رنگیں گامگیج روزگ نہ بوتگ ۔دومی نیمگ ءَ ہور ءُُ بارانی موسم ہم بندات بوتگ ءُُ روچ پہ روچ سارتی گیش بوہان اِنت ۔ پمشکا گیس ءِ کارمرز اوں گیش اِنت ۔ اگاں بل اے حسا ب ءَ بئیت انت داں مہلوک یاوَ دوبر ہما داری چنی ءِ نوبت ءَ بئیت انت یاکہ حکومت ءِ حلاف ءَ زند ہ باد ءُُ مردہ باد بہ کنت ۔ کس نزانت اے حکومت ءِ سوڈگ پہ راج ءُُ قوم ءَ چے چے اَنت ۔آوانی گپ ایوک ءَ دپی اَنت دل ءَ ہچی نیست انت ءُُ مہلوک ءَ را انچیں دلوشی دوست بیت۔